((( شديد المصاب ))) المصافحه الثانيه

[align=center].. السلام عليكم ورحمة الله وبركاته .. وكل عام والجميع بخير وأعاد الله علينا شهر رمضان أعواماً عديده ..

صلوا على النبي ..
فُجعت قبل أسابيع بوفاة أعز المقربين لدي إبن عمي / فهد بن عبيد والذي لم يمهله القدر حتى يبلغ رمضان هذا العام
أثر حادث مروري أليم وكان الخبر كاالصاعقه ولم أتمالك نفسي حين سيطر علي غمام الحزن الذي أحرمني طعم المنام ولذة الطعام ولكن بقلبٍ مؤمن وصابر تسلّحت باالدعاء له والإحتساب أمام إبتلاءات الحياة , وكان للشعر النصيب الاكبر وكان المتنفس الوحيد لخروجي من هذه الصدمه . وإليكم هذه الأبيات أرجو ان تنال على بعضٍ من الرضا والقبول :[/align]



[poem=font="Arial,6,darkred,bold,normal" bkcolor="transparent" bkimage="" border="groove,4,black" type=1 line=0 align=center use=ex num="0,black"]
البارح أشوف نومي عن عيوني سراب = زبون سجّان ضيقه ماذكِر باالصدور
مافاع من غب جاشي غير زفرة عذاب = ولا ضاف قفر المحاجر كود دمعة صبور
مستصغر البيد مستكثر عليّ الشباب = مابين ربشة عماوي . وإلتفات امغدور
والعزم يابري حالي من علاويه ذاب = ماصدّر إلا وآنا فاالقاع مثل الجزور
آطوّح الصوت . مثل مصوّبات الذياب = ماآنلام مفجوع . والمفجوع مسبي شعور
آحّاه وآحّاه ياشلفا شديد المصاب = مافوق جاير نزوله . من قديم العصور
مصاب موت الفقيد اللي غيابه . غياب = فجوة فضا مايغطّيها عيال الظهور
مثل إستحالة عمار الدار فوق السحاب = ومثل إستحالة قرا العميان بين السطور
ومثل إستحالة يرّب البوم روس الهضاب = ومثل إستحالة كسير الحوض سَبْح البحور
ومثل إستحالة يريم الضبي فرخ العقاب = ومثل إستحالة غشيم الطب جبر الكسور
ذاك القريب الحبيب الخَلق . دمث الجناب = اللي مناشيه من ماكر فريد الصقور
اللي من الدين مافاخَت دليل الكتاب = والسنّة اللي ضياها مامحتْه الدهور
سيف ن عن الحق يِشهَر مايعرف الجراب = وفي قلب قوّام ليل . وصوم عبد ن شكور
وآرحم بمن نادمه عن حنوَة أم الخضاب = على غرير ن معَدّ أيامه أربع شهور
يصخى بنفسه مدد لو طلبة ن من شراب = لآنه من البِر سجّل بصمة ن ماتبور
واللي من الطيب هوماته حدود الرحاب = لو كان من وقته القاسي لحاه القصور
يركض مراكيض نطّاح الفرَص باالصعاب = مغامري عزم . لو راحت مفارس نمور
ومن العقل شوف حسّاب ن وحنكة مهاب = ومن الذرابة تبتّل حذر وإلا غيور
ومن الحميّا صعوط اللي يفك الرقاب = ومن الظفَر مخلب ن ماناش راح امخطور
وللي يخاويه ريف ن مايسوق الهباب = آرهى من العيلم الهدّاج لآم الجذور
رفاّي خملات ماقارب طروق العتاب = عقيم سود النوايا والحسد والنفور
ولاهوب لآعراض خلق الله دويني . وناب = وللسر صدره مجمّ ن ماتجيه الطيور
عز الله إني فقدته مثل فقد الصواب = في معتقل . ياصواب الرشد وإلا القبور
وياوجد قلب ن ملاه الوقت روس الحراب = لو كان صبره تدنّى مايرقّيه طور
وياالله ياخالق الأفلاك منشِ الحقاب = يافالق الحب ياواعد هل النور نور
يااللي نسبّح بحمدك والحجر والدواب = جلَ جلالك تحَكّم باالحزن والسرور
آرحم فهد رحمة ن تدخِلهْ مع كل باب = آبواب جنّة عدن يارب وأنت الغفور
في جيرتك ياالصمد والآنبيا والصحاب = وحمزه وجعفر وعبّاد ن نباهم طهور
وعوّض شباب ن تلاشى مثل موح الضباب = باالحور وآنعام وآفضال ن عليهم تدور
آدعيك من خوف قلب ن من عراويه تاب = توبة مودّع مفارق من متاع الغرور
وحنّا ودايع ودورات الليالي . ركاب = ولا دايم إلا أنت سبحانك إليك النشور
والوقت فرّة رحى . جُوداه . ريش الغراب = واعيون من يرتجي صفوُه عن الحق . عوُر [/poem]


[align=center]وسلامتكم [/align]