ماهتنت برقاد

يامـل عينٍ ما هتنت برقـاد==عافت منام الليل جاها هجاد

عينٍ ليا هجعت عيون الناس==كن في محاجرها دوى الرعاد

أتعب صخاف عروقها السهر==ودمعن هميله فوق خدي زاد

عينٍ مجافي موقها الكرى==ونفسٍ معيفه ماتذوق الزاد

وروابعٍ تطعن طعنها زرق==تطعن على قلبي بشلف حداد

داجن ولاجن بالضمير أفواج==أبني بلد وأرجع و هد بلاد

غديت أنا وهمي مع الأيام ==وظروف وقتي والزمن بجهاد

متجودٍ في عروة الصبر ==أصبر ولاكن الصبر مافاد

دنياٍ عسى الله يكفي شرها==دايم مساعيها تعب ونكاد

فأحذر تغرك عافيتك اليوم==بكره تموت ولا عنك نشاد

فلاميتٍ ألا ويبعث حي==ولاحيٍ ألا الموت له ميعاد

ولا كل برقٍ لاح ينثر ماه==ولا زرعٍ أثمر غير له حصاد

ولا كنت حبرٍ فالرجال أحبار==ولابد صياد الفهود يصاد

ولا غايب ألا حجته وياه==ولا جمعه ألا مقتفيها بعاد

حبيت أراسل بعد طول غياب==للصاحب اللي للجروح ضماد

أقبل تحياتي مع التقدير==أمعطرة بالمسك وريح زباد

وصلو عدد ما ذعذعن النود==وأعداد مايخضر ورق بأعواد

على نبينا محمد المختار==صفوة قريش اللي بنى الأمجاد