24 ÷ 5

السلام عليكم ،


صباح / مساء ـ الخير


فكره طرت علي

هي اليوم ينقسم خمس فترات في اربع وعشرين ساعه

وين نقضيها وكيف نقضيها ووش الاماكن الي نرتادها بشكل يومي بالمختصر ماهو روتينك ؟


اتمنى من كل عضو ان يعطينا روتين يومه


بس << مايعرف يسولف

السلام عليكم ورحمة الله وبركاته

كيف الحال يا عفاس ومشعلومك

موضوع يبغاله رواقه لكن ....

اببتدي بالله ونعمٍٍ بالله


انا يا محاتسيك اصحى على الصلاة ثم ارجع اغط لين الساعه 6,30

ثم اروح الكليه لغاية العصر ومن بعد العصر ياتلقاني مع الدب ابو على (طبعا في كفي)

او اروح الاصطبل واتكي لين بالليل وكل يوم على هذه الموال

على طاري ما تعرف تسولف ياعفاس

اقول لك حلاة السوالف مختصره ،، الا في المشاعر والتعبير عنها


أما عن برنامجي اليومي ، فحقيقه مالي برنامج ،، يا نوم يا دوام يا كمبيوتر يا قراءه يا طلعه لبحر ولا بر أو مقهى ولا مطعم مع احد الاصدقاء أو بعض النشاطات الاجتماعية ، وهي قليلة على العموم ,،،،، وكل ما سبق ماله ترتيب ،، يعني لخبطه بلخبطه ،، بس الشهاده لله وناسه




تحياتي/حامد

يامرحبا ياعفاس


افكارك حلوة


بالنسبه لروتيني اليومي خصوصاً هذه الأيام


اصحى الصباح وأودي الورعان للمدارس وبعدين اروح افطر <<< ( أتريّق بالكويتي )


وبعدين اروح للأستراحه وأصحي العامل من النوم وأصفقه ليه ما ولعت الفحم وليه .. وليه ..
وأضبط القهوه والشاهي وافتح النت لين يجوني الشله اللي مفركين من دواماتهم ونسولف لين الظهر وبعدين اروح اجيب الورعان من المدارس واروح للبيت ارقد

والمغرب اتقهوى عند الشايب في البيت وأطلع للأستراحه لين تجي الساعه 1 وارجع للبيت



روتين ممل صح <<< بس والله اني مستانس

ياحبي لك ولمواضيعك ياعفاس


من الفجر لا الظهر :
دوام ( ولا مانع من زرقة المذكور ) .
من الظهر لا العصر :
نوم ( ولا أداني الازعاج في الوقت هذا ) .
من العصر لا المغرب :
حدا هالأمور :
*أسيّر على شايب ٍ عنده جلسه كل عصريّه _لا صار موجود_ يجتمع فيها دهاة جيله
ويناقشون حتى قضية ماكين وأوباما ما يصلح لهم الا منبر من لا منبر له
*أروح للابل وعاد جوّها غير .
*اشغل الموتر وفيه شايبٍ من الجماعه متقاعد ما نخلي ديره .
من المغرب لا بعد العشاء بساعه :
جلسه مير مع شباب والا مع شيبان ما تفرق .
من بعدها لا نصف الليل :
انترنت أو قراءه أو متابعة ام بي سي أكشن .

ها ثم أحط راسي لين يذ ّن شايب ٍ من الجماعه وأصبحنا وأصبح الملك لله




طبعا النظام أعلاه لا ينطبق على ( الخميس والجمعه )

لها نظامها الخاص <---- ما هو بمعلّم ٍ به

هلا والله ياعفاس

وفكره حلوه

اما البرنامج يخلف الله

دوااام من الصباح الى الساعه (2)الظهر ومن بعدها الغدا اليا العصر <<< احم احم
ثم نوم ليا المغرب وبعد المغرب القهوه والسوالف ليا العشاء ثم بعد العشاء كم زرقه يمنةٍ ويسره ليا
(11) ثم على الاستراحه ليا (2) ليلاً

لاتعلم السواط ينكبني

أما أنا فوالله ياعفاس

مامن برنامج , تقدر تقول فوضوي

لأني أفتقد للقاعده الاساسية وهي ( الوظيفة ) <<< اللي يقدر يساعده لا يقصّر يكسر الخاطر

والنوم مره مع ( قوم صبح ) ومره مع ( قوم ليل ) ..

موضوع جميل يا غالينا ..

ياسلام .. ياسلام


والله يالربع اني ودي اعلمكم بالصحيح لكن خايف من ( الدب ) يكشف المستور


المهم .

