كيف تكون شاعرا" مبدعا" ؟

بسم الله الرحمن الرحيم


*ملاحظه :
الموضوع في ركني الهادي :
1- لا أحد يرد
2- لا أحد يعارض ولا أحد يؤيد
3- يقرأ و يتوكل على الله

* أي اقتباس للموضوع يجب ذكر أسمي الرباعي .
* إذا لم تستفد أخي القارئ من أول خمس نقاط سأذكرها فأنصحك بعدم إكمال القراءة .


- هذا الموضوع تعود ملكيته لي و لكل مسلم و مسلمة في هذا الكون الفسيح .

-اعتقد ان هذا الموضوع يستحق المتابعة بل أجزم أنه سيكون من أفضل المواضيع التي طرحت في الخمسين سنة الأخيرة في الساحة الشعرية الشعبية إن شاء الله
و أجزم أيضا" أن المتابع لهذا الموضوع و العامل بما فيه سيتحسن أداؤه الشعري بمقدار 500% خلال اسبوع واحد .




جميع ما سيرد في الصفحات القادمة إنما يمثل وجهة نظر الكاتب الشخصية - اللي هو اخوكم في الله -
إن أصبت و أجدت فمن الله و إن أخطأت و أسأت فمن نفسي ومن الشيطان .

^
^
^

أسمك الحاله يشرفنا وتواجدك بحد ذاته ابداع

ارحب يا عايض تراحيب المطر
و الشرف لي طال عمرك بمرور اللي مثلك و شرواك
و الله يخليك لي ياعايض ولا يحرمني منك وجعلك ذخر

1- إفتك من كلمة ( ترى ) واخواتها .!

اول نصيحة و اتمنى من اخواني الشعار يأخذونها بعين الإعتبار
اللي هي كلمة ( ترى ) واخواتها الزوائد .!


وانا سويت احصائية بسيطه في المرقاب قبل ما اكتب تعليقي هذا
عشان اشوف هل كلمة ترى و أخواتها منتشره او اني ( متوهم فقط ) .!

وحددت البحث فقط في القسم الشعبي وكانت النتيجه على النحو التالي :



* طبعا" البحث يدخل فيه المشاركات الرئيسية و الردود


و الكلمة هذي صراحة من الكلمات اللي ( تحوس ) القصيده وتشيّنها
وهي تعتبر كلمة من كلمات ( الفزعة ) اللي يلجأ لها الشاعر عشان يوزن البيت فقط .!



مثال على ذلك :

انا ( ترى ) في دنيتي ما تهنيت ---- عيّت تناسبني ظروف الليالي


و نلاحظ ان الجملة تمشي تمام و لا يختلف معناها لو شلنا ( ترى ) .!
يعني كلمة ( ترى ) وش جابها في البيت ؟!


وفي النهاية :
اخي الشاعر حاول ان تبتعد كل البعد عن ( ترى ) واخواتها
و تعيّن خير .!

(ترى) انا متابع هنا جداً يابو عبدالله

وألف مبروك الزواج مقدماً

ارحب يا سلطان و نورت الصفحه طال عمرك و الله يبارك فيك و الله يحييك وعقبالك ان شاء الله

2- اختر - قافيه و بحر - للقصيدة زي الناس .!

النصيحة الثانية وهي لي ولأخواني الشعار
هي اختيار ( بحر القصيدة وقافيتها ) ..


يا جماعة الله يرحم والديكم فكونا من ( البحر الهلالي ) و القافيه ( المهمله )
البحر الهلالي بحر نشأ في زمن من الأزمان و انتهى ولم يبق الا شوارد قليلة
و الغريب انه انتشر من جديد و صار موضه مع ان اللي يدقق في البحر هذا يجد انه ( بحر ) ما فيه من الزين شيء .!
بحر فيه تكلف و لوي للبيت و للمعنى ولا فيه ابداع ابد ابد



مثال :

يقول غالب و الليالي تحـــــــاربه ..
ـــــــــــــــــــــــــــــــــ جنوبي على صـــــــكات الأيام داربه ..
و من لا يجي جنبه متين وهو قوي ..
ــــــــــــــــــــــــــــــــــ مصيره يطيح و ينتف الوقت شاربه ..


و البحر الهلالي و البحور المتكلفة الاخرى من أكبر العوائق التي تحرم القصيدة جمالها
حتى ان بعض البحور تسمعه و ما تدري هو موزون و الا مكسور و الا كيف .!

