ذكـرى

بسم الله الرحمن الرحيم
أخواني الأعزاء /
أنا لست مرشداً ولست أكثر منكم تجربه أو خبرة ، هذه القصيدة قلتها بمناسبة موضوع لا يكفي المقام لذكره ، وكتبتها في المنتدى بطلب من الأخ الشاعر / ناصر شافي السبيعي أرجو أن تحوز على رضاكم
[poet font="Simplified Arabic,5,black,bold,normal" bkcolor="transparent" bkimage="backgrounds/16.gif" border="none,4,gray" type=0 line=200% align=center use=ex length=0 char="" num="0,black" filter=""]
الشعر له فاتل وناقض وفاروق = والسوق له سايم وشاري وبايع
واللي ربح ببضاعته يمدح السوق = والناس تطلب نادرات البضايع
يا مدوّر الطيب تخيّر على الذوق = وأحفظ معك من قول فارس ودايع
لو كان بالإرشاد والنصح مسبوق = ذكرى لعل لها ترق السمايع
جواهرٍ معها شذى المسك مرفوق = ومعها التجارب مثبته بالوقايع
واللي لبس من جوهر المرجله طوق = مثلي مجرّب والتجارب نفايع
سافرت لي طرقه وطبيت لي سوق = وخاويت في دربي جميع النزايع
والله خلق فالناس ميزات وفروق = الناس شتى بالشيم والطبايع
أحدٍ على مبدأ وله نظرةٍ فوق = وأحدٍ كما ثلجٍ على القاع مايع
ولاني وكيل آدم على كل مخلوق = لكن أشوف بخلق ربي نوايع
أشفق على الطيب ولي رفقته شوق = غريب وإلا من قريب الجمايع
وراع الردى من دونه الباب مغلوق = بيني وبين أهل السفاله قطايع
الطيب وأهل الطيب عاشق ومعشوق = والطيب له مبدأ وحكم وشرايع
والمرجله وهبه من الرب ووفوق = والدين رأس المرجله والطمايع
والرزق من ربي وله فرض وحقوق = ومن يطلب أرزاقه من الخلق ضايع
والأخذ بالأسباب ثابت وموثوق = وتوفيق ربي هو خيار الذرايع
ولا كل مطرودٍ كما قيل ملحوق = قولٍ مبالغ فيه لو كان شايع
إن ما جلبها والي العرش برفوق = كثر المطارد ما يحوش النفايع
ومن يحسن النيه مع الناس مرزوق = ومن يتقي ربه دروبه سنايع
والكذب ثوبٍ مايجمَّل ومشقوق = ولا ينرفي شقه بكثر الرقايع
ومن لا يحط أسرار قلبه بصندوق = ويجوَّد المفتاح عن كل صايع
يفتح على نفسه مداخل وخازوق = وقناصة الفرصه تزيد الجلايع
ومن يقرب الأنذال لا يامن البوق = النذل خاين ما يصون الودايع
عقرب ثرى وإلا كما ناب زاروق = لا صادف الغرات للسم زايع
وأحذر ترى النمام للشر ناتوق = دايم يقرَّب للشرار الولايع
من المكارم خارب القصد مسلوق = وعقله لنزغات الشياطين طايع
وترى الردي شمعٍ على الحيط ملزوق = لا أونس حميم الشمس جاك متمايع
أحذف ردي المعرفة حذف خملوق = لا تنخدع بالزبرقه واللمايع
عليك بالطيب ليا صرت مزنوق = اللي فعوله كلبوها روايع
يشيل عنك من الصعيبات طاروق = ولا يلحق المنه جميل الصنايع
لامن عن الواجب هبا كل مزلوق = يقوم بالواجب بعيد الرمايع
والشارب اللي ساعة الضيق محلوق = وقت الرخاء ما أحدٍ يبي له فزايع
خله ولو شفته على الوجه مصفوق = ولا تستشير مجالسين الربايع
وإن كان في صدرك قنا الوقت مزروق = خلك على الشده قوي البتايع
واضرب على الكايد ولا يلحقك عوق = وأطلع سنود وخير ربك طلايع
والشمس لو غابت يجي صبح وشروق = والحق له صيتٍ مع الناس ذايع
يقدم عزيز الساس لو كان مفهوق = ويأخذ عظيمات المراجل قلايع
وأبليس أخو مره مربَّط ومفلوق = وفي كل يوم يزود حر ولقايع
نركي على كبده مراقيع وحروق = وعروق قلبه من وحمنا مزايع
وصلوا على الهادي عدد ما أرمش الموق = وعسى لنا من جود ربي شفايع
[/poet]