دارين

الإثنين 8 / رمضان /1429 هـ




اليوم إثنين

بجيب لكم من كل شي إثنين




موقفين


( 1 )

مرة اتصل واحد بالغلط وانا نايمة .. ورديت بدون ماشوف الرقم ..
قلت (الو) والصوت رايح فيها
قال السلام .. و رديت عليه
قال كيفك .. ؟ وقلت الحمدلله >> على بالي انه خالي او شي
رد علي بخوف شديد و رعب و لونه مخطوف
قال ( الــــو .. انتي طيبـــــــة ؟؟
وانا مع النوم .. ارد ببرود الحمدلله
وهو يكمل .. انتي طيبة ؟ فيك شي ؟ >>>> ولا تنسون الرعب والهلع
يوم شفت الخوف هذا والا اصحى واصحصح صدق .. >>> اول ترد وهي نايمه
وفتحت عيني واطالع بالرقم ولا رقم غريب
قفلت .. لكن ماقدرت انام جلست اضحك على الموقف
وسمعت اذان الظهر ..وقمت صليت ودعيت له لأنه صحاني للصلاة ..
جزاه الله خير .. والله يهديه

الظاهر كان غلطان بالرقم .. و خوّفته على اهله ..


*


*

( 2 )


مره ارسل لي شخص مجهول ( عشرين ريال ) رصيد على جوالي .. واستغربت الرقم

و حالا قمت احول المبلغ على نفس الرقم .. وتقول لي رسالة الجوال ( الرقم السري غير صحيح )

جربت كثير ولا عرفت الرقم السري ..وبعد دقايق معدودة اتصل علي نفس الرقم ..

قلت اجاوب واشوف من ..

وكان هذا الحوار

هو- الو
انا - الو
- انا في يرسل فلوس ..انا في غلطان.. >>>>> طلع هندي
- ماسكة الضحكة .. طيب يبي يرسل بس انت صبر شوي .. في مشكلة جوال ..
- ايوا انا يبي فلوس بليز
- طيب ان شاء الله .. مافي مشكلة ..


وقفلت الخط واجرب وتطلع لي نفس المشكلة ( الرقم السري غير صحيح )
مع اني متأكدة ..


وبعد مدة يمكن ساعتين او ثلاث .. اتصل نفس الرقم

الهندي - الو
انا - الو
- السلام عليكم <<<< بلكنة هندية باكستانية
- وعليكم السلام
- انت مافي يرسل فلوس >> وكنه زعلان شوي مدري خايف
- طيب وش اسوي انا ..حاولت كثير لكن في مشكله بالجوال <<<< نسيت انه هندي
سكت و الظاهر كان يحاول يستوعب كلامي
قلت له
- مافي خوف .. مافي مشكله ..
- ان شاء الله
- مع السلامه
- مع السلامه


قفلت وانا في راسي فكرة مريحة .. تخلصني من هذا الهندي اللي كل شوي متصل
و ذالني بالعشرين ريال .. كأنها عشرين مليون

اخذت جوال ثاني.. وارسلت له رصيد بقيمة عشرين ريال


وثواني واتصل

فرحان يقول وصل فلوس .. ثانكيو..

لكنه ضحك ضحكه شكيت انه سعودي >>>> مع ان الضحك لغة عالمية
مدري هذا اللي خطر على بالي