الحرمه !

السلام عليكم ،




غنيّت من هجسٍ طرا في بالـي

هجسٍ ليا غنيّت له غّنـا لـي



لا فرّ دولابي .. وهـزّ اشواقـي

جريّت صوتي فـالطويل العالـي



من تحت رجلي يوم تاطا واطـي

ومن فوق راسي غترتي واعقالي



وفي عظم مخي شاشه وطباعـه

وبين الضلوع الحدب حاسب آلي



شاعر وسط في مركزي متوسط

حالي على قدّي وأقّـدي حالـي



ما اقول أنا راع الحصان السابق

لاشك مع عج الرمك .. خيّالـي



ومثايلي .. ماهيب دايـم جزلـه

وان جيت امثّلها كثيـر أمثالـي



مير العصا اللي في يدي عصايه

والوسم وسمي والجمال أجمالي



أقودهـا وأسوقهـا .. وأغنـيّ

والله يجملّهـا مـع الجمّـالـي



أرضى بنقـد الناقـد المتمـرس

الواعي اللي ماعليـه اشكالـي



واصدّ عن هرج الهبيـل الحاقـد

اللي يصب المرّ فوق الحالـي !



أنا سمعت أعـن الزمـان الأوّل

وأنـا تحديّـت الزمـان التالـي



لي لابه وعزوه وربـع وديـره

ماني مع جـرد الفيافـي جالـي



تاريخ ثابت والعرب تـدري بـه

يوم الهلالي .. يحتميه أهلالـي



أرد عن خالي سوالـف عمـيّ

وأرد عن عميّ سوالـف خالـي



والطيب أحبّـه واحتـرم جلابـه

وأدورّه بـجنيـه وإلاّ ريـالـي



وعلى سلومي ما تضيع علومي

ووصاة ابويه شلتهـا لـعيالـي



والناس خلق اجناس لكن يبقـى

اللي عليه العلم .. راس المالـي



من سبنيّ من شان قولٍ قلتـه

لسانه اللي يفرده وش قالـي ؟



أمّا رضيـت بـحقّـه ومعدالـه

وإلاّ عليه الحـقّ .. والمعدالـي



ماهـوب مفنينـي ولا محيينـي

لا قام يركـز ساقـه ويبرالـي



أمرٍ طبيعي لـو تغـار الحرمـه

مير البلا من غيرة الرجّالـي ؟



تموّا على كسب الجميلـه تمـوّا

ماعاد تنفـع حيلـة المحتالـي



الله يكثـرّ خيـركـم ويديـمـه

فازوا بـالأولى محتمين التالـي



استغفر الله يـوم أعـدّ ذنوبـي

وأضيق لا ضاق الحبيب الغالـي



بيني وبين الحب وقفـة خاطـر

خلاني أعـدّ الهجـوس لحالـي



يا اللي وردت الجمّـه المردمّـه

راحت حبالك تلتوي فـحبالـي



صدّرت عنها والخواطـر طابـت

اللّه .. ولا دلو ٍ تطـقّ الجالـي



وسلمتوا ،