أنا اشهـد إني برحب لا (خطبتيني)..!

الشاعر دبيّان بن عساف (ت 1404هـ) رحمه الله أحد شعراء "سبيع" الكبار
له الكثير من القصائد والمقطوعات الجميلة، اخترت لكم بعضاً منها عسى أن تنال إعجابكم:

في أحد الأعياد مازحته إحدى الفتيات -وكان قد تقدم في السن- قائلة له: "ما ودّك أخطبك يابو عساف"، فقال:

أنا أشهد إني برحب لا خطبتيني
وأزيد ترحيبتي بألفين ترحيبه
وأنا أشهد إني ببيشن لي خذيتيني
كما يبيشن عقيدٍ فاز بكسيبه
تخطي يديّه عصايه لا نطحتيني
شوفة عيووونك مصيبه وأكبر مصيبه!

ويقول أيضاً:

باديٍ في راس عيطا وآتطلع
كل بوشٍ تهايف لي ارقابه
كل ما شفت لي نشرٍ تهلّع
قلت ذا نشر أهل جالي اعذابه
ول وليت يالقلب المولّع
عذب العين من سبّة ذهابه
عادته يم الأقصين يتقلّع
وطب الأدنين ما يبري صوابه!

ويقول كذلك:

عسى السحاب اللي نصوبه مراديف
جعله على جو "الحفر" ينتثر ماه
وعسى الحفر بد الليالي يجي ريف
من ماقف الطيّه إلى راس مظماه
حتى ليا جاء نقضة الجزو بالصيف
ثم ورّدوه سبيع معهم وردناه
مدهال ترفات البني المواليف
كم من هنوفٍ وقّفت فوق مسقاه
وقد وقّفت رجلي بجوّه مواقيف
ولولا مجوزة خاطري ما حمدناه

والأبيات التالية من قصيدة قالها عندما كان بعيداً عن مواطن قبيلته:

متى بيقضي الله لزوم المعازيب
ومتى بيشمل جيشنا عقب الاجناب
ومتى نشوف ديارنا عقب تغريب
ومتى نشوف شفوف ولهين الأحباب
ومتى نشوف مكثرين التراحيب
اللي مشافيقٍ على شوف غيّاب
ومتى نشوف أقطاع شقحٍ حنازيب
طياحهن قِدم المقاهير هرّاب
ومتى نشوف مترّفات الرعابيب
اللي يبصيبن المولع بالأسباب
ولولا الرجا لأقنب كما يقنب الذيب
لي جاب صوتٍ تالي الليل قنّاب
على عشيرٍ بالخفا حبه مصيب
هذا صوابه بالحشا ما بعد طاب

ومن قصيدة يمدح فيها الأمير محمد بن عبدالعزيز رحمه الله في إحدى المناسبات:

الله من صدرٍ سطابه حواسيس
من واهجٍ ساقه من الهم هوجاس
من غيبة الهيلع بعيد المراميس
اللي فعوله نايفاتٍ على الناس
الهيلع اللي لي شهر يسجد ابليس
اللي سهومه ما تجنب عن الراس
محمد منكّس هقوة الشره تنكيس
مرخص بعمره يوم الأرياق يبّاس

بعد وفاته رحمه الله رثاه عدد من الشعراء من بينهم الشاعر راشد بن جعيثن، ويقول في قصيدته:

علمٍ لفاني يا ملا هدّني هد
هدة نفودٍ سارقته الهبايب
علي هباب الحزن هب واشتد
يصلا ضميري مثل صال اللهايب
حزنت حزنٍ ما وقف له على حد
من يوم قالوا مات ريف الركايب
مرحوم يا دبيان والله يشهد
ما ناب أدور من وراها كسايب
مرحوم من قلبٍ عليك ايتوجد
لي عدو اللي ينطحون النوايب
لي قيل وين علوم جد على جد
من يقترح من قدح فكره نجايب

وسلامتكم

الله يرحمه ويغفر له
وبيض الله وجهك على نقل هذه المقاطع الجميله
لـ هذا الشاعر الكبير



لا عدمناك يا بداح !

رحمه الله رحمةٌ واسعه شاعر مدرسه وعملاق .

شكرا يابداح ولاهنت .

.

ما قرأته من شعر لا ينظمه الا الشاعر العلم

رحمه الله واحسن اليه


وبيض الله وجهك يا بو فهد ،،

..

الله الله


من الدرر هذا الاختيار يبو فهد
بيض الله وجهك وسلمت














تحيتي

الله يرحمه ويغفر له

لا هنت يابداح على النقل الطيب

الله يرحمه
ولاهنت يا بداح على النقل المميز
تقديري

لاهنت يابداح ,
رحم الله الشاعر ,
و لك التقدير الوفير , والشكر الجزيل

الله يرحمه رحمه واسعه

بصمه على مرّ الزمن


لآهنت والله

الله يرحم الشاعر ولا هنت يا بداح

تخطي يديّه عصايه لا نطحتيني
شوفة عيووونك مصيبه وأكبر مصيبه!



الله يرحمه رحمه واسعه

شاعر علم وغني عن التعريف

سلمت يابداح

الله يرحمه ويبقي راسك على طاعته

لاهنت

..

الله الله

ومتى نشوف ديارنا عقب تغريب
...............................ومتى نشوف شفوف ولهين الأحباب

,,

شاعر فذّ وجزل , رحمه الله وعفى عنه ,

بداح السبيعي

إختيار جزل وجميل , سلمت وبيّض الله وجهك ’

..

تخطي يديّه عصايه لا نطحتيني
شوفة عيووونك مصيبه وأكبر مصيبه!


رحم الله الشاعر دبيان بن عساف رحمة واسعه
شاعر غني عن التعريف

تسلم يمينك يابداح على الايراد

•

أنا أشهد إني برحب لا خطبتيني
وأزيد ترحيبتي بألفين ترحيبه

وأنا أشهد إني ببيشن لي خذيتيني
كما يبيشن عقيدٍ فاز بكسيبه

تخطي يديّه عصايه لا نطحتيني
شوفة عيووونك مصيبه وأكبر مصيبه!

الله الله الله

رحم الله الشآعر / دبيّان بن عساف

وكل الشكر لك يا بدآح

ابو فهد


ياسلالالالالام على هالاختيار..


الشاعر دبيان بن عساف من ابرز الشعراء رحمه الله واسكنه فسيح جناته


لاهنت يابو فهد على هالايراد الجميل ..


لك فائق احترامي وتقديري ...!!