[mark=000000][align=center]بسم الله الرحمن الرحيم[/align][/mark]


[poem=font="Arial,5,white,bold,normal" bkcolor="transparent" bkimage="backgrounds/21.gif" border="double,4,black" type=0 line=0 align=center use=ex num="0,black"]
العبد اله من عالم الغيب ميلاد =ويقضي بدنياه الخضروالعجافي
ولو عاش عمرشعيب فيها ولو ساد =مادامت لغيره نعيم وعوافي
ولافرق من بين الموالي والاسياد =من حل يرحل بانتهاي المطافي
له ساعةٍ فاللوح خطة وميعاد =وله مدةٍ يعيش فيها وتافي
لقاف قدامه وقافيه طراد =ولاله مفر ولو تحذر وخافي
ان كان ما صاده مع الدرب صياد =يشده اللي يطرده من خلافي
احدا ً من التقوى والامجاد يزداد =وبطيب الاعمال يملا الصحافي
يبا اليا نودي على روس الاشهاد =يعطى كتاب في يمينه يشافي
والاي من اودية الجهل هام في واد =وقلبه عليه من المعاصي غلافي
لا جمعت ارواح البرايا والاجساد =عض الابهوم من الندم والا شافي
وعرش المعالي فالعباده والامجاد =ما ياصله راع العزوم الضعافي
ومراتب الطاعه تبي صبر وجهاد =وتباالجنوب عن المضاجع تجافي
وممش ٍ بسلم ورثوه النا الاجداد =ما فيه مع هدي الشريعه تنافي
سلوم مجد عقبوها للاحفاد =كرم وشيمه والتحام وتصافي
وياالي حياتك كلها لهو ورقاد =وعن منهج الاسلاف فيك انحرافي
وشلون تقضي ايامك افراح واعياد =والشق مايرفاه بالسلك رافي
القدس محتله وكابل وبغداد =والله هو اعلم وش عليهن يضافي
والوقت قامت تعترك فيه الاضداد =جميع عاقل شاف منه اختلافي
وكثرت به انواع المعاصي والافساد =وتتابعت فيه المحن يامجافي
وتغيرت فيه المخايل والانواد =والجو كتم عقب ماهوب صافي
وتمض السنه ماحن فالمزن رعاد =والبر مجدب والمواشي هجافي
والزرع كنه باديا ً فيه حصاد =من الجفاف ومن لهيب الهيافي
وجميع عدٍ كان للناس ميراد =نضبت جمامه عقب طول الجفافي
واهل العقول الراجحه واهل الارشاد =بقلوبهم من مايرون ارتجافي
واللي بغار جسم بلا عقل وفواد =كنه عن اللي صار فالنوم غافي
مايعتبر من قوم صالح ومن عاد =وامثالهم من كل مذنب وجافي
وبنصح اخواني حكومات وافراد =بتقوى الذي خيره على الناس ضافي
وانا اكبر مقصر من الحضر والباد =واشهد بتقصيري واحط اعترافي
قدمي مسافات ومفازات وانجاد =مع جرهدٍ مقفر من الناس عافي
يامصعب الرحله ويامطول الماد =والحمل باهض والمزاهب خفافي
يارب جيتك لامطيه ولازاد = جيعان مذنب درك عريان حافي
جيت بخطايا مالها الا انت عداد =تعلم بها ياعالم باالخوافي
وجميع ماحشته بدنياي مافاد =جيتك منه فرد وتركته خلافي
مافاد مال ولاجماعه ولا اولاد =نهار فرقا الشمل بين الولافي
من عقب مد الشوف مع بيض الاجراد =ومن عقب ممش ٍ في وساع الفيافي
وبعد القصور اللي تفرش بسجاد = وفرش منعمتٍ ولحفٍ رهافي
امسي بقبرا ً مظلما ً بين الالحاد =ارضه فراش ٍ لي وطينه الحافي
مير ارجي اللي له براياه سجاد =ومن التجوا به ماعليهم اخلافي
وصلوا على الهادي عدد رمل الانفاد =وعداد من حج وسعا عقب طافي[/poem]