ايضا" القافية ( المهملة ) خاصة اللي على ( آلي - و آني - و إيني )
هذي تصلح في قصائد ( الأفراح و العزايم و المدح اللي مهوب بلحيل والفزعات )
يعني ( تمشية حال )
أما انك تقول ان فيها ابداع فأدخل على الله ان كانها حافها الإبداع والا جا في طرفها .!
و لا اذكر ان فيه قصيده مهملة اعجبتني الا قصيدة الشاعر / مبارك آل خليفه اللي القاها في حفل المرقاب و اظنها موجوده في المرقاب لأن فيها تسلسل و ترابط و فيه خروج عن المألوف من أحداث و مواضيع حساسه .

البحر مهم جدا" و القافية كلما كانت غير مطروقه كلما كانت اكثر جاذبية و جمال
بشرط ان لا تكون قافية متكلفة وصعبة تجبر الشاعر من رابع بيت على اختراع كلمات جديدة عشان يمشيها على نفس القافية فهذي ما تصلح ابددددددددااا



و في الختام اقول :

اخي الشاعر
البحر و القافية من اهم مقومات جمال القصيدة فلا تخرب قصيدتك بقافية و بحر مدري وش شكله .!

3- لا تطيح في شبيهة القافية ..

فيه ملاحظة صغيره و هي تعتبر عادي عند البعض
ولكنها تخرب القصيدة و راعيها ما يدري .!


اللي هي ( شبيهة القافية ) .!

يعني كيف ؟

الشاعر احيان يظن ان القافيه تغير بينما هو واقف على حرفين بس .!
مثال :

يالله ياللــي كلــــــنا ( نلتجي له ) ---- نسألك تنصرنا و تنصر فلسطين
مافيه غيرك نفزع و ( نشتكي له ) ---- يالله يا قابل صــــلاة المصلين


و هلم جرى من ( شبيهات القافيه )
مثل ( يرتكي له - ننحني له - ننتمي له - إلخ إلخ )

و قافية ( إيله ) مثلها مثل قافية ( آله )
مثل
اشتكا له - يعنا له - ارتكا له - و إلخ


القافية واقفة على حرفين اللي هي ( له ) و الباقية تتحرك .!

يعني المفروض فالقافية الأولى - تكون الكلمة واحدة
مثل :

طويله - جميله - فضيلة - نيله - إلخ




و في الختام :

أخي الشاعر
انتبه لا تطيح في شبيهات القافية و خلك ذيب .!

4- انتبه من التقارب الصوتي للقوافي .!


هناك قوافي للأبيات متقاربه جدا" في الصدر والعجز
و يكون صوتها متقارب ولا فيها اختلاف الا حرف واحد قبل الأخير .!

مثال :

ذابت عيوني في عيون الأصيلة ---- وكتبت فيها ألف بيت و قصيدة

و الملاحظ هنا
ان كلمة ( اصيلة ) قريبة من كلمة ( قصيدة ) في النطق و الصوت و لا يوجد هناك اختلاف الا في الحرف القبل اخير وهو اللام اصبح دال .!


و في الختام :

اخي الشاعر
انتبه للقوافي زين و لا تكتب كل ما يطري عليك بدون تركيز .!

ياهلا والله بالذيب / غالــب
انتهزها فرصه لأبارك لك زاجك وأسأل الله أن يجعله من الزواجات
الموفقه ، والخاليه من كل مايخالف الشرع المطهّر والسنه القويمه
لكي تمتد بركته وسعادته مدى الحياه . .


الحقيقه خطوات في غاية الأهميه يابوعبدالله

لكن أول خطوه مانيب معك فيها !

لأن العنوان تقول " كيف تكون شاعراً مبدعاً "

" وترى " لوقالها الشاعر ما نقّصت إبداعه بدليل قول بركات :
واعلم ترى مكه ولاها بناخيك
ــــــــــــــــــــــــــــــــــ لو تطلبه خمسه ملاليم ما أعطاك


والزلامي يقول :
ترى حياة الفتى مهما قوى باسه
ــــــــــــــــــــــــــــــــــــــ محفوفةٍ بالخطر والموت تابعها

هل هذين الرمزين غير مبدعين ؟؟؟

أترك الإجابه لك ، وللمتابعين ..

كانك بتغير آخر كلمه في العنوان إلى " متجدداً " فهو أقرب

وهذه كلها ماغار وجهة نظر قد تكون للخطأ أقرب منها للصواب

وألاّ أنت مافي إبداعك كلام شعراً ونثراً وأستاذ شعر ونقد بدون مجامله


تقبّل سلامي

ايه ايه نسيت اقول لك


الحين البيت اللي استدليت به انت على عدم ضرورة ترى

لو شلناها مايختل الوزن ؟

كيف تقول وش جابها ؟

يعني مايحتاج نعوض عنها كلمه ..


..

