((( من خبالي )))

#1 23-11-2007, 02:39 AM

السلام عليكم اجمعين

انا مبطيٍ من المرقاب وجيت وعنيت امورٍ جديد ويشكرون عليها القائمين عزالله انهم ما قصروا

ومن الاشياء الجديده هذا الركن (( الركن الهادئ )) وبيني وبينكم زان لي كلٍ يسولف على نفسه

وتروا زين لقد الواحد يسولف عل نفسه ويقولون علماء النفس الواحد لازم يسولف على نفسه على شان يعطي العقل اراحيته ويفكر بصوتٍ عالي .. ويقولون البدوان اذا شافوا واحد يسولف على نفسه هذا خبل وسميت هذا الركن (( من خبالي )) .. واربه يزين لكم ذا الخبال

..

وانا ذلحين بسولف على نفسي وانتوا بما انه من شروط هذا الركن عدم الرد اقروا ولا حد ينقد علي

مرة من المراير (( المرات )) مسافرٍ من قطر لجنوب السعوديه وعن طريق الجو من الدمام وكان علينا ذيك الايام بردٍ قارص وسارحٍ من قطر فجر لدمام ويالله يالله اني عينت لي حجز من الدمام ابها ولا وصلت ابها الا اخر الليل وحزة ما وصلت ابها واخذلي سيارة اجار ومشيت ولا نفسي تراودني اخذ لي غرفةٍ في خميس مشيط والا اواصل وليني ابغي منطقه تبعد عن خميس مشيط ما يقارب 120كم والله وادق في الراس واكمل المشوار ويوم تعديت الخميس بـ8كم والا ذا النوم اقرب منك ابغي اواصل منا منا والا النوم ماعاد خلاني اشوف الطريق وحنا في باااااااااااااارد يشيب الرضيع والله واصفط في محطة صغيره مافيه الا هنيديٍ متيبساً من البرد وجه كنه اشطفه

محمد : رفيق فيه غرفه سوي نوم

الهندي : اداداد مممممافيييييه رفيييييق <--- تعبير على انه بردان

محمد : طيب مافيه محطه قريب في غرفه نوم

الهندي : ممممممافيييييه فيييييه مسسسججججد سووووويي نوووم هناك

ولا به في طرف المحطه مسجدٍ صغير قلت اربه فاتحٍ ارقد فيه واصلي الفجر واسرح

المهم فتحت المسجد وانزلي بشتٍ معي شاريه من الحساء يوم مريت الصباح ماخذٍ حذري من برد الجنوب

واخذ الدكايه حقة الراس اللي في السيت واتوسد الدكايه واتلحف بالبشت وهاتك يانوم ويوم خذيت شوي..

والا اني احس في البشت بلاء افتح عيوني والا ذا الرجال اللي معي في البشت وقدهوا ذا يتدفاء معي بالبشت .. ولا ذا الرجال اللي لحيته طويله وكبير في السن شوي وادفه مني واقوله :

محمد: انت ويش خبرك هنا؟ ويش عندك ؟ انت انس والا جن ؟ وانت ويش تبغى ؟ انت انت انت <--- 20 سوال في سوال واحد

البردان وبكل برود : يارجال ارقد ارقد

محمد : ارقد!!! وين ارقد جعلك المرقد

ولا الرجال ميتٍ من البرد ويرتجف واقوم منه واروح لسياره

وويتكلم قدني عند الباب المسجد طيب عطني البشت

واخذف عليه البشت واسري واوصل الديره اللي انا ابغاها واخذ لي يومين ما طب النوم عيني

وعادني افكر لذلحين الرجال ذا انس والا جن !!!

الله الله ياباقين

هذا وعافني وعافاكم ...

27-11-2007, 01:14 PM

يقولون ان به شايبٍ له عيالٍ وهو خالهم

(( ولد و بنت )) وكل واحدٍ منهم على اختٍ له

والولد يقولون وجه شيفه ياداف على البلاء ينفج له عربٍ من محلهم يقولون قبيح جداً جداً
والبنت غايةٍ في الجمال ومزيوووووووووونه

والولد يحب بنت خالته والبنت ماتحبه ومادانيه

وقد خطبها كم مرةٍ وعيت منه وبغى فيها منا والا منا ما خلا خيلة الا سواها غير يادافع البلاء عيا يدخل قلب البنت

راح للشايب اللي هو خاله وخال البنت وقال ياخال ابغيك تكلم فلانه اربها توافق علي واخذها

قال ياولدي دام ما تبغاك دور غيرها البنت معييه

قالالولد تكفى ياخال .. اربها تستحي منك وتوافق

المهم ان الشايب راح للبنت مستحي من ولده اللي هو خاله وهو كنه داري ان محاولته فاشله غير قال على شان يقنع الولد

راح الشايب للبنت قال يافلانه قالت سم ياخال
قال فلان يخطب ويحبتس وبيزين عندتس بيصلح لتس

ان كانتس بتاخذينه تريه رجالٍ سنافي وبيصلح لتس وان عييت منه

فالله يلعن ابو من لامتس

28-11-2007, 04:51 PM

[poem=font="Simplified Arabic,6,blue,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black"]
بيض الله وجه الايام والمال القليل=بينتلي صادق الناس من كذابها [/poem]

بيتٍ احبه ولا ادري منهوله؟؟؟