[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]

الشمس حيّه والقمر مات = والدرب سيده والهدف وين
دمار يا حرب العصابات = ويش أنت مَعْ حطين وحنين!
جـمّعتـها شاشات شاشـات = وصـرّفتها سلكين سلكين
ساحه وشعـّار وقنـَوات = ومسـابقاتٍ بالملايـين
هْنا الجرايد والمجلاّت = فيها الصور مثل العناوين
وهناك قضـّابين طارات = وهناك صبـّابين بنزين
وهْنا إسطوانات وكاسيتات = وعان إذنكم ماحن بخالين
يامسمعي هيهات هيهات = يطربك تسحيب الجوالين
من فوقك السبع السماوات = ومن تحتك السبع الأراضين
وحرب الفضا حسب الفضاوات = ودرب النضا للزين والشين
أمّا " جناب الود " بالذات = ياعنك ذا شيخ الدواويين
من جمع زيزوم الثقيلات = اللي جهوده تقضي الدين
نواف نواف المنيفات = مشكور يا نسل الوباصين
والشيل من عذبين الأصوات = تلحين ماهو بأيّ تلحين
والبدع بدع اللي ليا شات = ما أرمش ولا يخطي النياشين
وإليا دعا قريحته جات = ماهي قريحة بيت بيتين
سداح بنـكٍ للجزيلات = ودكتور في مبنى وتضمين
مْن الذهب يصرف جنيهات = ما يختلف في العسر واللين
يركز على المشذوب رايات = ويبين في كلّ الميادين
شاعر حدث في كل الأوقات = موزون ومـرجـّح موازين
ما تشرقه حتـّى المحيطات = وما تحرقه نار المعادين
وما ترهقه شتــّى المهمـّات = وما تـفهقه دعوى المصاخين
ما يجذبه قدح الفلاشات = وإليا قدح شافو الكفيفـين !
والأمثله مثل الإشارات = والقصد توضيح المضامين
إليا مدح نقــّى العبارات = لأن الكرم طبع الكريمين
يمدح رفيعين المقامات = وهذي مقامات الرفيعين
وإليا رثا سداح الأموات = أهتـز قلب ودمـّعت عين
وإليا هجا ما بـه سلامات = هلّ الخلايا والشرايين
وإليا أنتقد بعض الحركتات = ميـّزت صاحين ومجانين
اللي يسلـّون الصقيلات = واللي يحدّون السكاكين
هذا وأنا ما آمرّ بسكات = وأدفن الأحد في قبر الأثنين
مالي ورى ماقلت غايات = غالي ومرّ ديار غالين
لي مَع ذوي ناقي صداقات = وبعض أصدقاي من البتارين
تاجر بدون أجمع ريالات = تــْجارتي عرف الوفييــن
وسداح من دون إتصالات = كنــّه من الربع الموالين
ما بيني وبينه علاقات = الاّ علاقات النقيــيــن
آتابعه عبر الشبــَكات = من نصف عام ألفين وثنين
متابعه وأحفظ له أبيات = بعد أوّلين وقبل تالين
يعني إختصارٍ للمسـافات = والجيم فال مقدّم السين
سداح في كل المجالات = يبقى مغـن النادر الزين
عندي شهود وعندي إثبات = حسب المناهج والقوانين
ودليلي بليــّا مراوات = سيده بدون يسار ويمين
لو ماهو بحـاجة علامات = بآقوّس إسمه بين قوسين
هذا (جناب الود) بالذات = خيـر الأدلـّه والبراهين ![/poem]