(لا تنشدون العين عن دمعة العين) مرثية في الفقيد مشعل غالب الهدباني المطيري

المشاركة الأصلية كتبت بواسطة عبدالمعين حمود العضياني

السلام عليكم ورحمة الله وبركاته
تحية عطرة لكل مرقابي وأقدم إعتذاري عن الغياب عن هذا الصرح الشامخ
هذه أبيات قيلت في رثاء الأخ الشاعر / مشعل بن غالب الهدباني المطيري رحمه الله

[poem=font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=1 line=1 align=center use=ex num="0,black""]
لا تنشدون العين عن دمعة العين = دمعٍِ تحدّر مادروا وش علامه
دمعٍِ تحدّر والسبب فقد غالين = فقدت هامه وأي هامه وهامه
مات الصديق الصادق اللي على الدين = والحزن خيّم في بلدنا ظلامه
مات الصديق الوافي إبن الوفيين = مات الصديق اللي نكن إحترامه
مات الكريم أبو الكرم وأحمر العين = مات الوفي راع الوفا والشهامه
أخوي مشعل مات طلق الحجاجين = وفي ذمتي محد(ن) يسد بمقامه
يا أصحابنا يامطير خص الهدابين = شرق البلد غربه جنوبه وشامه
الله يعظّم أجر هاك الحشيمين = أبوه وأمه والخوال وعمامه
أنا أشهد إني فاقده يالذويين = أصفق بكفي فوق كفي ندامه
وأقنب قنيب اللي بروس الضلاعين = وعزّي لمن مثلي تقطّع حزامه
حسبي على اللي حط فالقلب سكين = لاسامحه ربه ليوم القيامه
شلّت يمين اللي فعل فعله الشين = كفٍِ طعن مشعل فلا له سلامه
مرحوم يامشعل عدد ماالمصلين = صلّوا وطافوا فالحرم بإستقامه
مرحوم ياراع الوفا والنبا الزين = مرحوم ياللي ما يعيل بكلامه
نعم الخوي وقت القسى وحزة اللين = مايلحقه منّا ملام وملامه
يالله عساه بجنة الخلد وآمين = وعسى الجنان الخضر مثوى عظامه
[/poem]

اخوي عبدالمعين

اولاً/ حياك الله بعد طول غياب

ثانياً/ صح لسانك عدد حروف هالجزله

ثالثاً/ رحمة الله على مشعل الهدباني
و نعم الرجل و أنا أعرفه معرفه شخصيه و كنت من القريبين منه وقت وقوع الحادثه
و صدقني مدامنا في دولة تحكم بشرع الله، ما على دمه خوف، و الجاني بيآخذ حقه
الله يلهم أهله الصبر و السلوان ويجبر مصيبتهم
والله يرحمه و يسكنه فسيح جناته

أشكرك مره أخرى أخي الوافي عبدالمعين
و الوفاء ما يستغرب من الأوفياء أمثالك

تحياتي،،