فتات أحلامنا !

[poem=font="Simplified Arabic,6,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]

غاب الرقيب وطالت يدين السروق = اللي سرق حتى فتات أحلامنا

ما خاف فينا الله ولا صان الحقوق = نُصِّب لرفع الضيم لكن ضامنا

يستخدم السلطة بلا ذمة وذوق = ويحكم بما لا ترتضي حُكَّامنا

مبداه ما قدم اليدين إلا الحلوق = ولوهي على كيفه حكم بإعدامنا

شمس النزاهه مالها عنده شروق = وفي مجهره تصغر كبار أحجامنا

حماقته تجري بدمه في العروق = لا صايم ولا معتبر بصيامنا

وبين الفعل والقول يا كبر الفروق = وإليا صدقناه الملامة لامنا

شف روسنا من فعله وعد الفلوق = وحنا علينا رفع بيض أعلامنا

ماهو ردى منا ولا فينا ذروق = لكن تقيدنا شروط إحرامنا

مدري متى من نومة الغفلة يفوق = وإلا متى يفرض عليه إكرامنا

وهذا الوطن ما نرخصه في كل سوق = غالي وترخص من غلاه أقيامنا

نفدا ثراه ونحفظه من كل بوق = مادام تنقلنا عليه عظامنا

أرواحنا نسوقها لرضاه سوق = وتذود عنه سيوفنا وأقلامنا

حقٍ علينا نرفعه بالحب فوق = ونحط من عاداه تحت أقدامنا

وحقٍ علينا لا أعترض مسعاه عوق = عوقه يصير أعتى وألد أخصامنا

وحقٍ عليه إن طالت يدين السروق = يكفها وإلا يكف أحلامنا !
[/poem]