مرثيه .. لـ .. الشاعر عثمان تركي بن مصوّي

السلام عليكم ورحمة الله وبركاته

قصيده للشاعر / عثمان تركي بن مصوي
رثاء وفي وفاة المغفور لهما الشيخ / عبدالرحمن خاشم ابن مصوي
وابن عمه الشيخ / عبدالله عوض ابن مصوي والتي لم تفصل وفاتهم عن بعض سواء ايام


[poem=font="Traditional Arabic,5,darkblue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
يــالله يــاوالــي عــلـيــك الـتسـاهــيـــل =ياعالم"كثر الحصيل وقليله
يــا غــافـــر الـزلات منشي الـمـخايـيـل =انت الذي من خشيته نلتجيله
تــرحـم عــقـيـد مـامـشى سـكـة الــمـيـل = من خلقته دايم كتابك دليله
مـرحـوم يـا شـيـخ فــعــولــه قـنـــاديــل =شيخ" ولد شيخ" قليل مثيله
مـرحـوم يـا الـنـادر طــويــل المحابـيـل =جعلك مع الوافين واهل الفضيلة
مــرحـوم يـا جـــدي رفـيـع الـمـنـازيــل =يالله عسى الفردوس دايم مقيله
مـدري اعـز الجـود و انـعى هـذا الجيـل = وأقول من للحمل يقدر يشيله
والا اعـزي الـماضــيـه و الـمـقـابـيــل = من الفعول الوافيه والجزيله
لــكـن اعـزي فــيـه جــمـلـة وتـفـصـيـل =كل الأوادم والخصال الاصيله
يـا عــزتي لـلـمـرجــلــه و الــريـاجـيـل =ويا عزتي لك يالحمول الثقيله
ويـا عـزتـي لـك يـالاشــده مـن الـمـيــل =وياعزتي لك يا ركون القبيله
ويا عزتي للجاه بعد الحلاحيل =ويا عزتي لك يالحصون الضليله
ويا عزتي للبشت عقب المشاكيل =ويا عزتي لك يالفعول الجليله
ويا عزتي لك يالمجالس من القيل = ما عاد لك هيبه ولا لك عقيله
ويا عزتي للي يبون التماثيل =أهل السوالف والعلوم النبيله
ويا عزتي للكيف والبن والهيل =والنجر والمسمار ودع وكيله
ويا عزتي لدلالها والمعاميل =والعود الأزرق يوم فارق عميله
ويا عزتي للضيف لا طرّف الليل =ويا عزتي للي يبون الجميله
ويا عزتي لك يا شحم قرّح الحيل = ويا عزتي للصيد خلي سبيله
ويا عزتي لك يالبنادق من الشيل =ورمي التبورد والهدف عزتيله
ويا عزتي للذود لجة مباهيل =ويا عزتي لك يالرجوم الطويله
من يوم راح اللي يحط المعاديل =اللي يصلي فروضها والنفيله
واف الخصايل موفي الوزن والكيل =الله يبيحه ما يعوض رحيله
اقفى ابو تركي زبون المثاقيل =عون الدريك المستجير وكفيله
يالله عسى الجنة مقره عن الويل =وعن الحميم تشربه سلسبيله
حيث ان ما مثله بعيد المناويل =نادر حرار ما يجيب الهزيله
اقولها ودموع عيني هماليل = والقلب يصلى فوق صال المليله
يا وجد حالي يالسيوف المصاقيل =سيوف عز" ما تجيب الفشيله
غاب الجدي وانزاح مع غيبة سهيل =غابت نجوم" للنشاما دليله
راحوا دهاة للنشاما مداهيل = زحول الرجال معدلة كل ميلة
راحوا هل الطالات لطامة العيل =اللي تنومس كل من تنتميله
راحوا هل التقوى الرجال البواتيل =أهل القلوب الصافيه والبتيله
اللي بهم تلقى الصعيبات حلحيل =ترضخ لهم اكبر صعيبه ذليله
ماتو ولا في حكمة الله تبديل =حكم القدر مكتوب ما فيه حيله
والموت حق ولا عن الموت تحويل =لكن خرمتهم تهز القبيله
كلن فقد لمزبنين المداخيل =فقيدة" للي عرفهم عضيله
كل من عرفهم من هل الجيش والخيل =أجناب والا اقراب تبكي عليله
ياجعلهم في دار خلد مقابيل =مع الصحابة والرسول وخليله
آمين يا من نزل الوحي تنزيل = على رسول الحق بأفضل وسيله
وصلاة ربي عد ما يجري السيل = على الرسول وعد وبل المخيله
صلاة" اطهر من عذيب المناهيل =وازكى من أنسام الربيع العليله [/poem]


صح لسان شاعرها والله يرحم اموات المسلمين