ابا ابدا من العصر >>> قومته من النوم

من بعد الصلاه جلسه مع الشياب الله يحفظهم وسوالف . يعني اخبار منوّعه الا ليا جانا

واحد من الربع عاد جتك العلوم بالتفصيل ومقولته المشهور ( علوم اخبار شي ٍ ماسمعناه

علم ٍ نشرب الماء علاه ) انتهى كلامه

هذي الجلسه شبه يوميه الى قبل صلاة المغرب . بعد الصلاه جلسه فالبيت الى بعد العشاء

بساعه . . ثم لاتنشدون جاء وقت الاستراحه الى حوالي الساعه ( 3 ) سوالف وطقطقه

على النت .. بعدها عوده للبيت واصلي الفجر واحط راسي وتصبحون على خير

>>> فيه اشياء ماعلّمبها ذكي


هذا اللي عندي وانشدوا غلاب

مالي جدول معين
بس اغلب الاوقات على النت
واذا ماكنت فالمرقاب .. اتمشى بقوقل
او ادق سلف واسير على عيال الجماعه والربع
والنوم .. متى ماجاني رقدت ،
بالعربي جدول مش حالك

هلا وغلا ياعفّاس ..

أمّا عن البرنامج اليومي فروتين بدء وإعاااده

من صلاة الفجر دوااام ..يبدأ بتوزيع الاولاد على المدارس ..والذهاب للمدرسة ومجاهدة الطلاّب ..ولامانع من بعض الزرقات للفطور وملحقاااته

والظهر عوده للبيت ..وغداء ونوم ..وأحيان مامن نوووم ..
بعدصلاة العصر براااد شاهي عليك أشكي ..وتصفح انترنت

من المغرب للعشاء متابعة التلفاز من الساحه ..للصحراء ..للمرقاب حتى صلاةالعشاء ..


مابعد صلاة العشاء أنترنت لمدة ساعه ..ساعتين بالكثير ..

وأتعشى المقسوووم وأرقد ..

أمّا الخميس والجمعه..فليس لهاجدول معيّن ..

بس والله مرتاااح على كذا والحمدلله

لاهنت على مواضيع الحلوه ياعفّاس

والله يا بو محمد

انا نظامي خاص جدأً ومحسوب بالدقيقه الله لا يبلانا
طبعا من بعد صلاة الفجر لين قبل المغرب دوام والدوام لله

طبعا الطريق ياخذ ساعه رايح وساعه رادّ حسب بعض الروايات

ومن بعد المغرب لين الساعه وحده فتره غير محددة المعالم

يعني يا نت يا زيارات يا نشوف ربعنا المرقابيين وين الله مجمعهم ونهجم عليهم

يتخللها العشاء والذي منّه

ثم استسلم للمخده للفجر

يعني اليوم حسب معادلتي 24 ÷ 2

وسلامتك ومشكور على الموضوع الرايق

عفاس :_

موضوع جميل جدا جدا ..

بالنسبه للوقت .. عندي .. فوضوي بقوة .. حتى الدوام .. يوم تلقاني .. مداوم بدري ويوم متأخر .. وعلوم .. مصلحه ..

ولا يترتب الوقت .. عندي الا في الصيف .. تخبر الشيبان يرتبون اللي مايترتب
..
.


برايفت .. لـ .. ابو راكان ..(( 24 ÷ 2 )) .. هذي على الجرح .. صح 100 %

,

هلا ابو العفس موضوع زوين .. شكلك فيه ناس تحرص عليهم ودك تعرف مواعيد دخولهم النت


المهم عن نفسي فوضوي الى درجة ان شعر راسي ابطي ماحطيت علاه شامبوا ولاكديّته هههههه<< وش دخلها ذي ..


لاني في احدى المدارس المسائيه يبدأ العمل من بعد العصر الى ماقبل العشاء ..

ومن ثم مرور على البيت طبعا ما امر ويديني فاضيه <<

بعد العاشره مساء ادق سلف وعلى الاستراحه حيث المرح والعاب العيد المتواصله والشيشه حقت محمد رشيد لونها فضي ههههه(ايقونة دب على مزيّكه )

الى ان تصل الساعه الى الثالثه تقريبا ومن ثم الى البيت لاداء الواجبات المنزليه اللتي لاتؤجل ومن ثم صلاة الفجر ونوم الى الظهر وصلاه ونوم الى العصر وهكذا .

اما الخميس والجمعه خوي الماشي (بر بحر جو )

.


