عذر مكرّر..!

مـدري اذا تدريـن باللـي فـي بالـي
ولا تبـيـن آبيـنـه قـبـل لا آروح!
كنت اذكـر انـي راسمـك فـي خيالـي
ظـل وحمـام ابيـض وتغريـد ومـزوح
ما كان حالي قبل اعرفـك بـ( حالـي )
ولا كان شكلي قبل لا اعرفْـك مملـوح!
جيتي وجبتي لـي جـواب لـ( سؤالـي )
من يعطي لـ( سيّد ضلوعي ) بعض روح؟!
لكن قبـل لا افـرح ويكمـل وصالـي
طار الحمام وشح بـ( الفيّـه ) الـدوح!
قلبك رحـل ، وانـا هنيّـا بقـى لـي
حزن وبقايا حلـم وإحسـاس مجـروح!
شمّاعـة اعـذارك ( ظـروف الليـالـي)
لو إنها عـذري فـلا نيـب مسمـوح!
حتى لو انه جاز لـك .. مـا طـرى لـي
اتذرّع بـ( عذرٍ ) مكـرّر ومفضـوح!!
لكـن علـى كـلٍ .. اعـذرك ولا لـي
الا اطعن بنصل الجلـد طـاري النـوح!
جيتك وصمت الحزن يصرخ بـ( بالـي )
ابوح لو ما لي ورى البـوح مصلـوح!!
اقنعـك ولا مـا اقنعـك .. مـا أبالـي
اصلاً انا فـي كـل الاحـوال بـآروح!




الله الله الله

ابو فليّان والله انها ابداع في ابداع يامجررررررم
تصدق اني قريتها ونسخت اول بيت بعدين قريت اللي تحته ونسخته
واللي تحته قلت هاه ؟ خلني انسخه إلين وصلت إلا اني انسخ القصيده كامله
جدد الاعجاب يامبددددددددع