( صوره متحركه ) وتعليق شعراء مرقابيين عليها .. ومشروع مسابقه غريبه ربما ترى النور !

السلام عليكم ورحمة الله وبركاته .
صلو على سيد الخلق .

/

من فتره كان هناك أقتراح مني لمسابقه غريبه نوعاُ ما وعرضت فكرتها على أخي الكبير محمد رشيد وكان موافقني الرأي فيها ولكن أعتراضه كان إنها راح تطول وهي بالفعل كذالك لأنه أقرب مالها شبكة الطيران الأمريكي متشربكه ومعقده .

الفكره أن كل الشعراء المشاركين فيها يشاركون بـ أبيات + تقييم مشاركات بطريقه غريبه + صور .
بمعنى أن الشاعر المشارك ( يكون مشارك وعضو لجنه تقييم وصاحب أختيار صوره )
المسابقه كلها آثاره الشاعر مايدري من يقيم مشاركاته ولايدري من يقيم ولايدري من يعلق على الصوره اللي أختارها في المرحله الأولى من المسابقه ولاتزعل أحد كلها تساوى الحظوظ فيها !
أقرب مالها حظ نصيبك بحكم أنها تكون سريه عن طريق الرسائل الخاصه .
المسابقه طريقتها ماراح أوضحها أكثر حتى ما تسرق وللمعلوميه هالمسابقه ماتصلح إلأ في منتدى .



من منطلق المسابقه اللي طرحتها على أبو مالك أخترت صوره . البعض قال لي مضحكه والبعض قال لي هالصوره تستطيع أن توظف فيه أفكار كثيره والبعض قال أن التعليق على هالصوره لابد يكون ساخر وهو من أصعب الاساليب سوى كان شعر أو نثر. والكلام طال عن هالصوره .

قلت لعل هالموضوع يكون مقياس نجاح أو فشل للفكره والحمد لله الأمور تبشر بخير .


وراسلت الشعراء المتواجدين بدون أنتقائيه يعلم الله لأن فيه شعراء لهم فتره ماتواجدو في المرقاب .



الصوره اللي تم أختيارها .






والشعراء والشاعرات اللي راسلتهم ماقصرو اللي شارك واللي طرح رأي وما أقول إلا صحت ألسنتكم لين ترضون وسلمتو ودمتو وشرفني وشرف المتصفح مشاركاتهم الرائعه.


ملاحظه ترتيب الشعراء وتعليقهم بتواريخ الرسائل .

/

عبدربه :








تال الزمن ياكثر شئ نشوفه./. مْن الغرايب مابقا ظنتي شئ
قامت تجينا أشياً ما هيب معروفه ./. حتى السمك يعيش في اليابسه حي !
ما ألوم صياده ليا زاد خوفه ./. وحتى بعد سنارته وضعها سئ !


/

ماجد بن سعيد







ياورع مالك ومال الصيد -- انحش وخله على الشاطي

مادام قلبك ظهر رعديد -- ولا لك على الصيد مقلاطي

يكفيك عن صيدته صنديد -- صميدع(ن) بالفعل ساطي




/

سعود بادي :





شل صيدتك راس الضبي مابه عراش
لف وتديور والسقيطه سقيطه
بالدم يابشار ماحيٍِ اعتاش
الحق له ناسِ عظام ونشيطه
ودك تخلي كل شيءٍ وتنحاش
من عقب ماضاقت عليك البسيطه


/

شفق السريع :





يا ورع لا تنحاش خذني معك خذني
انـــا رهـيــن ايـديــك غــمــزه و ســنــاره
الله حسيـبـي فـيـك وشـلــون تتـركـنـي
للموت و انا اللي جيتك على الشاره
من بعد ما حبلـك شربـك و شربكنـي
و الله لـتـاكـلـهــا غــــــاره و را غـــــــاره

/


بدر ناصر المورقي :




مسكين كانه خاف من باس صيده
ماهيب يمّه تنزع ومالها شان
لو الله يخلّي سنينه مديده
وشلون لا صادف من الناس حيتان

/


سنجار :





عـادي بهـذا الوقـت كـل شـي عـادي
برق الطيور تحوف شقر المشاهير
حتى السمـك تطمـع بـروس العبـادي
ومــذيــره قــلـــب الــزحـــول الـمـنـاعـيـر
وقــت بــه الـصـيـاد اصـبــح يـصــادي
مــــن بـنـدقــه ولا عــصــي الـسـنـانـيـر


