مــــــن واجــــــب الخوه

[poem=font="Simplified Arabic,6,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
يا من تشاورني وبيّنت خافيك=ان قلتلك كلمة صحيح احتملها
لاطالني مرك ولاذقت حاليك=خوّة صدف وقتك جديراً بأجلها
ومن واجب الخوه ابرك واداريك=واضغط على نفسي واخفي زعلها
ولابد ما تقفي وغيري يخاويك=ويبين لك نجاحها من فشلها
من خبرتي توّك تجرب مساعيك=وجديدها ما يخبرك عن سملها
اصبر ودورات الليالي توريك=وتاخذ عبر بحداثها وتعقلها
لكن انا بعطيك نبذه ووصيك=والباقيات الله بغيبه كفلها
من واقعك لاتبني الا مباديك=اللي يجنبك النفوس وجهلها
ومن الخيال ابن المداين بياديك=وبعد البنا هد المداين بهلها
وارفع مقامك لايجي فيك تشكيك=ثقتك في نفسك يقلل زللها
واحذر تجامل واحدٍ ما يدانيك=لوحاجتك دونه ضعيفٍ أملها
ترى الدسائس بالعمل ما تعليك=اختر جزال سمانها عن هزلها
عملك بعيون الرجاجيل يحييك=وان كلفوك بكلمة الحق قلها
ولاتلتفت للي مضى من لياليك=ما فات مات وقولتك لو زلها
اللي يفوتك فات غيرك وقافيك=امور وان فاتتك دوّر بدلها
وخل الطمع دايم عدوّك وتنبيك=دنياك عن ناسٍ طمعها خذلها
رزقك مسجل وانت في الرحم ويجيك=وارزاق غيرك ماتجي غير اهلها
كل الامور مثبته عند واليك=وروس القمم ما خلدت من وصلها
دنياك لوتضحك بوجهك تبكيك=والنفس ماتدري متى وقت اجلها
انصحك لاتركض وراها وتغريك=هذا رحل عنها وهذا نزلها
اللي يمشي ركب غيرك يمشيك=والباقيات الصالحات وعملها[/poem]