سلطان ابن حامد من السين للدال

بسم الله الرحمن الرحيم

السلام عليكم جميع

بدايةً أشكر الاخ والاستاذ الشاعر مطر المرشدي على الدعوه الكريمه

وهذه اولى قصايدي هنا..




وهي مردود على رسالة الاخ مشاري بن فهد التمياط ...



[poem=font="Simplified Arabic,6,darkblue,bold,normal" bkcolor="transparent" bkimage="" border="solid,2,darkblue" type=1 line=0 align=center use=ex num="0,black""]
يا أبو فهد شفت الكتاب وقريته = وأبطيت عقب قرايته ضايق البال
لا تحسب إنّه ساعتين ونسيته = لا والذي نزّل تبارك والأنفال
شرواك لا منّه نصاني نصيته = هذا وهو شرواك يا نسل الأبطال
وش لون لاجاني سموّك وجيته = والله لأبدي لك على نايف الجال
وليا بلاني هاجسي وإبتليته = ياعنك ما أنشد مخطي الدرب وش قال
أقلط على الإبداع في وسط بيته = وآخذ معه من دلة الشعر فنجال
والعذب لا منّي وردته رويته = يوم الردي يآرد وهو قاصر حبال
لرضاك هاجوسي بسهري كويته = أكويه بعض أحيان وأحيان يحتال
شهرين أساهر خطّك اللي لقيته = واليوم ثالث شهر والسهر لا زال
حتىّ كمل مردودي اللي بغيته = ما تلحقه شرهه ولا حوله إشكال
كلّه على شانك زمانك شكيته = وأبديت لي ضيقه وغربه وغربال
وأنا معك في كل دربٍ نويته = خذني معك صاحب وخذني لك ظلال
لو إن غيرك مشتكي ما عطيته = نصف إهتمامي لك ولا ربع الإقبال
بس أنت غالي والغلا ما إشتريته = في ذمّتي ما سقت في ودّك ريال
الله وهبك إيّاه وأنت إحتميته = بالطيب والتقدير يا طيّب الفال
يا أبو فهد ودّك بصدري بنيته = قصرٍ كبير وله مفاتيح وأقفال
وكتابك اللي بالتّوجّد بديته = وأخذت فيه مع التجاريح موّال
ثم قلت: [يا خلٍ بعيدٍ هويته] = وغنّيت طاروقك على روس الأقذال
مدري وش اللي في ضميرك كنيته!! = بسّ إعرف إنّي معك بالحال والمال
ما ينفع الرجّال لوّه وليته = لا صار مايقضي لزومه ليا عال
إليا حداك الوقت قلّي حديته = وإزهم علّي أجيك رجلي وخيّال
لاتنخدع في ديمنه مع سبيته = إضرب على الكايد على كلّ الأحوال
تراك إبن شيخٍ يشرّفك صيته = ملاذ من حدّه عليه أشهب اللال
اللي سطع في كوكب الطيب ليته = حلاّل ما يصعب على كلّ حلاّل
يدعي له اللي حسرته مشتويته = من كثر ما مرّه غرابيل وأهوال
شاف الندم والمعمعه مقتفيته = والموت قدامه بلا شك وجدال
يقول: مابه مسلمٍ ما نخيته = والشرع تنفيذه على الدون والعال
وعقب إنقطع حبل الرجا اللي رجيته = جالي من الله فزعةٍ ردت الحال
جاله ولد بندر ليا حدّ بيته = كنّه يقول إزهل وأنا مجرّي الذّال
بأمر الله الموضوع كلّه حويته = ثمّ فكّ مهمومٍ عليه الدهر مال
ولا صار دربه يا مشاري مشيته = حق إلك ما بين المناعير تختال
الطيب مرقابٍ طويل ورقيته = واللاش يقصر دون تحقيق الآمال
تلقاه همّه عيشته مع مبيته = ما شاقته جزل المواقف والأفعال
رجّال في هدومه وكشخة جكيته = ولا حكّ عود بعود ما هوب رجّال
لا رحم أبوه وكلّ حيّه وميته = حيث إن ماله مع هل الطيب مدهال
هذاك والله ما أذكر إنّي بكيته = ولا همّني جعله عن القاع ينزال
وألاّ أنت عقب إنّك زمانك شكيته = خذ مختصر ما قلت يا معرّب الخال
أنا معك في كلّ دربٍ نويته = سلطان ابن حامد من السّين للدّال[/poem]

وسلامة الجميع