/

محمد النخيش :






الـطـفــل هــــذا راعــــي الـســنــاره
صاد اسمكه وهوه صغيـرً سنّـه
الله على صيـده وبعـض افكـاره
كــن السـمـك يـطـرد وراه وكـنّــه
سارق صنادق الذهب واسـواره
ويبغى المفر اللي ماعنه وعنّه


/

محمد مسفر :






الا يا بلشتي يا نشبتي وش جابني للصيد
..... حراماً من حزامي كان عدت ما اتعودها



/

مطلق عبيان :






يدور في رأسي وأنا أدور! موضوع
موضوع إبن برمآن والطير والداب

/


محمد بلال :






الورع صايبته الراعه = والخوف خيّم على قلبه
يدور مع عقرب الساعه = كنّ الثواني تدلل به


/


أحمد خليفه الأسعدي :







الورع ضاري بـ/اللعابي يجمّعها
واللحين لاوالله نسى الابتسامه

خم الحديده وابتلش معها
ومن ماحصل قامت تراقل عظامه

روّعته أ/سمكته وروّعها
والكل منهم ما يبا الاّ السلامه


/


وجد :






يــا تــل قلـبـي تــل سـنــارة الـــورْع
أوْمـا بهـا واوْمــت معالـيـق قلـبْـي
أسْرع بصيده مير ما فاده السّرْع
يـــومٍ تـــروّع حـــطّ رجـلــه وهَـرْبــي
مـا كـنّـه إلا مـاخـذ بعآلـمـي فــرْع
يدور ويحدّه علـى عسْـر دربْـي !



/

عبدالعزيز المرشدي :




مدري سمك والا الغليّم لقا ضّب
........................ بس الوكاد ان الغليّم يخمّس

يفرّ حول السيخ والا تقضّب
...................داعس وجايب سرعته ومتحمّس

اول مزح وبتاليتها تغضّب
.................... ارتاع واصبح للهروب يتلمّس


/

فهد بن عبدان :






رحت / لكني مثل مارحت جيت
السمك - مافيه مثل عنادها

صادها غيري وأنا فيها ابتليت
عاقبتني واتركت صيادها


/

محسن الهفتاء :






يالله انـــــــــــك لا تـــعــــيــــد الــــصــــيــــد بـــالـــســـنـــاره
طيرت عقـل الصغيـر وقـام يرفـع صووتـه
يـــــــــــوم وقـــفــــهــــا وصـــــــــــارت بـــالــــهــــواء دواره
وابتدى صفق الهبـووب وروحـت مفلووتـه
والصـغـيـر ويــــش عــرفــه الـبـحــر واخــطــاره
من يلوومه يحسبنه ... صايدّ له حووته


/

عبدالله الرقيب :




ياورع مافيك بركه = والله يعوض والديك
ان كان تفجعك سمكه = يابوه منه انفض يديك


/

سيف صالح الدلبحي :




دوري وأنا أدور والأيام دواره // والبحر عرضه وطوله غير مقنعني
شقاوتي طبع والأحلام جباره // مادمت موجود لي حجمي ولي وزني
وإذا وقعتي ضحية (طِعم ) سناره // بدري على حضرة الصياد يخدعني

/

شاعرة نجد :





لـ.الـصــيــد متـعـه..مـايـقـدّر ثـمـنـهــا
وأنا بغيـت أستمتـع اليوم..وابْلشـت
صدت سْمكه(يُم)شفتها خفت منها
وخليتـهـا بسـنّـارة الصـيـد وانْحَـشـت


/

عقاب العضياني :





الطفلـة اللـي تصـيـد الصـيـد خانتـهـا
أمــن البـرائـه شجعتـهـا عـلـى غـفـلـه
تــورطـــت يالله أدخـيــلــك بـصـيـدتـهـا
مثل ماقد ورطت الصيده مع الطفله


سلطان العطاوي :




