حديث (( العائر )) .. !!

:
:


نطح المرجلة 1 / 4 :

حلم (( النجمة )) .. !!

تخرجت من الثانوية العامه بتقدير جيد جداً .. !!
وماكان في بالي الا هدف (( نطح )) المرجلة ..
اللي كنت اسمعه عنه كمصطلح نظري وابي اعيشه عملي ..
بعد الثانوية تأكدت ان راسي بات (( صلباً )) .. لنطح المراجل .. !!
كان لدي طموح أن اكون (( ضابط )) في احدى القطاعات العسكرية ..
قدمت على كل الكليات العسكرية : الحربية - الجوية - الأمنية - الحرس الوطني ..
جميعهم رفضوني الا كلية الحرس الوطني ..
اعطوني موعد للأختبار الاول اختبار اللياقة .. وكنت مقدم انا وزميل دراسة / وحارة لي ..
قبلوني ورفضوا زميلي لأن معدله (( جيد )) زميلي ولد ضابط في الحرس ورغبة في الكلية مهيب اللي ..
كان يبي يصير مدرس .. لكن ابوه يبيه ضابط .. !!
اخذته وخمينا جندي من قبيلة زميلي وقلت هذا فلان ولد هاك الضابط ..
والجندي يرتبع وياخذ ملفه ويعطيه موعد اختبار اللياقة قبلي بيوم ..
جيت انا في موعد اختبار اللياقة .. ولقيت اسمي مع كشف اللي اختبروا امس ..
ودخلت على المسئول هناك وقلت هذي ورقة الضابط اللي عطانيها ..
قال الضابط غلطان .. قلت : وش ذنبي .. ؟؟
قال : اقضب الباب .. ياعسكري .. !! <-- متعود المسئول ان كل الناس عسكر .. !!
قلت : بعد ماشقت ابتسامة محياي انا توني ماتعسكرت .. لكن .. أبشر .. !!
وطلعت بعد ان طار طموحي ان اصبح ضابط ..
لكني اكتشفت أني نجحت أكون (( ضابط )) نفسي ولاتنفحس تسبدي على النجمة .. !!
نسيت اقول لكم وش صار على زميلي .. !!
زميلي الأن (( رائد )) في الحرس الوطني ويتحدث الأنجليزية بطلاقه .. !!
بس لازلت أضربه .. !!


للحديث بقية .. !!

*

كنت في صف ثاني ابتدائي، وكان معنا طالب فلسطيني اسمه (جهاد)، ابوه (وكيل المدرسة)
وكنا نخاف منه لسببين : الأول أن ابوه (وكيل المدرسة) وعصاه دايم في يده !
والسبب الثاني : أنه قووي ولاينحرز ( يضرب فالزيتون والزعتر ) كل صبح !

المهم أني كنت أتحاشا الإحتكاك معه، لأنه كان (مليقيف) ويسطّر اللي يجي قدامه ههه
وماخلاّ احد ماسطّره، المهم أني كنت واقف جنب ( طاولة المدرّس ) ، والمعروف
أن طاولة المدّرس ( هي الشداد ) ههه ، اللي يوقف جنبها يُعتبر ( نوعاً ما قوي ) !

المهم أن (جهاد) جاني من الخلف مسرع (وصقلني) لياني تحته وهو يبرك في حلقي

منّا منّا ، مآآآش ، مثبتني (الزلمه) صح !! ومن حسن الحظ أن (أخوي) اللي في ثالث ابتدائي
كان عنده ( حصة رياضة) وواقفين عند باب صفهم ( يحترون ) مدرسهم يجي ! صاح له خوّيي
وقال أخوك (تهاوش)، جا اخوي يمشي ميتين، ويوم دخل الصف ( وليا الزلمه ) لازال يمارس
أنواع الظلم والإستبداد ( بارك في حلقي ) وانا ماغير ( ألعّن واطالب ) وأقول ( لانجوتَ
إن نجوتُ )ههه، صاحت مجموعة من الطلاب ( جاااك جاااك ) ، التفت ( جهاد ) وليا ( الفنقر ) ( والجوتي ) اللي نشب في وجهه !
وانا اقول في نفسي ( بعدي والله ياخووي ) <- على الطريقة الطفولية طبعاً

