قصيده فكاهيـه !

[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
هجوسي تداحم قلت بسم الله الرحمن = عليّ وعليها من عيون الحراميه
على كثر مابي من هموم وتعب وأحزان = وعلى سوّ صحة حالتي الإقتصاديه
أهجرس وأغني وأضرب ألحان فوق ألحان = عسى السامريه ماتدف الهجينيه
أخاطب بها العقال ما أخاطب الخبلان = وأحب الغموض ولا كرهت الشفافيه
ولا أدور الشهره ولا المهره أم عنان = ولا أبغى آتصور في القناه الفضائيه
دريت إن وضحا حبها نمر بن عدوان = ولا أدري من اللي حب عليا الهلاليه
أبـبقى بدوي مهما تطاولت في البنيان = ومهما أنصدمت بكل حاجه حضاريه
على ملة الإسلام والمسلمين أخوان = ولي طيحه وقومه ولي روحه وجيه
مشيت وعرفت من البشر مختلف الألوان = من أهل السعوديه وغير السعوديه
ومن خيرة الأصحاب رجل وفصيح لسان = ومن روس قوم وفي الصفوف الأماميه
وشاعر وعالي ذوق ومثـقف وفهمان = وعلى أحلى الروايع عنده صكوك ملكيه
أعرفه وله عندي محبه وقدر وشان = وياحـي مستور الذويبي وياحيــه
تذكرته وغنيت له شـرّد القيفان = سلام وكلام وسالفه من صفا نيه
يامستور علّم فيصل وصاحبي مشعان = عن السالفه والسالفه غير سريه
إذا كنت ماشي صح ومسكر البيبان = فأنا نسبتي بالضبط خمسين بالميه
ترى اللي صرفته في حياتك على الدخان = حوالي ثمانين ألف يورو وروبيه
وذا اليوم يامستور دخن وبالمجان = من الدنهل المضبوط والجمرة الحيه
ولا تقنص الضبان تقنص من الغزلان = ويمكن يصرّح لك دخول أي محميه
لأبو الشعر والألحان والبدع والأوزان = لأبوها أمسيه في مهرجان النعيريه
تريّح وقل للطايف يعلّم الصمان = عن شهار والردّف وعن سيسد وليـه
وسافر على كيفك وضربك على المليان = ولا تهبط الاّ في مطارات دوليه
وإذا زعّلك شرطي الدرك وأنت في لبنان = تسوق الدرك كله مساق النعيميه
وإذا كنت شخصٍ تكنلوجي زر اليابان = وشاهد بعينك قمـة التكنلوجيه
وفي ذمتي ماتبتلش بالدبا الحنـان = مادام إن عندك راس مال وأريحيه
ولا تلعب الكيرم ولا تلعب الكنكان = ولا دار دوريه ولا طاق طاقيه
ولا عاد تبغى خوة فلان والاّ فلان = خويك زعيم الفرقة الراسماليه
ومن قال كيف الحال قل عدد السكان = ولا ترفع أسعار الدروس الخصوصيه
ويلزمك تحسن العلاقات يا ذيبان = مع كل واحد يعرف الداب والحيه
ترى أن كان فيصل ماتعوذ من الشيطان = كتب في الصميم: الشمس تاكل من الفيه
وخوفي إن مشعان العتيبي وهو زعلان = يبلـغ عليك ألفين شرطي ودوريه
كذا والله إن تموت ماترضي العتبان = مع إنك عتيبي راضع ٍ من عتيبيه
عطيتك ملخص وأنت رجلٍ وسيع بطان = وتدري إن وقتك ذا يبي دبلماسيه
وتدري إن بعض الزود يحسب من النقصان = ولا في المراجل جامعه وإبتدائيه
عساني يامستور الذويبي بكل إتقان = حبكت المعاني في قصيده فكاهيـّه !
[/poem]