اهـــديــك قـلــبــي

السلام عليكم ورحمة الله وبركاته

ابيات متواضعة للتواصل مع قلوبكم

[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
دنيا الهوى جنة ولكنّ تلحقها ملاحيق = ان ما حصل فيها وصل عودت نار ٍ لظية
ولولا الهوى والشوق ما ضاقت صدور المخاليق= ولولا الهوى ما صار للعمر طعم وقابلية
وانا وسيع بطان لكن حاديني على الضيق = الصد والهجران من صاحب ٍ ضيق عليه
وان ضاق صدري قمت اكوسر بعذبات الطواريق = وجريتلي مسحوب والا جذبت السامرية
واغيب لا غنيت مع ذكرياتي نوب وافيق = وان فقت عشت الوقت ما بين جرح وبين كية
ياللي جرحت القلب ليته عليه تطل وتويق= وتشوف وش سويت بالهجر في نفس ٍ برية
ياصاحبي ياصاحبي ليه خالفت المواثيق = صارت سجيتك الجفا والوفا فيني سجية
نظرة ولا بعد التراميق ياكود التواهيق = ملكت قلبي بعد ما كان حكمه في يديه
قلب ٍ شبع من ضيقته مير من وصلك على الريق= وجهك وهمساتك له الزاد والعد الروية
القلب طير ٍ فز وعيونك النجلا مسابيق = وليا كفخ تلنه عيونك النجل الجرية
والذكريات امزان واشواقي غصون ٍ مدانيق = تقطف ثمرها يالغضي صبح ٍ وليل وعشية
متى تحن رعودك وتمطر غصون ٍ مدافيق = وترخي ثعول الوصل يالترف وتهل برديه
وبعد المحل ترجع حنايا الصدر خضر ٍ مواريق = وتنبت فياض العشق من بعد ما كانت سنية
وان شفت وصلك يالغضي دونه ابواب ٍ مغاليق= والياس من دون الرجا حال ابا اهديلك هدية
اهديك قلب ٍ منه بالصد جذيت المعاليق = هدية ٍ ما ابغى وراها بعد جاتك جزية
والله عليه يعينك ليا حرقك الشوق تحريق = وصار الحطب ناحل ضلوعك ونار الشوق حية
اصبرليا خلاك سهران وعيونك مغاريق = وخلا فجوجك ضيق من عقب ما كانت خلية
وانا ابسج الرجل حر ٍ مع احرار ٍ مطاليق = من دون قلب ٍ بالهوى ولع النيران فيه
وارتاح من شكوى المحبين واهات العشاشيق = لو كان ما للعمر بعدك مزاج وقابلية[/poem]