منازل الانجم وطلاّت الأبدر

قصيده في ابل الاخ / سعد بن غازي العضياني

الحاصل على المركز الرابع في مهرجان ام رقيبه



[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=0 line=1 align=center use=ex num="0,black""]
المجلس اللي شيّده راعي الشول=زام ٍ عى البيدا كما الضلع الاشهر
دونه جناح الطير يفتر من الطول=وروس المبان الشامخه معه تصغر
فيه الكرم والطيب والشيمه انزول=وجه الكرامه والمقام المعبّر
هذا محل اللي بوقفاته يطول=منازل الانجم وطلاّت الأبدر
الارض فيها السبعه الأبحر تهول=وسعد بطيبه ثامن السبع الأبحر
راعي مغاتير ٍ ليا جات زعجول=تعمر لها اقوام ٍ واقوام تدمر
متوسطي اسعارها جاوز النول=حتى الحوار يجيب مليون واكثر
الشاعر بتوصيفها وش يبا يقول=لاسلط الهاجوس تسليط مجهر
وضح ٍ تشوق قلوب وتحير عقول=لاوصفتها السن ولدت لها انظر
فـ.اليا سطعتها الشمس تلمع كما اللول=واليا عمدتها الشمس تلمع كما الدر
ظهورها جبال ٍ مفاهيق وميول=عنها العصي لو ترتفع فوق تقصر
ان بركنّ خيام وان جلعن جول=واليا استهادن مشيهن مشي عسكر
يوم اقبلت للعرض والكل مذهول=معها ثمانمية مواطن معسكر
جمع ٍ يسير بهيبته كنه اسطول=يضيق من مواكبه كل معبر
اثر مسيرتها بيبقى ليا الحول=يوم استقلت والمصور يصور
عدوها في كل الاقطار معلول=ومحبها في كل الاقطار يفخر
هذي هي الوقفه على حسب الاصول=وهذي هي عتيبه لها المجد الاكبر
قبيلة ٍ بامجاد وعزوم وفعول=تشابه الشهر الفضيل من الاشهر[/poem]



وســـــــــــــلامــــــــــــــــتكم