قصيدة رائعة (معاناة شاب) للشاعر الغيداني

السلام عليكم ورحمة الله وبركاته


اخواني في منتديات المرقاب، عندما يقع في يدي نص جميل فإنني أول ما اتذكر أنتم فآتي مسرعاً لإطلاعكم عليه، راجيا أن يعجبكم،

قصيدة للشاعر مساعد بن عبدالرحمن بن سماح الغيداني: [poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black"]

البارح ما نامت عيني عندي تفكير مجزيني = عمري وصل الثلاثيني وانا في حالٍ يرثا له

افكر وش دبرة بكره واشد الفكرة بالفكرة = وقامت تمشي تفاكيري تقل في رحلة رحاله

ابا العرس و ماشابه له وانا اللي بلشانٍ باهله = اصرف على امي واخواني والحاله ياعالم حاله

وانا اللي كنت آقف واقعد وابذل جهدي من شان اسعد = من يوم اني كنت صغير رجـّال ياكبر آماله

بعد انهيت الثانوية بنسبة تسعين بمية = رحت ابحث لي عن وظيفه والوقت احسب بلياله

وعقب اربع مدري ثلاثه وانا بجهودٍ حثاثه = وعقب اتعبني سوق الخضره وجربت اعمال البقاله

بالف وخمسميه مكدودي ما حسب لعيب ومنقودي = المهم اوفر مصرف ماحب اليد البطاله

جتني واسطةٍ قوية من رفيق قريّب ليّه = وسجلني جندي ياجعله ربي بالحسنه يجزا له

ثم قلت ان الحاله زانت واللي صعبت قدمي هانت = ابشري سيارة زينه والناقص ياهون كماله

واخذت سنيات حالي لاباس ابها عال العالي= ويوم اني بغيت افتح والعالم يزيد هباله

واللي رخيص اصبح غالي والميه ماتسوى ريالي = الاسعار اضحت مجنونه عوّد حالي في مواله

حتى امي باعت معزاها بعد بذ الله خفاها = ماعاد تخارجها مره غلي الحب وغلي نخاله

والرز اللي سعره ميّه في ثلاثميه عليه = كلش زايد ويش نعدد والتاجر طفف مكياله

وانا عاد ادير افكاري في وضعي والله محتاري= ابى اجمـع وابني لي مسكن خاطب بنت اللي يعنا له

وقمت انشد وابغى مقاول جيت اللي فيه متفاول = قال انا اضبط لك فـلّـه والرجل يوسع منزاله

وطلع ليه خوش مخطط في رسمه بالحيل مضبط = يقول احسن ماسوينا دورين ومفتوح الصاله

قلت اسمعني كم يكلف وقام يوكد لي ويحلف = مالك غير اللي يخلص لك ويغني على مواله

قلت ابي اعرف قبل ابداها قدام ابلش عند اتلاها = وتسحبني عند الشرطه وتصير العمله بطاله

وقام يطالع فيّ و شــوّش قال انته وش كثر محــوّش = قلت ابى ابيع السيارة واخذ لي قرض بكفاله

ووطى اقلامه فوق الماصه تقل مضروب برصاصه = وقال انا ادري مابك عيشه وقـوّم من عندي عمّاله

وقت اسمعني قال انت اسمع اللي مثلك مابه مطمع = لو بعت الموتر مع قرضك ماجبت الحديد لحاله

ثم قلت ابا استاجر شقه كلٍ مني ياخذ حقه = ومريت المكتب قال ابشر الرجال يخدمه ماله

عندي شقه في عشرينِِي مضبوطه تاخذ شخصيني = حضـّـر عشره ثم أثــثّــها ترى كلٍ يبغاها له

تبغى اثاث باربعيني مع عشره صارت خمسيني = لان القرض مخلص فيها وبكره عرسي وش يبقا له

ورحت لعمي قلت اسمح لي جـوّز بنتك ماتصلح لي = ماهو والله عيبٍ فيها لكن اوضاعي مـيـّاله

الا انك تبغى تتنازل والمهر تخليه بنازل = وتساعدني في ميسورك والرجل الطاله تبقى له

قال اقول اذلف ماعندي لو اجوز واحد هندي = بنتي ماهي رخيصه لاجلك ثم تناولني بعقاله

ومرت حول السنتيني وانا عزوبي مسكيني = وبنته لا هلحينه عانس وهوه يطرد خلف رياله

هذا واقع غيري عاشه اللي ما سده معاشه = وشلون اللي ماله مره وعلى غيره صاير عاله

شكوانا نرفعها لله ثم لابو متعب عبد الله = اللي خيره دايم سابق ويعاملنا مثل عياله

وولي العهد اللي خيره تنعم به ناسٍ كثيره = وحنا ترى بخير ونعمه أمان وكلٍ في حاله

نبي نسوي مثل الناسي مانشمي على المقاسي= غصب علينا سايرنا اللي ماله سواها له

نحمل حمل ما نطاقه والراس يحلقه حلاقه = ونبلش بالدين وديانه لاقام يدقدق جواله

مشكلةِ تبغى حلالي مايقواها غير رجالي = والحياة بليا عاقل يخلفها الوقت وجهاله

لو كلٍ يمشي بظروفه مالحق الرجال حفوفه = كـيّـف نفسه حسب اوضاعه والدنيا ماهي بطواله

وختام القول المعقولي صلاةٍ على الرسولي = اللي بشرنا وانذرنا من يوم ياكبر اهواله[/poem]

وعليكم السلام ورحمة الله وبركاته


وحي الله محمــد




الحقيقه انك من اهل الوفاء يابوسعود ،


ومشكور على جهودك في مرقابك


اما القصيده هذه فهي كما تفضلت جميله ، وبحرها أجمل ،
<- زي بحر تكفى تكفى تكفى تكفى .


سلمت وسلم الشاعر الشاب / ابن سماح ..

سلام’ عليكم

اللهم صلي وسلم على نبينا محمد وعلى آله وصحبه آجمعين

وعليكم السلام ورحمة الله وبركاته
هلا اخوي محمد
الف شكر على هالنقل الرائع
وصح لسان الشاعر مساعد الغيداني

محمد البيضاني





لاهنت

صح لسانه ولاهنت على النقل