قصيدة( عـلـى عـجـل !! )للشاعر المرحوم بأذن لله تعالى سعيد بن واحش
,,, ,,, ,,,
,,, ,,,
,,
[poem= font="Simplified Arabic,4,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
ياركب .. يا مترحلين على عجل=وعن المنازل ينشدون اهل الدلل
هلا تمهلتوا .. ولا اعجلتوا الخطا =علي على ذكرى هنوفي .. أمتهل
وهلا مرحتوا ساعةٍ في ذا الحزم =لعلني ارقى على .. ذاك الجبل
واشرف على اطلالٍ خوالي ساكنة=الا من عوى ذيب .. وسروحة ثعل
نزاله بسابق سعايد ضيفهم=فكاكة العاني بمرهوف الصقل
هم قومها .. واعمامها .. واخوانها=اللي خذت عقلي .. ولا خلت عقل !!
وبني عمومتها .. وهم كل اهلها=لكنني في قلبها .. اسوى اهل
شدو على تسعين بكرة في ضحى=تسعين مع تسعٍ .. وحاديها بجمل
في حزة امطار .. وسيول .. سايله =وقت الربيع .. ووقت وارقة الظلل
كان الوطن زاين ولا ادري اش حدهم!!=يوم ان كلن شد حمله ثم زمل!!
شدو وشدت معهم ..الا قلبها =عيا يشد عني .. وعيا يرتحل
شدو ولا شديت .. لكن قلبي شد =معهم على غيمة من الحب ورحل
ولا بقي من رسمهم واثارهم =الا انا .. والحزن .. وذيّاك الطلل !!
هي الحسون الطاهره والعاذره =ولاغدا في حبنا زل وخلل
على النقى ما قد تعافرنا الخطا=وهي الخجول من النسايم تنخجل
هي غالية .. بنت الرجال العاربه=وعلى اسمها هي غالية .. تسوى دول
بيضا كما ثلج الشمال اليا نزل =رقيقةٍ .. مثل الفراش المنتقل
في صوتها خنه .. وبحه .. مع دنو =تلتغ بحرف الرا .. ولا تنطق بـ(ال)
سودا العيونِ .. سخايفٍ حجانها=بتلا الرموشِ .. كواسلٍ .. فيها نجل
وخشمها كالسيف سامت ما انثلم =ملموم جنبينه .. وفي راسه بتل
وثغرها خاتم جماره واريه=خلفه ثلوجٍ لامعه .. مثل الهلل
و خدودها كالخوختين النادية !!=موسومه بشامه كما حبة دقل
ووجهها .. كنه وحوله شعرها =بدرٍ مدور في ظلامٍ مشتعل !!
عنقا عريضٍ عنقها فوق الكتف =مركوز .. مسمورٍ .. ولا فيه الميل
والشعر الاسود داني لدون الظهر =على الكتف خصل وعالجبهه خصل
هذا الحسن حسن الكتوف وما على !! =وش كان قلتوا لونظرتوا ما نزل
لكن عسى الله يغفر الزلات لي=الغافر الرحمن للي قد زلل
استغفره .. واتوب له .. واسترحمه=واهل من خوفه .. مخاييل المقل
وارجوه يدمح لي ويقبل توبتي=ولا يحملني .. بما لا احتمل
وانا ضعيف ولا احتمل عذابها =نارٍ توقد بالحجارة في صلل
ولا احتمل نكير .. ومنكر .. لا لفوا =يالله ترحمني وتغفر ما حصل
ويالله ثم يالله يالله يا ولي=يالله ياللي كل ما شاءه فعل
يالله ثم يالله ثم يالله ثم =يالله ثم يالله .. وازيد بلا ملل
يالله ثم يالله ثم يالله ثم=يالله ثم يالله .. اجب عبدٍ سأل
اسألك ترشدني الى درب الهدى =وتدلني الى الذي ما كنت ادل
من الشريعة .. والعبادة .. والتقى=ومن المراجل .. والكرم .. ومن البذل
واسالك مالٍ احكمه باصابعي =احكمه .. ما اذل له ولا استذل
واسالك قوة باس فاليوم العسر=قوة تقويني على الخطب الجلل
واسألك لا جار الرفاقه بالصبر=واسالك لا جرحي تفرى يندمل
وولد صالح .. واسمه (صالح) لا كبر=يغدي على جده .. كما كوكب زحل
واسألك ذرية يشرفها انها=من جدها (سعيد بن واحش) تنّسل
واعوذ بك من اللئيم وغدرته=واعوذ بك دامي جبل .. حذف الخبل
واعوذ بك من عثرتي وكسرتي =واني اقول بما لا اعلم واجتهل
ويا حي يا قيوم تجعل موتتي=مابين ضبح الخيل .. وسيوفٍ تسل
