[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
من هواجيس الضمير اللي تجي وقت الطباعه = ياسلام الله على راسي ومركاي ومحلّي
وياسلام الله على صـدري وضيقه وإتسـاعه = كيف متعـلّي على شفـّي وبالصبر مْـتحلّي
في زمان العـولمه والبـولمه والإنـشلاعه = أنقطـع حبل الـرجا بين المدلــّى والمـدلــّي
وأرتفع سعر الرخيص وكثرت أصناف البضاعه = في مخازن باقصيد وباعصـيد وبامجلّي
وأنعرف طيب الصناعه وأنكشف عيب الصناعه = والريال أندق خشمه في سخافات وتسلـّي
والبلا طال المـزارع في محـاصيل الـزراعه = والثـمر ولـّى وراعي الزرع من قبله مولـّي
أدري الرمان يثمر في براد وفي رفاعه = وزارع الرمان في الصحرا جنى رمانبلّي !
وأدري إن الذلّ بعض أحيان ضرب من الشجاعه = وبين باب الذل وأبواب الشجاعه ربع ملـّي
والمواقف تختــلف والعجـز غير الإستطـاعه = يعني إنعقدي ياحجـّاني على أمري وإسفهلّـي
وإدري إن به للجبل قمّه وبه للبحْر قاعه = علمتنــي الفــرق ما بيــن التعالي والتعـــلّي
وكيف أقول أن كان مالي من ورى الدعوى طماعه = يا شجـاعة راسي إرتـاحي ليا بيّــنت ذلّي
ينصفق خدّ الوصال وينفـرك خشم القطـاعه = وأختلف دلّ العلاقه وأما أنا ما أخلفت دلــّي
خلّي الله لايرده لو يغيب الفين ساعه = لو يطول غياب خلّي ماشكيت فراق خلّي
الغـرام ألوي ذراعه والغـريم أكسر ذراعه = والحميم آفـزّ له وآقوم وآرحــّب وأهلــّي
وأن حصل وقت الله الله يامهدّي كل راعه = والله إن آذود بذراعي عن الذود المفلــّي
لا مصـدّ ولا ملــدّ ولا مجـالٍ للشـــفاعه = أصبحت من باب : يوم الزحف وش حكم التولـّي
بآتقـدم وأحتسب حربي على العصيان طاعه = طاعةٍ لله سبحـانه بتــرحالي وحــلــّي
والمواجه للوجيــه وكل راسٍ وإرتفــاعه = فأن برد غلّ العدو والاّ فأنا بــرّدت غلّي
والبلا بعض المواجه لا غنـــاه ولا مجــاعه = يا ضعـافة نفس والاّ إنــّه حسد والا تبــلّـي
والسروق المندفع ما همــني قوّ إنـدفــاعه = يــْعقب ماهو عدوٍ لي ولا هو غايةٍ لــي
ما أحتــديته من طمع ولا تــركته من قناعه = يكفي إنه ماجلا رغبه ولكن غصب جـِلـّي
بس عن قولة شراه وفي نهاية الأمر باعه = لازمٍ إن آقول بأعلى الصوت في شمسي وظلّي
وقــّفـو ياهل القناه ووقــفـو ياهل الاذاعه = ياملى اللّي يالقناه ويالاذاعه ياملى اللّي !
الفقير اللي تبـنّيتوه ما تارع شباعه = أدرو إنه لا يشوف ولا يذوق ولا يحلّي
وإدرو إنــّه مطــلّـع وأنتو تعرفون إطــّلاعه = ما يحبّ الاّ سـوالف ياسلام وراكب اللــّي!
وعنده قـْراية قصيد النـاس خير من إستماعه = بــلّغوه إن العرب ما تجــهل سوالي وحـلّي
يايصلّي منفرد وأفضـــل يصلــّي في جماعه = المهم إنــّه على أيـــّة حال لفروضه يصلّي
لأنــّكم لا حفظكم ربــّي سعيتو في ضيــاعه = وإشهد إنه ضاع في ليلٍ به البدر مـْتجلـّي
وأشهد ان زود اللكاعه جاب نقص في المناعه = واشهد ان نقص المناعه طيّح الفرد المظلـّي
والوكاد إن القضيــّه حــرب من دون إنـدلاعه = أنتهت والاّ أبتدت ماقلت وش كثري وقلـّي
كل باب وله جواب وكل نور وله شعاعه = ويش أطول وويش أقول وويش أعد وويش أخلـّي
أن غلبني طيب راسي ما غلب راسي صـداعه = ويوم طعت عروق وجهي والله إنـي جيت كلـّي
أن بغيت أثبت حقيقه وأن بغيت أنفي إشـاعه = وأن بغيت آجيب دقـّي وأن بغيت آجيب جلــّي
فالخصـام أنهي نزاعه والكـلام أشــْبع جيـاعه = والملام أطوي شراعه قبل لا تحسب تغــلّـي
رأس مال العلم يوم أكشف سديـسه من ربــاعه = والجليــّه بيــّنه ماعاد تحتــاج لتجــلّـي
قفلها ومفتاحهها بيت القصيد اللي قناعه = كنـــّه يقول إظهري يالغايبه والاّ إضمحــلّي
كلمتين مـْن الضمير اللي ردى الأيام لاعه = سجّلوها في سجــلّي قبل ما آراجـع سجلّي
بلـّي وضاني خذوها اللي يبيعون الوداعه = من يرجع لي من أشباه البشر ضاني وبلـّي !![/poem]