(( ونّه على المسحوب !! ))

السلام عليكم
أسعد الله جميع أوقاتكم

هذه المتواضعه تطلب من اذواقكم الرضا و القبول


[POEM="font="Simplified Arabic,4,black,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black""]خِيال الخَيال تسوقه رياح فكري ، صوب=محيّر عقول الناس باسلوبه وفنّه
على صورته فالبال ، مزن القصيد نصوب=لبرّاقها نوض ، ولرعّادها حنّه
مطرها ، بيوتٍ لوحها بالذهب مكتوب=وفا معرفة من ذاب ظنّي على ظنّه
حسين الدلال اللي سلب مهجتي باسلوب=سميّه ، غيابه في حساب البدو كنّه..؟
لحظني بعينٍ بان في رمشها ملعوب=سروق النظر ، مشفوح الاعيان ماشنّه
وهو عارفٍ سرق النظر، منه سرق قلوب=اداةٍ يصخرها على مثلي تقنّه
قفيته بونّه ، قال ونّه على المسحوب!!=يبا يستثير ، وقلت مع تالي الونّه
انا والله المسحوب يالجادل الرعبوب=ماهوب الغنا بالقاف واللعب بالشنّه
انا اللّي وقع باقصاه في فخّك المنصوب=معاناه ، واشكيها على راعي العنّه
ضحك من جوابي ضحكة الواثق الموهوب=تحت لثمته ، لاح الكرستال في سنّه
وكشف لي نعيمٍ عن عيون الملا محجوب=انا أستغفر الله ( عيّنة حور) يمكنّه
ولفحني نسيم شفاه واللولو المصبوب=بمنطوقه اللي من مذاق العسل كنّه
وقال الكلام اللي عليه القلوب تذوب=ماعمر انّي اوحيته من الناس والجنّه
هذا منك وانته مابعد صرت لي محبوب!!=اجل وش تسّوي لو ادخّلك فالجنّه.؟
ادخّلك جنّة لذّتي لو عليك ذنوب=واخلّيك تقطف من ثمرها بلا منّه
اجبته ، وانا في موقف الحاير المغلوب=وحالي صواديف المقادير يطونّه
ترا ماقسِم لي منك ، ياغاية المطلوب=ياكود انّ حبّك فرض ، ومشاهدك سنّه[/POEM]