أولا : تسلم على هالموضوع الحلو يا حلو

ثانيا :

من تطلع لين تغيب وأنا مداوم ، ارجع البيت عقب المغرب واتلـّين فالبيت لصلاة العشاء

بعدها اطلع اقضي لي كم شغله ، بعد كذا ان ما رحت للعيال والا جلست على النت وليا جات الساعه 2 رقدت

أما الخميس والجمعة : اهج للبر

وسلامك

.

المشاركة الأصلية كتبت بواسطة المسرّي

ياحبي لك ولمواضيعك ياعفاس


من الفجر لا الظهر :
دوام ( ولا مانع من زرقة المذكور ) .
من الظهر لا العصر :
نوم ( ولا أداني الازعاج في الوقت هذا ) .
من العصر لا المغرب :
حدا هالأمور :
*أسيّر على شايب ٍ عنده جلسه كل عصريّه _لا صار موجود_ يجتمع فيها دهاة جيله
ويناقشون حتى قضية ماكين وأوباما ما يصلح لهم الا منبر من لا منبر له
*أروح للابل وعاد جوّها غير .
*اشغل الموتر وفيه شايبٍ من الجماعه متقاعد ما نخلي ديره .
من المغرب لا بعد العشاء بساعه :
جلسه مير مع شباب والا مع شيبان ما تفرق .
من بعدها لا نصف الليل :
انترنت أو قراءه أو متابعة ام بي سي أكشن .

ها ثم أحط راسي لين يذ ّن شايب ٍ من الجماعه وأصبحنا وأصبح الملك لله




طبعا النظام أعلاه لا ينطبق على ( الخميس والجمعه )

لها نظامها الخاص <---- ما هو بمعلّم ٍ به

ههههههههههههههههههههههه
الله يقطع ابليسك يـ (( المسرّي )) ..
نظامك (( شيابي )) ماهو شبابي .. !!
عموماً الشيّاب الخير والبركة ..

بس أم بي سي أكشن .. شغله غريبة ..
لأنها تتنافى مع قواعد روتينك اليومي اللي أحس انه (( أبيض واسود )) .. !!

:
:


(( ابو العفس ))
بالنسبة لـ (( يومي )) فهو (( يومي )) بشليله ..
ومبرمج على الطارف .. !!


لي عودة .. لتفصيل (( الطوارف )) .. !!
كل الشكر لك .. على فتح النافذة الفضائحية الجميلة .. !!

حياك الله ياعفاس ...............








على العموم .............. ماهناك برنامج محدد ولكن ابي اعطيك الغالب الي يصير معي يومياً




اصلي الفجر وبعد الصلاه القا الفطور زاهب اخذ منه المقسوم واروح للمدرسه .......... الين الساعه الواحده والنصف .................

ارجع للبيت القاء الغدا جاهز اخذ منه المقسوم (اغط) ( تعسيله ) الى العصر


اروح للحلال حق العود <<<<=== ياخذ ذبيحه لثلاجه


انتقل للبيت حق الشايب اسولف مع العجوز وابكش عليها واعرض لها قصص بطوليه عني طبعاً مع انها عارفه ان ماعندك احد بس تجاملني

بعد المغرب انتقل للبيت على النت الغالب اصلي العشاء وارجع على النت يعني ساعه

بعدها انتقل للتلفاز اتابع الأخبار في الجزيره ثم انتقل الى امبي سي تو او امبي سي اكشن

لين الساعه الواحده ثم يأيني منادياً من بعيد وهي المخده تدعاب عيني وتقول هلم اي ايه الفتى المقدام ( اذا الموضوع فيه استراحه وبلوت يخلف الله على اليوم الي بعده لأنتظر مسائلة الغياب في ما بعد )






تشاو

موضوع حلو ياعفاس


طبعا من السبت للإربعاء يكون قضاء وقتي على النحو التالي :

ليلة السبت أتوجه للفراش بكل هدوء متى ماأحسست بالحاجه للنوم .

في الصباح الباكر أصحى على صوت المنبه

أول عمل اقوم به افرش اسناني بالمعجون والفرشاه واقلم اظافري واهتم بالمنظر العام لشكلي

هناك صابونة ضد الحساسيّة وأشعة الشمس اغسل وجههي بها بعدها آخذ دش كامل والبس ملابس الدوام

تكون معطرة ونظيفة واتوجه للدوام براحتي ولاعلي من الزحمة بتاتا لأن محد يسأل ليه متأخر .

في الدوام متى مابغيت اطلع طلعت .

وجبة الافطار يجيبونها من افخم مطعم لحد مكتبي وبعدها انقش سنوني واطلع من الدوام للبيت .

