السلام عليكم ورحمة الله وبركاته

والله ماعندي عذر للغياب لكن مرّروا هذه المتواضعه




[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=2 line=1 align=center use=ex num="0,black"]
الا يالله بعفو ٍ منك يالله يا عزيز الجاه = انا عبدك وابن عبدك ضعيف وحالتي حاله
انا الأمي وانا الجاهل وانا اللي ما يحسب خطاه = وانا بنـّاي بيت العنكبوت بسوءة أعماله
وانا اللي شاري ٍ دنياه بالغالي وباع أخراه = وانا اللي صارف ٍ له راس مال ٍ ماهو بماله
وانا اللي للهوى يطرد وطرده محفي ٍ سمراه = وانا اللي باركلـّه عند حمل ٍ ترغي اجماله
وانا اللي لو يطم الموج مايدري و ويش ادراه = يغرّه زود نقص ٍ فيه عن جرد الوطى شاله
وانا اللي ظالم ٍ نفسه قبل يظلم هذاك وذاه = وانا اللي فالعرب من ضيق منظوره يورّى له
وانا اللي سكّر اسموعه وانا اللي ماشي بعمياه = وانا اللي شارب ٍ حتى العمى والورع فنجاله
وانا اللي شاف بعيونه عمى قلبه وعمي أرياه = وانا اللي شين فاله مار فال الله ولا فاله
أنا اقوى قلب من حيد المنيف الراسيه صمّاه = وانا الين عظم من قلب التقي لا كبّر الحاله
وانا اللي عدلته ياقربها قرباه من عوجاه = وانا اللي شاف حاله لين حاله صار يرثى له
وانا مخلوق من ماء ٍ مهين .. وطين .. ومعاناه = وانا اللي ما يشوف امن السما لو قاعة بياله
وانا اللي قوّم الساعه وطاول مع رعاة الشاه = مباني مع ذعاذيع الصبا فالصبح منهاله
وانا اللي ما ستر عيبه وقام يعيب خلق ( الله ) = وانا اللي يجزعه ثوبه ومال براسه اعقاله
وانا اللي لو يجوع يرم كلْ شي ٍ يبا يلقاه = وانا اللي لو ظمى يمتصّ ابوه وعمّه وخاله
وانا اللي لو دعا ماهي غريبه ما يجاب دعاه = مدام أنّي من اللي ما يصدّق كل ماقاله
انا الانسان لو أنّه يحط الكون الكون في مخباه = جداه اضعيف واهو اضعيف مهما كانت افعاله
أنا المسكين انا اللي معترف فـ / أيّة خطا سوّاه = انا اللي حسنته ما غير لله يشكي أحواله
أنا ياويش أنا .. ماني بشي ويالله المنجاه = أنا داخل عليك امن الحشَر والبعث وأهواله
وقفت الحين ميقاف الشجيع قليّل الاشباه = يزوده عز يومنـّه وقف لله تذلاّله
مدام أني ماعندي شي عن رب العباد أكناه = درابي كاين ٍ من كان غيره مالي وماله
ثلاث اليال والبارق ينوض ولا سقاني ماه = وخمس امرار سال الشعب ما كنّي على جاله
تفرّق ماه عن زابن جبل ( كنعان ) للمثناه = وانا ماني مثل كنعان ، أنا قنعان بخياله
عسى الله مايسجّلني مع المحرومه المعطاه = ويرحم عبده اللي ما قنط من رحمته ( لآله )[/poem]