طاح (جهاد)على جنبه ( ماسك وجهه ) ويصيييييح، وانا اقوم ( اشوّته ) على جنوبه ورجلينه
ويدخل علينا المدرس وهو يلقط ( جهاد ) ويطلع من الصف ، ليا الدم ( مخربط خريطة وجهه )


جلست أعيش الخوف ونشوة دفع الظلم والإنتصار ، قلت هالحين بيجي ابوه ويتقاضى منّي،
والوراعين ( مستانسين ) ويقولون ( يااااااااويلك من ابوه ) هههههه

اخوي الله يجزاه خير ، كان دوره في الفيلم ( دقيقتين ونص ) ، جا ( شآته ) على وجهه وطلع !
كنّه يقول ( اخذ حقك بيدك يالرخمه ) هههه


المهم جا الفراش وعطا المدرس (ورقة)، قال المدرس: وووين هالزلمه محمد صالح

قلت نعم <-- بصوت مليااان رعب

قال : امشي ولااا للنازيير ( يعني رح للناظر ) !

ويوم وصلت مكتب الناظر ( مع الفراش ) وليا اخوي واقف برّا
وحنا اللي ندخل مع بعض، وليا ( جهاد ) ماسك نص وجهه ( وفمه ) منتفخ
وثلث (الشاش) طالع من فمه! أثر ( الشوته ) طيّحت من سنونه ثلاث ! وابوه
جالس جنبه ( الوكيل )!


وهو يشخط فينا الناظر، نسيت وش قال بس اذكر اني ( بكيت ) <- لو بكيت دموع عيني ماتفيد هههه

وقال يالله سلموا عليه وتعذروا منه ، وحنا نسلم عليه، والوكيل اللي ذالين منه ( ساعدنا ) في حل
المشكلة.


من عقبها صرت أنا أقوى الصف، وتراجع جهاد للمركز الثاني هههه


الشاهد ان اخوي يوم طلعنا من مكتب الناظر يسألني ( ليش بكيت ؟ والله لا أعلّم عليك ابوي ههه)
قلت : انا خفت لا يضربك الناظر ( لأنه كان ماسك عصى )، قال ولا عشانه بيضربك !
قلت لا، أصلاً انت اللي مكسّر سنون جهاد وبيضربك انت <-- جحد المعروف


هذي من الذاكرة (أيام زمان)
وبسس

8
8


ههههههههههههههههههههههههههههههههههههههه
الله يرج ابليسك يازلمه
اما بكيت خايف ان الناظر يطق اخوي هههههههههههههههههههه


قصه جميله يابوتركي


..

^^
^^
^^

^


ههههههههههههههههههههههههههه كفو يـ \ يالزناتي ههههههههه

أضحك الله سنك يامحمد , بس تهقى أنه مفعوووول الزعتر و الزيتون , و معكرونة بالبندوره خخخخخخخ

فـي عام الـ 2007 تقريباً في كلية المعلمين , [ قبل لا تصير تابعة لـ جامعة الملك سعود ]

مالكم , ومال الطويله ههه ,

الترم الأخير , ترم التطبيق , في إحدى المدارس بالرياض , حان وقته , وبدأ التشمير , و الإستعداد ,

و الإجتماع مع المشرف , لـ تزود بالنصائح , ومن نصائحه التي بقية خالده في الذاكره , وراسخه ,

يقوول حفظه الله , ترى سيطرتك على الصف , تبدأ من الحصة الأولى لك , إذا أفلحت في هالحصه , أفلحت مع المفلحين , و إذا ضاعت من يدك يخلف الله علاك ,

أهم شي , مالكم و مال الطويله نزلت أسماء المدارس و الطلاب الي يطبقون فيها ,

وجاء أخوكم , يدرعم راسه , فرحان , حـ يعيش الواقع المئمول المنتظر إلي ذا الحين ,

المهم طلع أســمي , أنا وصديقي في مدرسة البيروني , Icon21 ولكم الله , من لا يعرف البيروني , يمر بس مع الشاعر و الكتاب بين من عنوانه , زحف مراهقين , وعرابجة النسيم على أصووله في تِلك المدرسه ,

