. , عليــت . .

اعتذر عن الغياب

ولكن مافي قلبي تجاهكم يقزّم عذري . ,



يا جديد العهد ولا قديم الزمان
لو تموت الاماني في عيوني حييت


كان لليل فعيون المحبين شان
ما تركت المسا يسهر معاي ، وسريت


ودام باقي فقلبك للمشاعر مكان
مر شوقي على دربك متى ما فضيت


لا تعلقه في رجوى الهقاوي عشان
ما تناسى وصالك ، دامني ما نسيت


منت ناقص وفا ، وانا نقصني الامان
ليه تشكي من اهمالي ، وانا ما شكيت


المعاذير لو ربي عطاها لسان
من كثر ما تجي منك تقول : . . استحيت


عف وجه الموده من كفوف الحنان
واسبل الدمع ويعيش الغلا لا بكيت


وان تعثر مسير الحب ( كبوة حصان )
اجبر احساسه بكلمه ، وقله عليت


ولو نزل من قلوب الناس قدره وهان
له بيوت الشعر يسكن بها بيت بيت


لنت !، ولا شعور الحب ب/الحب لان
وابتدا قلبك يعرف الوصل ، وابتديت


تعشق ، ونظرة العشق بعيونك تبان
كل ما سولفو فيني عليك وطريت


وكل ما مال عودك ، وازعل الخيزران
كن شرد الهبايب تدفعك لا مشيت


بلّغ الحزن كل الشكر والامتنان
يوم ساقك على درب المحبه وجيت


.

.