((.. وش الطاري ..))

السلام عليكم ..

اعزائي .. تحية عطره

بصراحه دوخني .. علي مبارك .. !!

يقول أنت مقل في الغزل .. والاعتراف بالحق فضيله ..

أني ما اجيده .. لكن عشان اللي احبه (( علي )) ..

كتبت في اللي ما احبه .. (( ........ ))

واتمنى ان تصل الى ذائقتكم الكريمه ..

:::::::::::::::::::::

[poem=font="Arial,4,black,bold,normal" bkcolor="transparent" bkimage="" border="none,4,gray" type=2 line=1 align=center use=ex num="0,black"]
وش الطاري عقب ذاك الغياب اتدوّر اخباري = وانا اللي ما نسيتك يوم وأنت مضيّع ٍ دربي

غريبه كيف حن القلب جابك وأنت متواري = وأنا اللي اشفق لْشوفك واخيلك دايم بقربي

طعنت القلب بسهوم الهجر ما عندك اعذاري = وبعد طعن المشاعر من صدودك جيت تشعربي

نسيت الحب في لحظه ولا لك بالوصل طاري = وأنا اللي اذكرك لا هبّ نسناس الهوى غربي

نسيت احلى ليالينا وأنا ابدع فيك الأشعاري = وأجر الصوت من شانك وقلبك بالهوى طربي

تذكّر يوم تتغلى وألدْ بعينك انظاري = تذكّر يوم تحلف لي بأنك حيل تفخربي

تذكّر يوم تزعلني وتشعل بالحشا ناري = تذكّر كيف في غيابك اذوق الهم والكربي

تذكّر يوم ترضيني وتمسح دمعي الجاري = تذكّر يوم اسامح كل زلاتك وتغدربي

عقب هذا تبي ترجع واعيد الهم في داري = انا ماني على كيفك تواصلني وتقصربي

كفايه ما جرالي في الغياب ورحلة اسفاري = تخاويني هموم الكون في زادي وفي شربي

اقول ارحل وخذ حبّي معك نصب ٍ وتذكاري = وببحر بك وسط غبّة بحر من قبل تبحربي

ابيك تذوق معنى الهم وآخذ بالهوى ثاري = ابيك تحس في طعم الهزيمه من سبب حربي

وكريم اللي خلق غيرك يبدّل وضعي الجاري = يعوّضني بديلك شخص صادق صدق يشعربي[/poem]

:::::::::::::::::::::

وسلامتك

اخوكم .. حسن بن علي الهاجري