أحتجاج

بعد أنقطاع .. لعلها تنال القليل من استحسانكم


ياروض الزهور اللي تغشى سماها عج=عسى خير ،قلي وين الاعصار متوجه
ترى مايضر النيل لو سال وادي وج=مصيره تراب الارض من حيث ماوجه
لكن الصداقه ركن سادس خلاف الحج=مناهيجها ودروبها غير معوجه
وأنا صاحبي لو غيروه العلوج ودج=تطاير خفاف الروز ماطار فالعجه
أعرفه ثقيل، وللرجال العوارف حنج=عسى الله مايقطع نصيبه ولا حنجه
أكيد يتذكر من ثبت يوم كلٍ هج=وأكيد يعرف صدق المواقيف والدجه
يا روض أتألم والوجع سج روحي سج=وهو ماسأل عن سر غيبات ذو الحجه
وأنا لو همومي جات كل فج وفج=دواها الصبر والبعد والشعر والسجه
عزاي إن حبك حط بين المحاني فلج=يا روضِ عراره مشتبك والندى مجه
سقيتك ياروض من الزلال ودلجته دلج=الاغصان ريانه والافلاج مرهجه
لعيون العهود السابقه والنوايا البلج= وعقيد العرب مايشرب الكيف ويبجه
ولاهوب أنا اللي يستميله حنين الخلج=ولا أتلى البكار اللي بروضك لها لجه
هذي سكة ربادي وبارد عيون وعلج=وأنا أشره على اللي يارد العد ويرجه
وش العذر يامن رجوا أصفى المشارب رج؟=بالتشكيك والتخمين والفكرة الفجه
على ما جرى ياروض من مخطيات، أحتج=لاشك الرفيق الخصم والشيخ والحجه