بدأ يترنح في مخيلتي بيت عنتر بن شداد ,
ولأَجهَدَنَّ عَلى اللِّقَاءِ لِكَيْ أَرَى @@ ما أرتجيهِ أو يحينَ قضائيِ

أخذت , أنا وصديقي , أوراق التطبيق إلى المدرسة , وصلنا المدرسة , وإذا هي شاهد ماشافش حاقه

على الباب باللون الأحمر , زحف , حتى الحتف , قال صديقي , من البداية حتف :bomb:

المكسيما تلعب , والحكومة تتعب الله يستر ياصديقي , حتى الحكومه ,

داخلين داخلين , يالبيروني الله لا يعوق ,( وما هالَني يا عَبلَ فيكِ مهالِكٌ@ولا راعني هولُ الكميِّ الممارس]

دخلنا مع البوابة , و إذا أمامنا باب محزم بالـسلاسل و مقفل , تقول داخل معتقل , مش مدرسه

والحارس , حالك الوجهه , عبوس , و العجرا في يده , قلت لـ خووي شاهد مشافشش حاقه ,

سلام عليكم ,

عليكم السلام , ماشاء الله , وش بغيتوا ,

قال صديقي : إذا كان أمرُ الله أمراً يُقَدّر## فكيفَ يفرُّ المرءُ منْه ويحذَرُ

ياخي , وش بغيتوا ,

رديت : بغينا المدير , محدثينك , مدرسين جدد في المدرسه :in love:

هلا بالمدرسين , ومعها سحب سلاسل الباب وفتح قفل الباب ,

تفضلوا , المدير , قدامكم ,

شكراً , بيض الله وجهك , على حلو الإستقبال , الله يذكره بالخير , وينه وين الإستقبال ,

وإذا بـ المدير , في وسط فناء المدرسة يزئر , حاملاً , ليْ تسليك الكهرباء ! الأحمر ,

لسانُ حاله يقول {وليس سباعُ البَرّ مثْلَ ضِباعِهِ## ولاَ كلُّ مَنْ خاض العَجاجة َ عَنْتَر}ُ

والوكلاء ثلاثه , و كل واحد معه لي أحمر ,

ولسانُ حالهم يقول لنا ؟ , [ ولاَ تختشوا مما يقدرُ في غدٍ## فما جاءَنا منْ عالم الغيبِ مخبرُ]

سلامنا على المدير , عرفناه على أنفسنا ,

رحب بنا , وتمنى لنا إقامةً سعيدة فـ المدرسة , أخذنا إلى مكتبه , وبدأ يشرح لنا ,

عن المدرسه , وحالها , و الظروف التي , تأخذ و تعصف بها ,

بدأ , يـ يلقي نصائحه , أخذو حذركم , ليكن التعامل مع الطلاب , ب حذر , لا إفراطً و لا تفريط ,

لا شده , ولا لين , قلت في نفسي , و ينا وين الين , و هذي بوادرها , زحف حتى الحتف

قال , عندكم فـ صلين واحد يأخذ , أولى و احد ثاني ,

أسـ تقر الوضع , أني أخذت أولى ثانوي , و صديقي , ثاني ,

و قال , ماتشوفون , شر , وموعدنا غدً , تأخذون , الجداول ,وتبدون , دروسكم ,

خرجنا و لسانُ الحال , يقول (( إِنَّ الأُمورَ إِذا اِستَقبَلَتها اِشتَبَهَت ## وَفي تَدَبُّرِها التِبيانُ وَالعِبَرُ ))

(( أعلقمُ قدْ صيرتني الأمورُ ))

جاء غداً , و جينا , محملين بـ هم الحصه الأولى !

