[align=center]



جديده بمناسبة الأجواء الربيعيّة :

[poem=font="Simplified Arabic,5,darkblue,normal,normal" bkcolor="transparent" bkimage="" border="none,4,gray" type=2 line=1 align=center use=sp num="0,black"]

نبغى لنا يامحمد الصبح مشوار=رحله سياحيّه ولكن قصيره

يومين والثالث نعوّد على الدار=حكم المشاغل والمشاغل كثيره

أما حصل لكزس نبي جيب VXR=وأن عوّدت للجد مافيه غيره

اللكزس اللي لأستوا بأيسر القار=لاعاد تطري للمسافات سيره

لو أنّه مصنّع على ايدين كفّار=مافيهم اللي فيه ذمّه وغيره

مركب هل الطالات وطوال الأعمار=اللي لهم فالبنك عمله كبيره

واليا نطحته ناطحٍ من يبي ثار=ومعبّيٍ مخزن سلاحه ذخيره

مايردعْه جنّه ولاتردعْه نار=يسوقه ابليس اللعين لمصيره

واليا ركبت بداخله فايف ستار=امكيّفه وامحرّكاته وقيره

والشاشه اللي تشتغل عبر الأقمار=يرسم بها السواق خطّة مسيره

امن الضبيعه نطلع وناخذ يسار=يالله عسى في تالي الأمر خيره

اضن مايحتاج للعلم تكرار=جو المهَمري مانبي اليوم غيره

يالله عسى ربي يغيثه بالأمطار=ويزود الرحمن من زود خيره

في روضةٍ فيها بختري ونوّار=وريح النفل ننطح شذاه وعبيره

وانبهّر الدلّه بعد شبّة النار=وانسوقها لأهل الوجيه السفيره

وسوالفٍ يطرب لها طيّب الكار=على المراجل ماتبيح السريره

ومن قبل شمس الصبح تشرق بالأنوار=نركب مواترنا لجوله مثيره

نتبع عطايا الله كليفات الأسعار=وضحٍ على صوت المودّه صطيره

فيها الصطر والولف والطبع يحتار=لاشافها راع الولع زاد حيره

وضحاً عليها راعي الصنْف يغتار=طول ارقبه واسناد هزعا نظيره

خزيزة الفارس على قبّ الأمهار=اللي ليا ثارت يقود العشيره

هذي طراة العمر والوقت دوّار=يدور دورات الرحا المستديره

وقتٍ صواديفه على العالم كبار=يالله رضاك ورحمتك والستيره

مشوارنا يومين .. والعمر مشوار=واعمارنا مهما تطوّل قصيره[/poem][/align]