ارحب يابو عتيق و الله يبارك فيك و يجزاك خير و عقبال ما تاخذ الثانية ان شاء الله
بالنسبة لملاحظتك فهي في محلها
انا اقصد ( ترى ) الزائدة اللي تجي فقط لتكملة الوزن
اما بالنسبة للمثالين اللي طرحتها فهي ( ترى ) اصلية من الجملة ماهي زايده
هذا اللي حبيت اوضحه طال عمرك ..
ويسعدني شهادتك و انت من الناس اللي يسرني تواجدهم و متابعتهم
ألف شكر يابو عتيق




5- إلعب بالقوافي بالمد و القصر .!

من أفضل القوافي اللي تجذب المستمع و اللي لها في رنـّـة القصيدة
هي اللي تكون متضادة يعني اذا كان الصدر كلمة قصيرة يكون العجز كلمه ممدوده

مثال :

اذا كان صدر البيت على ( إيره - إيله - أوره - ..... إلخ )
مثل : قصيرة - طويلة - سوره أو اي كلمة اخرى على هذا النهج

من ( الأفضل ) يكون العجز ممدود طويل
يعني يكون على ( آها - آلي - آمي - آدي ..... إلخ )
مثل ( مزاياها - آمالي - آلامي - هادي )


أو العكس يعني اذا كان الصدر ممدود يكون العجز قصير المهم ان الصوت له رنّة
و موسيقى واضحة



مثال :

يا وجودي و الله الهاااااااااادي .... وجد ابن شوية على نوره


أو مثل قول ابن جدلان :

عطتني عزلة اخلاصي معك نسيان من نادمت --- كتبتك و انطوت صحفي عليك و جفت اقلامي

الملاحظ ان الصدر على ( أمت ) اما العجز كان ممدود على ( آآآآمي )
وعلى هذا المنوال



لأن القصائد اللي يكون صوتها متقارب حتى وان كانت مختلفة مثل ( آآمي ) و العجز على ( آآها )
تكون اقل من المستوى حتى وان كانت كلماتها و صورها مميزة ..


وفي الختام :

أخي الشاعر حاول ان تفرق بين اصوات القوافي من ناحية المد و القصر

6- الشدّة و ما أدراك ما الشدّة ..

من أجمل القوافي اللي سمعتها و يسمعها المستمع هي البيت اللي يكون ممدود الصدر و العجز يكون مشدد الحرف القبل الأخير .!

يعني الكلمة اللي مشدد الحرف اللي قبل الأخير مثل ( جدّه / شرّه / همـّه / ربـّـه / ..... إلخ )


يعني يكون الصدر على ( أووور - ايييييب - آآآآه- آني - اوووم ) و يكون العجز مشدد الحرف ما قبل الأخير


مثال :
قول سلطان الهاجري :
الا يا رفيقي و الله انه عداك اللوووووم ---- و انا اللي علي اللوم في ذمتي ذمـّـه


او قصيدة ضيدان بن قضعان :
حزين اي و الله ان قلبي حزين و خاطري مكسووووور -- لو أضحك و آتظاهر بالسعادة يا بحر جدّه

وقول بخوت المرية :
وجودي على بيت الشعر عقب بيت الطين --- وجودي على شـوف المغاتيـر منثـرّه

وهكذا
فالشدّه لها وقع جميل وصوت سماعي رنان



و في الختام :

أخي الشاعر الشدّه لها جمال و روعة تضيف للقصيدة جمال آخر و لكن انتبه تروح قصايدك كلها شدّات

7- لا تعسف القوافي عشان تركبها بالغصب .!

الملاحظ عند بعض الشعار انهم يحاولون الخروج عن المألوف و هذا شيء جميل ولكن الخطأ هو ( الفلسفه ) اللي مالها سنع .!


يعني مثلا" :


ارحميني لا تخليني كذيّا ...
ـــــــــــــــــــــ يا هواي وياغلاي و ياعذابي

كل شيء قابله الا الأذيّا ..
ـــــــــــــــــــــ قافل من دونها قلبي و بابي




يعني انا اجتهدت في البيت الاول و جبت قافية ( ايّا ) لأنها مميزه و خفيفه
و فيها صعوبه تعطي القصيده فخامه و رنّة ممتازه

لكني ( خربتها ) في البيت الثاني بإختراعي لكلمة ( أذيّا )
لأن الكلمة اصلها ( أذيـّـه ) اما ( اذيـّـا ) هذي معسوفه عسف مهوب صاحي عشان تمشي مع القافية ..


في الختام :

عزيزي الشاعر ان ما قدرت على القوافي الصعبة لا تفلسف الله يرحم ابوك .