كل واحد , أخذ جدوله , و إذا , بالحصه الأولى , عند 2\1 , ثاني أول

أخذت نفس , و مشيت إلي القاء المووعود , و ليس في مخيلتي سوآ إذا عدت الحصه الأولى على خير , عديت على خير ,

وصلت باب الفصل , وقفت عند ألباب لحظه أستجمع قواي , لدخول خاطف هههههه يوقض النائم , ويرعب الصاحي ههه

سحبت الباب بـ اقوى مـا عندي من حيل و إذا الباب على جنبه ههههههههه دخلت على الفصل وحذفت

الكتب و الملف على الطاوله بشكل يرعب و يرعد الفرائص هههه و يحمل الشر هههههه

وقفت امام الطلاب و قفت الحجاج أمامأهل الكوفه هههههههههه و المثل يقول الوقوف أمام السيوف ولا الوقوف أمام الصفوف

بدأت النظرات تتوزع على الطلاب , و لسانُ حالهم يقول وش هالمصيبه الي جااانا , يالله صباح خاااار

حنا وان بلااانا الله بـ هالمصيبه , صادت نظراتي , أحدهم نائمً على الطاوله

أنطلقت نحوه , و رفعت يدي , وخبط على الماصه , هههههههههههه والله لايعيدها من خبطه

أول ما أختلف عندي , أعصاب المخ , من قووو الخبطه والماصه طالع لها زوائد , خشبيه , وإذا هي لاحمه في يد الحجاج هههههههه , وإذا بيد الحجاج تقطر دماً , و إذا بالضحكات يمنةً و يسره ,

وهيا يالحجاج بقطها الحين ,

هذاا موقف لازال يزورني بالحينه والأخرى ,

وأبشركم , نزعت سياسة الحجاج , و دخلت بالسياسه الدمُقراطية ,

ومقولة أهم شي الراحه و حب الوطن ,

وترديد البيت التالي على الطلاب حتى صاروا إذا شافوني فـ الأسياب يقولون

, فـ الأدامي لولا المكارم و الأخلاق ’’’’’’’’ كالحنظلة من ساسها لا ورقها !!

و سارت الأمور على خير ,

وأنتهى التطبيق , و فتكينا هههههههههههههههههههههههههه

[ طرآ لي , أحد الشيبان في الفصل , و البعير جايكم يـ \ أصحاب العائررر ]

,

المشاركة الأصلية كتبت بواسطة مصلح بن نميان

وترديد البيت التالي على الطلاب حتى صاروا إذا شافوني فـ الأسياب يقولون

, فـ الأدامي لولا المكارم و الأخلاق ’’’’’’’’ كالحنظلة من ساسها لا ورقها !!

و سارت الأمور على خير ,

وأنتهى التطبيق , و فتكينا هههههههههههههههههههههههههه

,

اهم شي النتيجه النهائيه :Icon29:

مدري يا مصلح احس ان الطلاب الان اذا شافوك يقولون (يامل قلب ٍ يسج وفيه دولاجه )

ابو تركي


ابن نميان



قصص رائعه و مواقف مضحكه


لا هنتوا



اخوكم



ش. س.


<< يجرّب الركاده

:
:


نطح المرجلة 2 / 4 :

ليت لي (( بنز )) يدك البيد .. !!

