رحله مع الهاجس

السلام عليكم ورحمة الله وبركاته
احبتي في هذا المكان الراقي ادبيا وفكريا
يسعدني ويشرفني قبول عضويتي مع هذا الجمع المبارك ادارة واعضاء وزوار
ولدي هذه البسيطه التي ارى انها تتوارى خجلا امام نصوصكم الكبيره والراقيه برقي اقلامكم الراهيه
ارجو قبولها وعذري منكم ان حصل بها قصور
[poem=font="Simplified Arabic,7,black,normal,italic" bkcolor="transparent" bkimage="" border="none,4,gray" type=2 line=0 align=center use=ex num="0,black""]
زارني حزّة ظلام الليل ضيف ودق بابي=قلت جعله خير داعي خير يا ضيف العشيّه
قمت ارحب فكري ان الضيف محمود الجنابي=واثره الهاجوس مندوب السهر ملفي عليّه
شايل ٍ في كفّه اليسرى علاج لحرّ ما بي=وايده اليمنى بها ساطور حدّ الحضرميّه
قمت اهلي به واقول اقلط هلابك يا عذابي=واطلب الرحمن يكفيني اذى شر البليّه
قال وشبك يا عميلي صاير ٍ جوّك ضبابي=خابرك لا شفتني غنّيت طرق السامريّه
قلت ضيف الدار ما يلتكّ في صفر الجنابي=ويتهدد صاحب المنزل بفعل الصيرميّه
طبعك اتعبني وهدّ الحيل وجنانك غدابي=كلّ تالي ليل يا هاجوس تكويني بكيّه
عجز شيخ الدين والدكتور عن سرّ التهابي=قايسو نبضات قلبي والتقو نبضي شويّه
والسبب هاجوس دقّ اوتاد قلبي والتها بي=واخذ عقلي بين اصابع كفّه القاسي هديّه
هاجسي غصنه تسلّق عود فكري والتوابي=وارتوى من خافق المفتون واصبح مزهريّه
قال آمر وش تبي هالحين من حضرة جنابي=ظني انك يا عليل الروح ناوي لي بنيّه
قلت يا مقلق ضميري آه لو تقرا كتابي=تلتقي في كلّ باب ٍ من مواضيعه قضيّه
حظي المقرود ياهاجوس في حضنك رمابي=سار فكري من عنا صحبتك مجهول الهويّه
لا بشر يعرف معاناتي ولا شخص ٍ درابي=بات يضحك من معاناتي زهر ورد الحويّه
الهموم اشكال والوان ٍ تفنن في صوابي=كلّ ما ودّعت جيش ٍ زارني عقبه سريّه
قال يا مسكين هذي مشكله واسمع جوابي=قم نسجّ بديرة الصمان في نجد العذيّه
ما نشوف إلا مغاتير الفلا وضح الرقابي=قدمها الراعي يهوهي عزبته فوق المطيه
تنشرح فيها الصدور ونبتعد عن كلّ نابي=وش نبي في ديرة ٍشغمومها يشنا خويّه
قم توكلنا على الله يا سمي خلّك شبابي=واترك الباقي على معبودنا رب البريّه
اعطنا الجيب المقفص والمخمّس والزهابي=واعطنا طير البراري والفشك والزمزميّه
نركب الرُبع المجهّز للسهول وللهضابي=يشرب الخط المسفلت والجبل والجرهديّه
صممه نجل اليهودي للمهمات الصعابي=وارد اليابان كسمه لا حشى مافيه زيّه
يفرك البيداء بقوّه لا يخاف ولا يهابي=يبترم للصيد كنّه يابن عمي مروحيّه
لا اروح البنزين واعتدّ النمر قيره سرابي=ترتعد منه المواتر لا عبر مثل الشظيّه
قلت يا هاجوس ما هذا الفصاحه بالخطابي=مفرداتك كلها مشمول سحر وجاذبيّه
مرّ بي لاهنت بأسواق العليا والغرابي=بعدها عرّض بنا نفداك سوق الناصريّه
نشتري حمر الزوالي وآحسبها من حسابي=صرف قنطار الذهب للبر مايسوى وقيّه
افرش الشيراز تحتي والتحف صوف الثيابي=واعتزي وآشب ضوي دامني بأرض ٍنقيّه
احمس البن اليماني دام جو البر طابي=واسحق الهيل المذولق وانكسه فــ الشاذليه
خلّها في حضن عيدان القرض واره النصابي=لا يجيها صلو نيران اللهايب والوشيّه
ثم رشّدها بمسحوق العويدي والشهابي=شربة الفنجال منها يطرب النفس الشقيّه
ما يفيد ابن آدم المخلوق من نصل الترابي=غير قربه من إله الكون والناس الوفيّه
لو نجى جساس قبل الموت من سيف الذيابي=كانت الدنيا تراوح في عصور الجاهليّه
وبعد ما مجنون ليلى جنّ من هول المصابي=مات قيس ابن الملوّح عند قبر العامريّه
في حضوري في سكوني في جنوني في غيابي=ما عرفت آفكّ شفرات النقوش السومريّه
رحلتي هذي مع الهاجس بعد ما دق بابي=عقبها لو زارني بالليل ماله منكريّه[/poem]