طبع بدوي

[align=center][align=center]السلام عليكم ورحمة الله وبركاته
مجرد أبيات للتواصل ، أعلم أنها متواضعه أمام درركم وأذواقكم الرفيعه ،،
أمل أن تحوز القليل من الرضاء .
صلو على النبي .[/align]


[poem=font="Simplified Arabic,5,darkred,bold,italic" bkcolor="transparent" bkimage="" border="none,4," type=2 line=0 align=center use=ex num="0,black"]
حياة روح المعنى نايد القفره = لاهجرعت في الوريد وحاجبه رفّي
خطرٍ عليها تفيض بفيضة الزفره = لا ضاق صندوقها والقلب مختفّي
كنّه يمزّع من المعلاق بالشفره = في ساعةٍ يقبل المكتوب ويقفّي
قدام عيني وأمنّي النفس بالنفره = وأقرأ عليها من الأيات وأنفّي
كني غريب الديار وحانت السفره =معاد له في البلد وأهل البلد شفّي
يازين دبّارتي في العصر والدفره = في خايعٍ من عيون الناس متخفّي
فيه الخزامى تمايل والنفل وفره = والسدر والرمث والحميّض ملتفّي
علّه من الوسم نصباً زادته طفره = على خضاره وجاء الخبيّز متجفّي
ريح الزهر فاح والحوذان له ذفره = والقاع تاوي لها من وجعة الخفّي
فيه أم سالم مع المقطاع والغفره = كنها تغني على المزمار والدفّي
أسوج الاقدام قبل الموت والثفره = على أثر سيله وغيله مابعد جفّي
وإليا أقبل الليل مانيب راعي العفره = أفرح ليا غط الارض وضفها ضفّي
ممساي في فيضته والى على حفره = لو الشفاء دايجه ماهوب متحفّي
أشب ضوّي وغالي الكيف ماخفره = أبصر بحمسه على كيفي ومن كفّي
وأستدني اللي يشادي داعي الظفره = نجرٍ ليا دن يطرب كل متعفّي
والدلّه اللي عمار بهارها الوفره = فنجالها يقعد الضرمان ويكفّي
طبع بدويٍ مانـْجرف مع عالم الطفره =على سلومه وعرق الاصل ماهفّي
أسامر النجم في ليلٍ سماه أفره = مالي ونيسٍ سواه وغاية الشفّي
جوّ الخلا والفضا والليل لي غفره =من ضيقه وهاجسٍ في الصدر تلتفّي
وإن زلّ ثلثين ليلي قمت في سفره = معَ الدعاء والصلاة ودامعي طفّي
أناجي الواحد القهار في قفره = أدعيه وأشكي عليه الحال والحفّي
يا الله ضاقت على العمده وأهل كفره = ماحيلته غير صفق الكف بالكفّي
وأنت العليم الخبير اللي نصر نفره=فزعتك عن ماسواك تكفّ وتكفّي [/poem]

حفظكم الله[/align]