الفرق بين أم الحمام والعليا أن أم الحمام في بطن (( وادي )) ..
والعليا على شفته .. لذا من يريد العليا من أم الحمام عليه أن يتسلق تلك الشفه ..
الأن ذابت الشفه مع القرب العمراني ..
(( تغرشدت )) تلك الشفه .. لكي أذهب الى مكتب التوظيف في قلب العليا ..
وتحديداً على ضفة شارع التحلية الجنوبية ..
والغرشده لمن لايعرفها هي التسلق بالشعبي ..:Icon29:
بعد أن طار حلم (( الضبطنة )) قلت أبحث عن وظيفة مدنيه ..
سرت مسافة تصل الى أكثر من 5 كيلو متر ..
وخلال هذه المسافة كان هناك مساحات شاسعه وخاليه من البناء ..
وقلت أختصر المسافة من خلال شق هالمساحات (( بر )) ..
وحلال مسيري (( توطيت )) منطقة كلها شوك ..
المهم نشبت في الرجل والثوب ولو ماصادف ان حولي زفلت كان بلشت بها ..
لأني احتجت أنقز الى مسافة 10 امتار عشان أصل للأسفلت ..
جلست على حصاة وقمت أنقش الشوك وخلال عملية (( النقش )) على كف القدر ..
تفاجأت بسيارة مرسيدس لونها كحلي وموديل السنه ..
يقودها صبي عمره لم يتجاوز الـ 15 وأبوه بجانبه يعلمه السواقه .. !!
<-- يتعلم على مرسيدس ونص ربعنا متعلمين على ددسن ماله استمارة .. !! :Icon29:
المهم الورع قام يروح ويعود كنه يبا يغيضني ..
وابوه كني اشوف غترة متحمس ويعلمه .. !!
المهم خلصت من (( النقش )) وكملت السير .. !! <-- رجليني تيوبلس .. !!
وصلت مكتب التوظيف وسألت عن الوظايف واخذت استمارة وظيفة على المرتبة الرابعة ..
وكملت البيانات واعطيتها الموظف وكان ناقص خانه .. وسألني الموظف عنها وعلمته وأخذ قلمي وكملها ..
وقمت اسأله عن الراتب وقام يجاوب مع ابتسامة (( برتقاليه )) ابتسامة الزريه برتقاليه ..
وقال أن النتائج بتطلع بعد شهر ..
طلعت من عنده ويوم وصلت لمنطقة النقش فطنت أني نسيت القلم .. قلت ماعليش ..!!
بتجي الوظيفة وابا أطق درزن اقلام .. !! :sniper56:
رجعت بعد شهر .. وصلني واحد من جيراننا .. وجيت اسأل عن الوظيفة ..
قال الموظف : قال تعين عليها واحد .. قلت : طارت .. ؟؟
قال : ايه .. !!
قلت : وين القلم .. ؟؟ سكت الموظف : ولسان حالة يقول (( طار )) بعد يـ (( طبل )) .. !! :Icon29:
بس تدرون عندي تساؤل :
الورع راع المرسيدس يوم جاء يتوظف بعدين ضيّع (( قلمه )) والا لا .. ؟؟

مِسَاحَة غَنّاء
بِحَديّث فَايّت الأيَام
بَعْدَ وِشَايَة ذِكْرَى
ووشْوَشَة حَرف ,,,
وفِي لَحْظَةِ إنْدِثَار ..؛
لِذلك الحَاضِر مِن الآن ,,,



القدير ,,, عبدالرحمن حمد العتيبي
لـ الأنْقِيّاء أمْثَالك
تَتكَاثَر الرُدُود والورود ,,,






؛

أوُلُ إقْتِنَاءاتِي
وأسْرَعُهَا للضَياع ,,,







فِي عَام الطُفولَة البَريّة
وبَعد رِحْلَة إقْتِنَاص طَوِيّلة
إسْتَمرَتْ الى الأفوّل ,
وتَكَلْلتْ بِذلك الكَائِن الخَجُول ,,,

ليِكوُن اللِقَاء بَيّنَنا أشْبَهُ بِالحُلم ..,
أتَى لَيّلاً وغَادَرَ قَبْل الشُروق ,

فـ بَعدَ وصُولِي بِأمَان
حَمَلْتُ ضَيّفِي , ووضَعْتُه بِرفْقٍ وحَنان
فِي فِنَاءِ الدَار , وعَلى إسْتِعْجَال ..,
وأخذتُ إحّكَام غَلّقِ الأبْوَاب ,
ولم يَخْطُر بِبَالي
أن يَتسَلّق الجِدَار .., هَرباً
مُربكاً خَلفَهُ كياني
بين عجبٍ وإستنكار ,,,

واسْتَمرَتْ هِوَايَة الإمْتِلاك
مع اسْتِمْرَار عَثْرَة الفَقْد ,,,








؛

ابو حمد :

هههههههههههههههههههههههههه

انا اشك ان راع المرسيدس ما ضاع له شي

واشك بعد ان قلمك عنده .

لان الهوامير يزيدون ما ينقصون !!

....

