الملك عبدالله

السلام عليكم ورحمة الله وبركاته جميعا"

يسعدني جدا" التواصل معكم ومشاركة أخواني الشعراء في هذا الموقع المتميز واللذي أشكر القائمين عليه اللذين سهلو لي عملية التسجيل وأهدي لكم هذه القصيده التي تعبر عن بعض مافي نفوسنا من الحب والولاء والطاعه لرموز هذا الوطن الشامخ أدام الله عليه نعمة الأمن والاستقرار وعلى جميع البلدان الأسلاميه .


هذي قصيده والقصايد غنادير
قصيدة" كل القصايد بعدها
قامت على ذكر الرجال المشاهير
تنثر ذوايبها وتلعب بيدها
معها رساله والرساله تقارير
عهده وخفاق الحنايا جردها
الخف خف الريش وأثقل من النير
فيها المشاعر باقيه في عهدها
فيها ولا فيها محبه وتقدير
من شاف نعمتها عليها حسدها
سحابة" بين السحاب المهامير
تنثر مطرها يوم يرزم رعدها
قصة فخر فيها تطول المشاوير
ذكر الملك عبدالله أحلى عقدها
من ذكر أبومتعب تفوح النواوير
يطغي شذاها والهبوب تحشدها
نسل الأمام اللي يقود الطوابير
في ساعة" بعض العرب ماحمدها
موحد الدوله على حصان وبعير
مرسي دعايمها وراكز عمدها
لو فيه ذاك الوقت طياره أطير
في ذمتي ماهي بدوله وحدها
أنها دول واجد تحت حكمه تصير
لأنه ليا شاف الطويله صعدها
صليب راس ونصف راسه صعاطير
والنصف الاخر حكمة" معتقدها
واليوم حكم مصخر الصعب تصخير
اللي عطاها لين طير رمدها
اللي هتف بأسمه جميع الجماهير
اللي بوسط الشعب نفسه وجدها
مستودع الطيبه بعيد المطامير
ملحق عظامه للمعالي جهدها
ينطل حطب ودلال جوده مناحير
من فوق نيران" تواقد وقدها
والناس في بيته ورود ومصادير
وما مدته ياما كبود" بردها
الدار بقدومه تسوق التباشير
ذليل ليل" من ليالي سعدها
سافر ورد وجا معه وافر الخير
وأستقبله ناس" وفت في وعدها
ثبات عسكر وأصطفاقة بصاطير
وأزكى تحيه للملك مستندها
وأستقبله داقم خشوم المخاسير
سلطان لاهاب الغبيرا ولدها
ولي عهده مسنده في المعاسير
فرقاه جعله مايطول أمدها
وأستقبله عقبه خلف سالم الزير
النايب الثاني ذراها سندها
نايف ونايف غير عنك أن به أمير
ذود الزعامه بالعزيمه هجدها
وأستقبله عقبه جموع وطوابير
حبه تغذى من خلايا جسدها
والقهوجيه بالدلال المباهير
أصالة" من شافها ماجحدها
لانه الصقيل اللي يقص البواتير
لاكبرت القاله وكثرت عقدها
ولانه الملك وعموم شعبه مناعير
ناس" قدايمها بذيرة جددها
يامرحبا به مالقنوف المزابير
تنثر على روس الروابي بردها
حنا نحبه لو تغور الدنانير
وقلوبنا مادام طيب رغدها
وأنا الدهاة الصاملين المغاوير
لابان من سود الليالي نكدها
تحت الأوامر والنوايا مغاتير
أعذب من أمطار المخايل شهدها
الدار هذي بين كل الدول غير
فيها الرساله صحصحت من مهدها
فيها الرسول اللي دروبه مناوير
عليه صل وتبغي الأجر زدها
طول الدهر وأعداد ريش العصافير
وأليا أنتهت ياباغي الخير زدها

وسلامتك جميعا" وأتمنى أن تنول على أعجابكم