حيل (شفافه) و(حسّاسه)..!

على ذكر (الحلا): كيف الحلا يا فاتنة بعيونك النعاس؟
من آخر من تكسّر رمش عينك في حشاه وعج بانفاسه

من آخر من غدن عروق قلبه يوم شافك مقبله يباس
من آخر من كسر عشرين باس ويوم جيتيه انكسر باسه

من آخر من هلك من قدك اللي ينثني من طاري النساس
من آخر من لمحك وغير زينك ما ملا عينه ولا راسه

هنى خيوط ملبوس الحرير انك منحتيها تكون لباس
وهنى الكحل والروج الحمر والمشط والسلسال والماسه

وهني العقد والألماس حباته على جيدك غدن حراس
وعقدك ما عليه ولا يلام إن هام حب بجيد لباسه

ولو ان العقد له روح انفرط لا من لمس جيدك وذاب الماس
وظلك من جمالك لو شعوره حي عبر لك عن احساسه

وهنى العطر وأنفاس الربيع إن حاولت تشبهك بالا نفاس
وهنى الصبح قبل الما وقبل الشمس خدك لمس نسناسه

وهنى آخر كلام مر في سمعك ولو بالحلم والهوجاس
وهنى آخر شعورٍ مر فيك وصار دافي قلبك لباسه

وهنى آخر قصيدة لي قريتيها .. هنى الحبر والقرطاس
وهنى آخر كتاب ضمته كفك وسال احساس قرطاسه

وهنى الشارع اللي تدهلينه .. لا.. هنى من مربه من ناس
وهنى الفجر في وجهك وليلٍ لا سهرتي شبّت اعراسه

وهنى اللون الأسود في شعرك وملبسك في قدك المياس
وهنى ناس تشبه في حلا قدك وهي ما هيب من ناسه

وهنى كل المشاعر والعواطف والدفا في قلبك الحساس
وهنى سنين عمري فيك ياللي حيل شفافه وحساسه

وعلى ذكر الهنا يا فاتنه نلت الهنا بعيونك النعاس
وانا آخر من تسرب سحر عطرك في حشاه وعطّر انفاسه

علي المفضّي