الشويّب
اهم شي جازت لك يالسمي

مصلح بن نميان
هههههههههههه
والله ياضحكت على لحظة (استجماعك لقواك قبل دخولك للفصل )
حطنا في ركنك شي من هالقبيل
<-- ادمان مواقف


ش.س

ههههههههه
مافيه موالم بينك وبينها، خلك على السجية ترى
الادارة راح تتخذ اجراء وتحذف يوزرك لأنك صرت
راكد وهذا اكيد بدافع الشك في انك منت بأنت هههه


عبدالرحمن بن حمد
اجل الرجلين تيوبلس هههههههه

,’,
\\

أبـــــــــــــــــــــــــــــــــــــــــو حمد , أما من ناحية تيبلس هههههههههههههه فـ ما يحتاج , كيف وهي قدم من ذو القدم ههههههههههههههههههههههههههه


و راع المرسيدس , لا تنشد عن قلمه ههههههههه أنشد عن المرسيدس يارجآآآآآل

,’,
\\

,

[ موقف , مضحك , ]

في حصة القرآءة , في برنامج محو الأمية ,

و مجموعة من شيبان القريه , الله يحفظهم , جااي أخوكم متحمس , محضر الدرس , ومرتب نفسه , :in love:

أخذت أكتب , الدرس , على السـبوره , يوم خلصت , و ألتفت على الشيبان ,

إذا واحد منهم الله , يستر علاااااااه , يتكلم مع بقية الشيبان , بصوت مرتفع [ عن صورة جمل , في كتاب القراءة ] ,

والله يافيه , أبعير هنيا ,مفليٍ فالعشب , تبون الربيع هذا وانهوه ههههههههههههه

هيا دبروها الحين , نشرح الدرس , ولا نشوف الربيع الي مفليٍ فيه البعير وانهوه هههههههههههه

متابع من بعيد .. لين القى لي موقف واجنّب ..!!


محمد صالح : باقي تخاف من ( جهاد ) ..؟
عبدالرحمن حمد : صاحب المرسيدس باقي ما طلّع رخصة قيادة .. !!
ترانيم : معوّضة خير ..!!
مصلح بن نميان : ههههههه ما تشوف بأس .. !

محسن المطيري و فن الاعتذار !

في المرحلة المتوسطة ، جانا مدرس ملتزم .. اسمه ( محسن المطيري ) ! جانا من جده الله يذكره بالخير ،
المدرس .. شبابي ويآخذ و يعطي معانا مع انه هاك الوقت كان علاقة المدرس والطالب مربوطه في ( سلك الكهرب ) ..!

كان يدرسنا مادة ( العلوم ) ، باسلوبه حبينا الماده ،
وكنت متفوق عنده وافضل طالب في الفصل < زين مافي احد من اصدقاء الدراسه بالمرقاب

وكنت احضر الدرس قبله بـ يومين ، واجي اشارك واستمتع بكل جزيئه بالدرس ،

وفي احدى الايام .. تأخر المدرس وصار الفصل ( فوضى ) < مشعان يعلمكم وش يصير لا تأخر عن الحصه :beleh:

عاد انا ما تحركت من طاولتي ومسوي اني ناقد على المشاغبين من باب الاحترام للاستاذ

جانا المدرس وهو معصب حده !
ووقف كل الفصل .. ومسكنا واحد واحد بـ ( سلك الكهرب ) اللي سبق وذكرناه
وجاني ما جاء اصدقائي المشاغبين من العقوبه ! وانا ما تسببت باي ازعاج !

قلت : طيب اوريك يا مدرس العلوم < طبعاً بيني وبين نفسي

ويوم جت الحصه اللي بعدها بكم يوم !

الرجال جاي طبيعي بيشرح ! ويشرح ينتظرني اشارك معه !
وانا مطنش ! < يعني بتوقف الحصه عليك !

وبعد الشرح يراجع ويسأل ، ولا اشارك !

حصه !
حصتين !
ثلاث !
وانا نفس الطريقه ،

ويوم جاء مره يصحح الواجب ! وهو يصحح يصحح يصحح !

يوم خلص ويكتب بعد التصحيح :

انا آسف !

يوم قريتها وانا وجهي يطيح < ليه ؟ ما ادري !
واشوف دفاتر العيال .. الا ما كتب لهم شي !

المهم حسيت انه مالي داعي ، وانا من اليوم اللي عقبه ارجع نشيط اكثر من اول



واعتبرت هـ الموقف .. درس في الاعتذار

( برايفتـ / ات )

خارج ( النص ) .. \ لـ ( الربع )

عبدالرحمن حمد العتيبي

هههههههههههههههههههههههههههههههههههههههه


من هنا .. اقول لك :
كبير يا بو حمد !
يا مسطر ( الضباط )

محمد صالح العتيبي

هههههههههههههههههههههههه

هنا يكمن الدهاء ..!
بديت أحس : انك ( المخ ) والاخ هو ( اليد العامله )

يا عيني على الـ team

مصلح بن نميان

هههههههههههههههههههههه

ما عليك يا صديقي !
دامها مرحلة ( تطبيق ) !

