مركــز الدائــرة

[POEM="font="Simplified Arabic,5,darkred,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]يازايره بعد مل الشوق والإنتظار=وشلون جيتي بعد طول الجفا زايره
ياما خذتني مواعيدك لكل الديار=لفيت الأقطار خلف وعودك البايره
وياما حزمت الحقايب من مطار لمطار=وياليت في الكون شي اسرع من الطايره
تقبل وعودك وتشعل داخل القلب نار=وتقفي وتترك بعيني دمعةٍ حايره
في كل مره تعذبني ظنوني واغار=واعصى ظنوني واطيع الشوق واسايره
لين إقتنعت إن نجمك في فلك وإستدار=يدور حولي وانا في مركز الدايره
أطلب قرارك بدنيا ماعليها قرار=تدور الأفلاك ونجوم السما سايره
ورجعت للخيره اللي ماعليها إختيار=تبري الجروح الصغار وتردم الغايره
ونسيت مدري تناسيت الهموم الكبار=اللي تفجّر براكين الحشا الثايره
واليوم جيتي مثل شمسٍ بوضح النهار=في بالك تجين ودلال الغلا فايره
صبيت عقبك دلالي فوق جمر الوجار=ولاتسألي عن حياتي كيف هي صايره
ماكل جرحٍ يكفر ذنبه الإعتذار=بعض المعاذير مثل احكامك الجايره
ماودي اشوف فيك الذل والإنكسار=وإلا تشوفين فيني صوره مغايره
إبقي معي يابعد منهو تفضل وزار=وإلا إرحلي في وسيع العذر يازايره[/POEM]