[POEM="font="Simplified Arabic,5,blue,normal,normal" bkcolor="transparent" bkimage="" border="none,4,gray" type=1 line=1 align=center use=ex num="0,black""]نتايج شعورٍ حاسني والقصيد اثلجْه=نوادر هجوسٍ ما خذت شرح ومدرّب
فـ كم شاعرٍ غنّا ولكن غناه احرجْه=بلا طرقٍ يطرّب ولا بدعٍ يطرّب
ونهج المظاهر لعنبو من سلك منهجْه=اقوله وانا عن راعي النهج متغرّب
على الهون ياللّي طاري الطيب متولجْه=هذا وانت منت بيعربي .؟ مير متعرّب
اقول أصّ لا تقرق على راسي وتزعجْه=مشاريه مثلك لا تبعّد ولا تقرّب
لو انّ المراجل فالملابس وزين الوجْه=غديت انت فعيون العرب سيفٍ امجرّب
لكن سوق رجلك صوب درب الغياب ودجْه=ليا صرت عن كلّ المواجيب متهرّب
اقوله وانا بدلّه الراس وآسججْه=على الطاله وفي وجه من مثلك امترّب
على الله مدخل ضايق الخاطر ومخرجْه=هو اللّي موكّل جايع البطن ومشرّب
لو انّي مسلسل كان يا حظ من ينتجْه=قصص واقعيّه تصلح الوضع وتخرّب
عسى الله يفرّج هم ما غيره يفرّجْه=يشرّق بصدري وان كره مقعده غرّب[/POEM]


منين جبتها يالدب ؟؟؟؟؟
والله اني اول مرّه اقراها
واعتبرها فرصه لتسجيل الاعجاب بالقافيه والطرق والمعنى والمبنى والشعر والشاعر
صح لسانك جدّا يابومناحي .. عزالله العزيز انها جزله من جميع النواحي والاطراف وفوق النقد