المهم :
ان شاء الله ، لا تعينت رسمي ،
تعرف تصفق الطاوله بدون ما تجرح يدك ؟

موضوع حلو فيه نبش لذاكره

لي عوده موثقه بالصوره

المشاركة الأصلية كتبت بواسطة محمد صالح العتيبي

عبدالرحمن بن حمد
اجل الرجلين تيوبلس هههههههه

هههههههههههههههههههههههههههههههههههههههه

حتى على (( الشوك )) لا أخلو من الحسدي .. !!
ايه والدليل ان وحده من رجولك (( تيوبلس )) .. !! <-- ناجبينه خواله .. !!



مصلح ابن نميان :

أنت قابلتني وشفت كيف أمشي على الأزفلت كني (( همر )) .. !!
وراعي المرسيدس راح وتمرجل وخلص .. !!


محمد بلال :

راعي المرسيدس طلع رخص (( بناء )) ناطحات سحاب ..
وأنا لازلت أدور (( راس )) المرجلة عشان انطحه .. !!

طلال الجميلي :

تراني بعد أقدر أسطر موظفين (( أرامكو )) على الكورنيش .. !!
<-- يبا يفضخ قلبه .. !!


تباً لـ (( نطح )) المراجل .. !!

لاتخاوي راعي النكبات


اذكر قبل تسع اعوام تقريباً او تزيد شوي رحت انا واحد الزملاء المعقودين ياعني اللي نكباته واجد وتوفيقه قليل }توضيح للي مايعرف معناها المهم طلعنا مشوار واحد لهدف واحد انا توفقت فيه وهو طاح حظه المهم اتصل بي احد ابناء العمومه طلب مني اني اتابع احدى الصحف وقلت له يابو فلان وقف ابي البقاله ماقصر وقف المهم خذذيت الجريده ومستانس اموري طيبه والوقت ظهرية وموافق خروج الموظفين وفي صيف يروع والسياره المكيف على اعلى درجة تقول في فرن المهم حطيت رجلي وانتم بكرامه على الطبلون (هذا يابو حمد قبل العقل الحين عاقل ) واجلس اقرى الجريده خوينا يسرع الا شوي صوت الفرامل والصدمه الا صادم سياره قدامنا صغيره ويعدم شنطتها المهم نزلنا وسلامات ومن هالكلام قلنا يالربع حنا مخطين واللي تبونه ابشروا به تبون تقدرون سيارتكم ونعطيكم اصلاحها والا تبون المرور يجي انتم على كيفكم قالوا ابد مانبي الا سلامتكم المهم كان مقر سكن خوينا قريب ويوم ركبنا السياره قلت له انت (رخمه) الحين الريجيل صادمهم ومعدم موترهم ومتنازلين وريجيل لحوات غانمه وعلومهم طيبه وفي ظهر ووقت غداء وشقتك قريب وراك ماعزمتهم للغداء وقلت يالربع نبي نتغدى سوى قال والله انك صادق طبعا راحوا مع شارع رئيسي لحقناهم بيوقفهم بيغديهم الرجال:sniper56: المهم الشارع فيه حفريات والسيارات تمشي في مسار واحد شفناهم لفوا مع لفه لفينا وراهم طلع الشارع اللي دخلو معه مغلق بسبب حفريات واصلاحات رجعوا ( ريوس) وفي روايه للخلف الا حنا محظرين معهم ونصدمهم مره ثانية الا سيارتهم متعلقه في الحفرية وطايح كفرها اللي قدام في الحفريه وانا اموت من الضحك وينزل السواق يوم شافه وهو يموت من الضحك وينزل خويه معصب انت ماتشوف وانت وانت وانزل قلت يالربع انتم تجملتوا في رفيقكم وقال الحين وقت غداء ولحقكم بيعزمكم على الغداء قال عساه للغده ان كانه مسلط علينا قبل شوي صادمنا ومتنازلين والحين لاحقنا وصادمنا مره ثانيه قال ياولد شقتك وين ويقوم يوصف خوينا من عند الاشاره الفلانيه رح يمين يجي المكان الفلاني يحسب انه بيلحقه يتغدى قال لاتوصف تعالوا نبي نطلع السياره ثم امش قدامي لا تمشي ورانا ياخي عاقبتنا المهم طلعنا السياره وانا والسواق المصدوم ميتين ضحك ونركب السيارة ونمشي كانت اطرف قصة وفيها ايضاح لعقد بعض الخلايق ..

