تغطية مصوره .. لإجتماع أعضاء المرقاب في أم رقيبه ]

قبل الدخول في إنطباعاتي عن الرحله و شيوخها...

رد للمسز دارين...
تبين الصحيح يا دارين؟؟
بدون مراوغه و بدون مقدمات.. عز الله ان الحديث و النقاشات طالت عضوات المرقاب وحده وحده..
و تم الحديث المفصـّل عن كل عضوه و الحديث عن تواجدها في المرقاب و تأثيره..
و لو المجال يسمح كان قلت كل انطباعات شيوخ الرحله عن كل عضوه .. و فيه ثـنـتـين من العضوات
كان الحديث عنهن بشكل مكثف حول تواجدهن في المرقاب و جماله... الى هنا اكتفي بالرد.. لأني لو زدت جبت العيد <<< الظاهر ما راح يجيهن النوم


نرجع الى انطباعاتي حول الرحله...

الرحله بشكها العام اكثر من رائعه... و الحقيقه ان كل زملائنا اللي حضروا انهم وافين شبور
يا زين حضورهم و يا زين خوتهم و يا زين سوالفهم و يا زين نباهم و يا زين اخلاقهم و اريحيتهم
و تواضعهم و كل امورهم من ازين و ازين ...

محمد آل عبدان...
عرفته اول ما شفته الا انه لم يعرفني.. تفاجأ بي عندما عرفته بإسمي..
فاجأني كثيراً و لم اكن اتوقعه بهذه الأريحيه و الشهامه و المروّه .. صراحه ان المخيم قايم
على الله ثم عليه هو اللي يشب النار و هو اللي يشتغل و يسوي القهوه و هو اللي يجيب
الحطب و هو اللي تولاّ امور الرحله كامله بشكل رئيسي مع العلم ان جميع الأخوه ما قصروا..
واجهته برأيي فيه ( كنت آخذ عنه صوره سيئه للغايه ) و هذا من رداي.. لكن ابو متعب كان
مثل ما ذكره لي اخي عبدالرحمن حمد سابقاً بأنه غير ما تتوقعه يا شفق.. و قلتها لابو متعب
بكل صراحه .. و اعترفت له اني كنت ما ادانيه ...لكن الرجل رجل في كل حالاته ...

فهيد بن عصيدان..
كنت حاط له صوره في بالي بأنه طويل معصقل جيكره مقلع على جنحانه
لكن لقيت لي رجل بكل ما تحمله الكلمه من معنى... دماثة الخلق و سعة البال و زين المنطوق
و رزانة العقل و لباقة الحضور و خدمته لاخوياه من شيل و حط و غيره.. خوي السعد انا اشهد..
يجبرك على احترامه غصباً عنك.. صريح جداً في أراءه حتى و ان اغضبت من امامه.. و هذه صفه
احييه عليها.. لا يجامل .. شهم بكل معاني الكلمه..


سلطان الأسيمر..
اشهد بالله انه مطلق على اسمه... هالآدمي ودي اتكلم عنه كثير لكن اخاف تحسب عليّ...
لكن و باختصار.. هذا الرجل لديه ثقه كبيره في نفسه ... عتبت عليه في نقطه واحده فقط..
و هي انه لم يواجهني بمشروهه عليّ عند مشعان سابقاً... لكن انا بطيتها قدامه و صارحته
و ذكرت له مشروهه و وضحت له وجهة نظري.. و كان له الحق في مشروهه و كان لي الحق
في ما بدر مني سابقاً.. و كنت فرحاً جداً برضاه و تفهمه لي و لوجهة نظري في احد المواضيع
التي تخصه .. جلست معه جلسة شعر عصريّه على براد شاي بحضور ابن عصيدان و ناصر
تراحيب و خالد السيحاني فقط.. و كانت عصريّة شعر غي طبيعيه.. على فكره سلطان الاسيمر
حضر للمخيم بطبيعته دون تكلف .. و هذه هي التي كسرت التكلف بيننا من اول حضور له..


فراج القرقاح...
صورتي عنه كانت في وادي و واقعه في وادي آخر... رجل خلوووووق جداً... هادئ جداً و في
ذات الوقت عصبي جداً ... يحب خدمة اخوياه بشكل كبير .. انسان بسيط جداً دون تكلف و دون
زحمه .. ترتاح للكلام معه و لسهولة التعامل معه... مستمع جيد للمتحدث.. يعطي رأيه في كلمتين
الى ثلاث كلمات فقط... شرس جداً في المحاوره .. اكثر صفه اعجبتني فيه و انعم بها من صفه هي حرصه
على الصلاه في وقتها و النداء لها و الإصرار... جزاه الله خير .... و في البلوت ما عنده يمه ارحميني



باقي الأخوه سوف يطالهم الرأي لاحقاً...



مقتطفات سريعه...

- مركز السريّع الإعلامي يفوز بلقاء طويل و حصري مع محمد آل عبدان.. يحمل العديد من المفاجآت..
- مركز السريّع الإعلامي يقوم بمفاجأه كبيره مع شيله حصريه لأحد شعراء الرحله..
- مركز السريّع الإعلامي يقتنص تصريح خطير و قوي من الشاعر غازي المغيليث...

كل ذلك ترونه قريباً في مركز السريّع الإعلامي ... كونوا معنا فنحن معكم ...

و أخيراً....
- مركز السريّع الإعلامي يفوز بتصريح رسمي من إدارة المرقاب العليا لتنفيذ أنشطته في المرقاب..
و المركز يقدم كل الشكر و التقدير للأخ ناصر تراحيب على تذليل كل العقبات التي واجهت المركز..
و إعطاء الأذن بالقيام بأنشطته تحت مظلة منتديات المرقاب كجناح إعلامي مرافق للمرقاب..