اسمي على اسم المصطفى حي فاله

اسمي على اسم المصطفى

[poem=font="Arial,7,green,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
صلى الله وسلم على طيب الساس=صلى الله وسلم على أحمد وآله
صلى الله وسلم عدد رد الانفاس=واعداد همّال المطر من خِياله
يا مخرّج العالم من عبادة الناس=لعبادة الرحمن جل جلاله
تاريخ صبرك للبشر صار نبراس=كل يورّث نور صبرك عياله
ناديت بالدعوه والاكباد يبّاس=وارويتها من نهر نور الرساله
واسقوك في مكه مع ذلك الباس=واعفيت عمن بادرك بالجهاله
وانحيت للطايف وعاداك الاتعاس=ورجعت تنقل حمل صعب احتماله
ما رق لحوالك سوى العبد عداس=واسقاك واحسن في مقامك وصاله
وانحيت للهجره وقفّاك عساس=حافك سراقه واعثرت به رحاله
واستقبلك في طيبه الناس باحساس=" قد طالع البدر علينا جماله "
واستبشر الاسلام واصبح له غراس=واثمر جناه اللي يظلل ظلاله
شعت شموسه مالجزيره ليا فاس=وثّق عراه اللي تضيح اعتداله
واليوم صرنا نضرب اخماس باسداس=والقدس في ايدين اليهود احتلاله
والضيم ما هو قدس راحت لنا اقداس=اشبيليه وطليطله وقش تاله
ما راح في مدريد روّح بمدراس=واللي حصل في الأرك جا في ملاله
لكن ما اقرب سيف حمزه من الطاس=لا تل بيده كل منا نصاله
لا ثارت الفتنه ودقن الاجراس=واذن على كل المنابر بلاله
ناقف لها وقفة بعيدين الارماس=نشرب سعوط الموت شرب البياله
واحنا على عهدك من عصور حرّاس=والدين دين الله وحنا فدا له
وامجادنا ما هي جليله وجساس=والزير وإلا كليب راع الجلاله
ولا هي أشعار المنخّل ومرداس=ولا غنا زرياب وإلا فضاله
أمجادنا من غير الاسلام قرطاس=تذري به الارياح في كل جاله
والمجد في القرآن في الفجر والناس=في ديننا السمح العظيم وكماله
والعز بالاسلام وسواه الافلاس=وأنا على نهجه ولا ارضى بداله
ما غرني فتنه ولا ذلني كاس=مغنيني الله عن حرامه حلاله
نهجي كتاب الله .. ولي عز ولباس=والقدوه السنّه ودرب الرساله
واسمي ينومسني مع كل قرناس=لنه على اسم المصطفى حي فاله
حي السماوه لا اصبحت ترفع الراس=بين الرجال أهل الكرم والجزاله
وأنا ما اسلم رفقتي كل بلاس=جلاسي أهل الدين وأهل الاصاله
وإن هب في صدري من الشعر هوجاس=شبيت ضوي وارتكيت لدلاله
واخذت اقلب فكرتي فوق محماس=حتى تفوح النادره في خياله
وارد على عدٍ تغذيه الاحباس=واسحب رشا الافكار فوق المحاله
هذي على منهج وهذي على ساس=تصرف كما صرف الذهب فالوكاله
أحلى من الاكسير واغلى من الماس=واعذب من الما وارشق من الغزاله
عندي لها وزنه وعندي لها قياس=بين الخيال وبين حد الضلاله[/poem]

محمد بن حمدان المالكي
22 / 2 / 1431هـ - الـرياض