سلامة سلطان (المشاركة الثانية)

[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
على الطين اوقد النيران وابن الصرح يا هامان= عشان ابلغ به اسباب السما والمس كواكبها

واصافح به يدين ٍ شانها فوق البسيطة شان= يدين ٍ زاحمت شهب المجرات بمناكبها

من اشرف غصن فاطهر عود من شجرة نسب عدنان= خلقها الله وطيب فعلها من طيب صاحبها

على ارض ٍ رملها مسك وهواها نفحة الريحان= وماها معجزة نفنى ولا تفنى عجايبها

يحن طويق وتفز السراة وترقص الصمان= وتختال المخايل في سما حايل وفوق ابها

كأن الله خلقها فابتسامة سيدي سلطان= ليا منه تبسم هلت الغيمة ذوايبها

شفاك اللي بجودك كم شفى علة واغاث انسان= وفك رقاب كان الموت تحت السيف قاضبها

وعوفيت وتعافى الجود والمعروف والاحسان= وطابت بك نفوس ٍ غيبتك كبرى مصايبها

تودعك الرباط ونجد تستقبلك با الاحضان= دموع مودعة ودموع تستقبل حبايبها

وتصحبك السلامه دامت ان مرافقك سلمان= وتبشر با السعد في مشرق الدنيا ومغربها

هذا رمز الوفا لو للوفا بين العرب ميزان= تميل كفته مستعرب العالم وعاربها

اخذ شدة عمر مع لين ابو بكر وحيا عثمان= ومن شلفا الزناتي فعلها الساطي ومضربها

تحارب هيبته عنه العدا في ساحة الميدان= وتكسر شوكة العدوان قبل انه يحاربها

عطاه الله من الحكمة بفضله ما عطا لقمان= على ما اعطت له الايام من حكمة تجاربها

امير ٍ كل صفحة مجد فيها حط له عنوان= سرايا المجد خال وجد ناخت له ركايبها!!
[/poem]