( غزال ٍ ما يصيدونه ) ..!!

السلام عليكم ورحمة الله وبركاته ،

.. مراسيل العشاق تتفاوت بين الحمام الزاجل والموبايل و البريد ..

لكن هالمرَه مرسـالي " الجمس "


أتمنى أن ترتقي لذائقتكم ،


//


[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black"]
ألا ياجمس قد سرّاك مبطي بندر أبن سرور=مواري صنع الأمريكان في رزّة درقسونه
ملك كن الشبح لا مر جنبه خادم ٍ مأمور=تموت من القهر أهل اللكازس ما يطوفونه
أليا رص الأبنص وصاح لك ثم سمّعك مجرور=على لحن الربابه صافي المعنى يجرّونــه
تعصّب وأنهج الطرقه أليا شق السماء بالنور=أبيك بـ لازم ٍ تقصر خطاوي الرجل من دونه
تنحّى عن هوى الظهران وأترك من وراك الدور=وداعة من على الرحمه جميع الخلق يرجونه
وهاك الشور يا مركب هوانا وأستمع للشور=أبي تفهم رسول الحب وش خطه ومضمونه
رساله حبرها دمي تحير بـ / بحّة الحنجور=كتبت بأخر الصفحه أبي علمي تردونه
لك الله ما هنا بالي من الفرقى ثلاث شهور=يا كن بخافقي بدو ٍ .. مخيل الشام يتلونه
لك الله ما نبت وصل ٍ .. ما دام العشق أرضه بور=و لا شفت النفل يزهى ربيع الحب في لونه
لك الله ما ضوى نجم ٍ .. من نجوم الفكر ديجور=ثلاث شهور تشهد لي طيوف أرواح ملعونه
تسّريني مع الصفره شياطين الجفا و تزور=مقابر حب تسكنها جثث عشــّاق مدفونه
تقول : أن الهوى حرب ٍ مواجعها فراق و جور=تموت قلوب لا عدّت وبعض قلوب محزونه
سبب همي وغربالي و ضيقة خاطر ٍ مكسور=حبيب ٍ من ورى برزان كن الموت بعيونه
تمشى بالدلع كنه غزال بـ خايع ٍ ممطـور=يذير من العرب حشمه ولا ظني يجيبونه
غدى زينه مَـثـــَـل يطلق على غنج البنـّي الحور=يا سِعد اللي نهار العيـد وقت الصبح يـاتونه
يهز الروح لا هز الكتوف من الطرب مسرور=أذا غنوا لها العالم ( غزال ٍ ما يصيدونه )
لفح شعره على ظهره وعانقه الحلا بـ غرور=وقام من الحيا بمخضّب ٍ يلعب على هونـه
وأنا حالي معه قشرا وحظي ماعليه قصور=وانا ذنبي الوحيد إني غديت بحب مزيونه
ألا ياجمس لا شفته أبيك تقول له : مشكور=نعم مشكور .. ياخل ٍ نسى منهم يحبونـه[/poem]


//