الـعـيـش يـازيــن الـبـنــات الـغـنـاديـر
مـــا عـــاد يعطـيـنـا عـلــى مشتـهـانـا
هـاذي هـي الدنيـا , مداهـا تـداويـر
مــن ويـــن مـــا رحـنــا ورانـــا ورانـــا
ومع كل باب تشوف فعل الهوامير
فـأنـفـوســنــا وأفــلــوســنــا وأقــربـــانـــا


/

أحمد رده الحارثي :




دام مستقبلك يا الذيب مجهول المصير
ما هو ابمستغرب الخوف من شي تملكه
لا تخاف وقو قلبك يصير اللي يصير
واعتبرها تجربه من صغرك مع سمكه
لا كبرت وطحت في سوق الاسهم يا الامير
تعرف اتصدى لهامور سوق المملكه

/

شاعر مرقابي :




اللي سواتك قد ملى قلبه الخوف
ماهوب لا صايد .... ولاقاله الله

سنارتك كّنها تقول أنظر وشوف !
كم شخص يكسب شي ماهو هلِن له


/

عبدالرحمن السمين :





مالك ومـال السمـك والنهـر والسنـاّره
دوّر لصيدٍ يناسب لك وتحرز مسكـه
لو قعدت تلاعب الكورة بوسط الحاره
أطيـب مـن العلـة اللـي ماوراهـا فكّـه
كـل طيـر ٍ يشبعـه مخلابـه ومنـقـاره
لا تظلّي مثـل مـن كفّـت يديـه الربكـه


/

فيصل بن عويمر :




خـلـي وهــذا الطـفـل فيـهـم / تشـابـه
اللـي بعـد صيدتـه / ينـحـاش منـهـا
مــن يـــوم ولـعـنـي / وعـــزم غـيـابـه
وصدق المشاعر / ميته في كفنها .


:

على هامش الموضوع بدون ذكر أسماء ،


_ شاعر مرقابي ( ياعبدالله أنا هالأيام مالي في الشعر تقول مغصوب عليه ماغير أطقطق طقطقت بنقالي في ورشه وماجاء حياه الله وماراح مادورته . رديت عليه : ثق تمام الثقه لو طقطقت على الصوره راح تكون طقطقت برفسور إلماني في معمل مفاعل نووي ومايدوام في المعمل إلا ساعتين ومن يوم يدخل المعمل وكل الأنظار عليه .

_ شاعر مرقابي ( الرساله أرسلتها لك مع المندوب . أبشرك أنها وصلت ومندوبك سنافي مثلك جابها في أسرع وقت .

_ شاعر مرقابي ( يبدو أن الاحداث اللي في المرقاب العام مع القيصر آثرت فيه وصار عدواني ولايثق في أحد : يقول لي : ( يانصاب وأنتظر موضوعك يالبناخي كنه يوم يقول أنتظر موضوعك ماهو مصدق )،
وهلء بعد ماشفت الموضوع أعلاه أيش الهرجه ! .

_ شاعر مرقابي ( عنده أمتحانات الله يوفقه ويقول لي أنت أمتحنتني بالصوره اللي مدري كيف صايره .

_ شاعر مرقابي ( كل ماراسلته ولا كلمته في موضوع يقول أنا مشغول ما أحك راسي دزيت له الرساله وكلمني بالجوال قال الموضوع متى آخر موعد له قلت الأثنين مابعد القادم قال آشوى آشوي ههههه ولاشفته .

_ شاعر مرقابي ( عنده أختبارات الله يوفقه ومن الضغط النفسي في الأختبارات قالب كويتي يقول أنا عندي أختبار الصبيحه وهذي الأبيات مالت المقطع وأنا عجزت أذاكر كل ماذكرت الصوره قعدت أضحك .

_ _ شاعر مرقابي ( يقول أنا من يوم تزوجت والقريحه صفر على الشمال لكن هذا تعليقي كان أعجبك لاتعلم به أحد حتى مايأخذ فكرتي ويوظفها أحسن مني كنه يرد على شاعر مرقابي في أقتراحه اللي وصلني .
/


الشعراء اللي وصلتهم الرساله ولاعلقو . كان يبون يشاركون تشرفني مشاركاتهم واللي ماراسلتهم يعذروني والله أني راسلت المتواجدين بلا أستثناء يعلم الله وكان يبون يشاركون يشرفني ذالك . والموضوع للجميع مرحبا ومسهلا .



دمتم بكل خير جميعٍ .