مطاليق الوجيه

لاعاد تنشد من جديد الشعـر يمـال الغنـاه
مفتاح هاجوسي مايفتح بـاب معنـا مايبيـه
حرام انزّل مستواي وعيب أنـزّل مستـواه
وأزعل مطاليق الوجيه وتفرح قصار الوجيه
اللي على قيد الحياه وكن ماهي في الحيـاه
الشك يدخلها على هرج البناخي لبـن أخيـه
ياطيبهم في شذبة المقفي ليا أعطاهـم قفـاه
أهل الردى اللي من رداها كل غايب تقتفيـه
هاذي طبايع محتمين الشاه وأعيـال العبـاه
حدب الظهور وطمعة الحنشل وصيدات النبيه
والبارحه عاد العما يطمر ويرثع فـي عمـاه
يبي المراجل والمراجل منّها تقصـر يديـه
اليا برك قلنا جمل واليـا هـدر مالـه لهـاه
ماهوب راس انتاج واليا جلب محدٍ مشتريـه
وياأصحابنا مايرخص الغالي وينقص من غلاه
الاّ ليا من طاع في الطيّـب ردي ولاّ سفيـه
يصدّقـه فيمـا يقـول ويستنـد للـي رواه
من طيبه الزايد يصدّق كـل ماقالـوه فيـه
هذا هو الجرح العطيب اللـي يتعبنـي دواه
زلّة رفيقٍ كـل ماباعـوه هـرجٍ يشتريـه
واللي مصبرني على عوجـه ولا بيّـن رداه
أقصاه طيب وفي الكرم والمرجله ماله شبيه
ابذخره من طيب راسه وآتغاضا عن خطـاه
لين المنايا سهمها يومـي علـي ولاّ عليـه

وليه ماننشد عن جديد الشعر يامبارك ؟؟

إلاّ نبي ننشد ..وننشد ..ونستفيد

لأنك لاتأتي إلاّ بالمفيد ..

تقبل تحيتي ..

أبوشاهر