ماهي على وسادتي .. واريكتي =ولا هي على جنبي كما موت البغل
البغل لا جت ساعته وحزته=شهق ومات وطاح ونثر ما حمل
ثم ينسحب من رجله ثم ينذب في=حفرة ويرمى فوقه سطلٍ من رمل
وانا ياربي ما ابي هذي موتتي !!=اعوذ بك لا اموت في ساعة جهل
ابي اموت بطاعتك ياخالقي =شهيدٍ بطلقة ودمي منهمل
من تحت راياتٍ خضر رفيفها =واموت انا من دونها موت البطل
من دون دين وعرض ومالٍ ووطن=لاخر نسم في صدري وانا محتمل
مني الدعا ومنك .. استجابة الدعا=يا مستجيب لداعيٍ عينه تهل
ولا ابن ادم!! .. ما بساله حاجتي =مادام لي ربٍ يجيب لمن يسل
سبحان خالقنا على منازلٍ=اربع .. عليها ولد ادم يندول
الرحم .. والدنيا .. وثالثها القبر=والرابعة الاخرة .. لمن عمل
اربع منازل لو تأملها نظر =لكان مما في عجايبها انذهل
ولما تحسف لو فقد مهما فقد =ولما كنز مالٍ ولا بابه قفل
الرحم لا جرى به الما ينخلق =بعد اربعين العبد دم مجتمل
ثم اربعين يصير فيها مضغةٍ=من لحم في كبر الفصم .. ولا اقل
لا روح .. لا لسان ..لا قلب .. ولا =عقل .. ولا يدٍ تطيش .. ولا رجل
ثم اربعين .. وينفخ الروح المَلَك=ثم يكتب الاربع حظوظ بلا وجل
يكتب عليه: اما سعيدٍ او شقي =ثم يكتب اعماله .. ورزقه .. والاجل
اما السعيد الى الجنان وظلها =واما الشقي فالى الجحيم المشتعل
بعدل ربي ما ظلم احدٍ بها=سبحانه بعلمه وحكمه قد عدل
ثم العمل بصالحة وسيئة=والرزق مثل الموت يلحق معتجل
ثم الاجل يكتب عليه بساعته =بحكمته وقدرته عز وجل
اربع شهور في الرحم ذا علمها =وخمسٍ وراها فيها خلقه يكتمل
سبحان من قلّبه فيها واطعمه=واسقاه من سره كما عذب النهل
وادفاه في وقت البراد بلا لبس =وانشاه حتى صار خلقه في عدل
ثم اخرجه من بطن الام ورحمها =من ذلته اخرجه من احقر محل
للمنزل الثاني .. وللدار اللتي =اكثر بنيها بالتوالف منشغل
دار العمل .. والكسب .. والذكر الحسن =والفخر .. والبغضا .. والابنا .. والميل
دار التحاسد .. والتنابز .. والنمم =دار التحارب .. والترامي .. والقتل
فيها ابن ادم يحسب انه خالدٍ=ويكنز الاموال من ضيم وجهل
ويعيش في درق الحياة وظلها=ينسى ان نور الصبح يجلي كل ظل
يبدا طفل .. جاهل ضعيفٍ .. معتوز =يكبر .. وثم يعود للمبدى طفل
يحبي ويمشي ثم يشب ويقتوي=ويشيب نقصٍ بعد ما شاف الكمل
مابين غمض العين وانتباهها =يبدل الله حالته .. الى بدل
ويصير للقبر الصغير .. وضيقته=والى انتهاء الوقت وقطوع السبل
والقبر باب الاخرة المستاخره =يبدا بها حساب ما سوّى قبل
ياتي الملك في يمنته مرزبته=لو ينضرب فيها جبل ينهل هل
يسأله عن ربه ودينه والنبي=الله والاسلام وخاتمة الرسل
فان جاوبه بهاه .. هاه .. ومادري=يا صبحته !! .. جهنمٍ فيها يغل
وان جاوبه اجابة المومن بها=فكل شيٍ من بعد قبره سهل
وينقلب قبره رياضٍ وارفه =ويجي عمله باحسن واجمل شكل
يونسه الين يلقى خالقه =ويورده للجنة ونهر العسل
ينعم بحور العين وصحبة النبي =واعظم نعيم يشوف مولاه الأجل
يالله عسانا للهدى واهل الهدى =مع النبي في ساقته ربعٍ واهل
هذي نصيحة قلتها مناصحة =ياجعل ما اخطي عنها ولا ازل
تاملوا ياركب فيها وادرسوا =وتفكروا في رسمها على مهل
لعل ربي ينفع المومن بها=ويفوز يوم العرض يلقى ما امل
تدبروا فيها على ذيّ الحزم ..=الين ما اجي من على ذاك الجبل !!![/poem]
|