اسمحوا لها تمر من هنا :

[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
الراس قاسي والعلم مرفوع=في هيبة بلادي وواليها
ما ارتعت لو كان المقام يروع=اعرف متى اجرحها وأداويها
ياهاجسي جتك القصائد طوع=الله يحييك ويحييها
فل الشريط ووضّح الموضوع=مادمت أبوها اللي مسمّيها
السالفه من مطلع الأسبوع=أشوفها تومي بأذانيها
بان الخلل فالمشلح المرقوع=يشيلها والا يخليها
تهزعت ماني لها مهزوع=وتمخطرت مانيب راعيها
شرطٍ على التابع من المتبوع=مدري طلب مدري شأسميها
أضحت ثنيّه حبلها مربوع=وأمست رباع وشرها فيها
وسط الخباري نْقّز الجربوع=والجربعه بانت مواريها
سلامتك يالراعي المفجوع=من أول الدعوى لتاليها
رعيّتك من كل شكل ونوع=يا طيب قاصيها ودانيها
لولا بعض الأحيان فيك طْبوع=عز الله انْ مانيب أدانيها
تدخل من المسموح فالممنوع=وتشبّ نارٍ ما تطفيها
من قال لك تضرب بها لا الكوع=تبلش بها ولا تسوّيها
وتسوق صفرا قيدها مقطوع=مدري على وين بتوديها
ما تسمن ولا تغني من الجوع=وانته مسرّحها مضوّيها
وإن قلت حيله واللغم مزروع=وحبالٍ أعقدها وألوّيها
فأقول صلاة ٍ بدون رْكوع=هذي صلاة ٍ مانصليها
سجلت في ديواني المطبوع=قصيدةٍ مانيب أهذريها
ترى الحقيقه صوتها مسموع=حتى الأذاني الصقه توحيها
والناس ذا طامع وذا مطموع=صغار وكبار ٍ هقاويها
نَص الخطاب برفقته مشفوع=ما بين كاتبها وقاريها
وش مربح النافع من المنفوع=غير الحصاه اللي يدربيها
ما عاد من دون الفؤاد ضْلوع=تهشّمت عن بكرة آبيها
والحب سنّه والغرام يلوع=ناسٍ يضحكها يبكّيها
والفارع اللي دونها الفاروع=مانيب طايح بين أياديها
والسالفه ما بين أصل وفروع=فالقاف أبيّنها وأخفّيها
واللي دخلها الشك كيف تْزوع=تمرني وأكوي علابيها
وش يفرق الممنوع والمشروع=لا صار حاميها حراميها [/poem]