. وانزل ملابسي حقت الدوام تغسل وتكوى وتعطر والبس ثوب النوم .وآخذ غفوة تقريبا نص ساعة

بعد صلاة العصر أروح للمعرض أو للشركة وبعد المغرب عند البل حتى يهجم علي النوم .

خميس وجمعة تمشية احيانا في الشرقية وأحيانا في الطايف وأبد أقرب رحلة طيران تفي بالغرض .



النت قليل ادخله حسب المزاج .

مايعكر مزاجي الا كثرت العزايم لي شخصيّا من الناس لأن وقتي مو ملكي تعرف زحمة الرياض ياعفاس







88888

888

88

8


مجرد خزعبلات لانرى أنها تمشي على أهل المرقاب



جت الحقيقة باختصار اقوم من النوم كني مقروص واوضي واصلي هذا اذا ماكنت قايم ومصلي الفجر على الوقت

وراجع نايم طبعا مايجف وجههي الا في دوار الملك عبدالعزيز

الدوام من 7 ونص الى 3 ويمكن أكثر بعد . ويجيني تلتله واحيانا اقف في الشمس لين بدلتي تابس على ظهري

ولعلمك ماتغسل الا من اسبوع لاسبوع -------------> توفير من المغسلة اللي مقطاع الشارع

ان لقيت فرصة خشيت النت من الدوام ------> سرق

ارجع للبيت وأتغدى واقعد بعد صلاة العصر في زاويتي اللي انت خابرها ياعفاس

ان جاني شغل طلعت اقضيه وان ماجاني اقعد لين انام وهكذا حتى يوم الاربعاء امسك خط ليله الخميس

وليلة السبت راجع للرياض .

خميس وجمعة خارج نطاق التغطية


لاهنت ياأبو العفس

المشاركة الأصلية كتبت بواسطة نواف نايف

في الصباح الباكر أصحى على صوت المنبه

أول عمل اقوم به افرش اسناني بالمعجون والفرشاه واقلم اظافري واهتم بالمنظر العام لشكلي

هناك صابونة ضد الحساسيّة وأشعة الشمس اغسل وجههي بها بعدها آخذ دش كامل والبس ملابس الدوام

هههههههههههههههههههههههههههه

لايكون المنبه (( طيور كناري )) بس .. !!
لا وتفرش (( أسنانك )) .. !! وأنت مامعك (( المحتسة )) .. !!

ههههههههههههههههههههههههههه
وتقلم أظافرك .. وش هالأظافر اللي تقلم كل يوم .. !!
وصابونة ضد الحساسية يـ (( نواف )) .. !!
منين تجيك الحساسية .. وكيف يجي مفعول الصابونة ..
وأنت طبقات جلدك من قوها بتنقلب (( حراشف )) .. !!
رح ولا عاد تعلم الناس بـ (( حلومك )) .. !!


عفاس ..
لا عاد (( تضغط )) على الربع ترا البيوت (( أزرار )) .. !!

هلا ابو العفس

والله وقتي طوال الاسبوع
من الجمعه ليا الجمعه

نوم بعد صلاة الفجر لين الساعه 12

من الساعه 12 لين يذن العصر على النت وفيها فترة غذا 10 دقايق

بعد صلاة العصر لين يذن المغرب عند ابو سند مقحم دحيم فالاستراحه لين اذان المغرب
بعد المغرب الى العشاء دوريت الشيبان

بعد العشاء الى الساعه 2 فالاستراحه
العب بنت سبت وليا هزموني
شغلت اللاب توب وقمت احوص فالمرقاب لان يجي دوري

وهذا جدولي الله يجزاك خير

اكيد منظم ومحترم

الا فيه يوم يلخبط جدولي خخخ

اول يوم اربعاء من كل شهر
اصلي الفجر اسوقها للقصيم
احضر عند الامير اوريه وجهي ورجع لعفيف العصر

على عموم الحنشل

لا تحتكون فيه موضوع عفاس واللي يرد علي هو

ناس ملقف ----------> يبتسي

موضوع مميز


اما بالنسبه لمحاكيك


من صلاة الفجر الى الساعه 1 ظهرا (التهيئة للدوام والدوام)


من بعد 1 الى العصر( اخذلي اغماضه زانه )


من بعد العصر الى المغرب( تخليص بعض المصالح التي قد تنتج من الامور الفسيولوجيه للظروف )شلولخ (اتحداك تقولها يانواف ثلاث مرات)



من المغرب الى العشاء في البيت والتقهوي مع الشايب احيانا اذا كان موجود



من بعد العشاء الى الساعه 12 في الاستراحة مع الشباب ومن ثم العودة الى البيت