ضرب مرزبّة !!

[poem=font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
الليلة الجو بارد والسّما غايم = والنّار داخل حنايا الصّدر مشتبّة

اونستها فالخفوق المغرم الهايم = في ذكرياتٍ بَحَرْها ضاع من طبّه

من عشرة اسنين باقصى بحرها عايم = ولا زلت اعوم البَحَر غبّة ورا غبّة

غامرت وآيماني انّ الخالق : الدّايم = والموت واحد لكنّ الفرق فالسبّة

يهجم على الصّاحي ويهجم على النّايم = حتّى الطّبيب المعالج يخذله طبّه

وانا على جور بقعا صابر و شايم = عن ما يلحّقني الشّرهة ومتنبّه

حتّيش لو كان طير المعضلة حايم = صبري على الياس يضرب : ضرب مرزبّة

بحمول الآيام من صغري وانا قايم = واسجّ درب الخطر كل يوم واذبّه

يالين صكّيت باب اضيافة اللّايم = امدوّر الزلّة : الله ربّي وربّه

لا صار فيها شماته جا على التّايم = بضايعه كوم بالجملة وبالحبّة

تلقالها فالحراج الفوضوي سايم = سلعة فلس في يدين : اخبول وامسبّه

والشكر لله قنوع مصلي وصايم = وانكر على من بنا فوق القبر قبّة

خبلٍ ليا شات كورة تضرب القايم = يحوم حول الهدف ويروح ويكبّه

ماهوب ويّا صعود النّايف الرّايم = والفار يلعب على اتفه شيّ في عبّه

متصنّع الطّايلة ماهو لها ملايم = حتّى لو يبوس راس الكوع ويحبّه[/poem]