عدنا

موقف لا انساه ابدا .. اسرده لكم كما كان .. دون رتوش أدبية أو اخراجية ..

*
*

هذا الموقف حصل اول ايام الامتحانات في اولى ثانوي
دخلت القاعه .. وكانوا موزعينا مع بنات ما نعرفهم
كل وحده يحدها من الاربع جهات بنات من مراحل مختلفة حتى يقضوا على ظاهرة الغش

والله بلاني بـ بنت غريبة , كانت تجلس بالماصه اللي وراي
حركتها كثيره و مزعجة .. ماخلتني اركز بالاسئلة
تحرك الماصة .. تدفها .. و تهزها .. مدري وش عندها ..!!


طبعا معنا مدرسات مراقبات يلفّون و يدورون كل شوي
و ارتاح كثير لا صارت المراقبة قريبة مني .. احس بالامان



المهم


بعد فتره صارت تناديني: ( بسسسس ) ( بسسسسس ) ( اششش ) ( هيييي ) ..
تهمس و ( تبسبس ) حتى انتبه لها .. وانا ماعندي الا طنااااااش
و خايفه منها .. وشكلي صار ( باااايخ ) و مشبوه كنّي غشيت او ناويه اغش


والبنت زودت العيار حبتين وبدت تهمس : ( انتي يابنت ) ( بسسس ) ( يابنت ردي )

تحرك شعري بقلمها , وانا احاول ابعد عنها و الصق عند ماصتي وبديت ارتعب منها
وهي كل ماراحت عنها المراقبة تكمل حركاتها

بعد فتره

تنفخ من بعيد واحس بالهواء عند شعري..وتلخبطت اكثر ماعاد ادري عن الاسئلة ولا قادره افكر
وهي تضحك : ( هههههه لاتخافي خذي ) ( طيب خذي )
ورمت علي شي , جا تحت ماصتي

وربي ببكي ..
واقول هذي بتبتليني باوراقها وبراشيمها >>>> ماعرفت معنى برشام الا قريب >>>> ياعيني على الثقافة

قلت احسن شي اسلم اوراقي واطلع
اخاف حد يكتشف الشي اللي تحت ماصتي واروح فيها

نفذت بجلدي وخرجت من القاعه
وهي تطلع وراي حالا كنها ما صدقت

لحقتني وهي تقول : ( وش فيك ما تردين علي ..؟ )
وانا اقول : ( انتي وش تبين مني ؟)

قالت : ( ولا شي .. اناديك من الصبح ابعطيك شي .. بالاخر رميته عليك .. ما اخذتيه ؟)
قلت : ( ماباخذ شي .. ولو سمحتي لا ترمين علي اوراقك مرة ثانية )
قالت انا عطيتك , ,




















قد اعود

^
^
والله من الشطارة والقلب الحي

المشاركة الأصلية كتبت بواسطة راكان المغيري

ويوم ركبنا السياره قلت له انت (رخمه) الحين الريجيل صادمهم ومعدم موترهم ومتنازلين وريجيل لحوات غانمه وعلومهم طيبه وفي ظهر ووقت غداء وشقتك قريب وراك ماعزمتهم للغداء وقلت يالربع نبي نتغدى سوى قال والله انك صادق..

اشهد انك انت اللي نكبته...

المشاركة الأصلية كتبت بواسطة راكان المغيري

طبعا راحوا مع شارع رئيسي لحقناهم بيوقفهم بيغديهم الرجال:sniper56: المهم الشارع فيه حفريات والسيارات تمشي في مسار واحد شفناهم لفوا مع لفه لفينا وراهم طلع الشارع اللي دخلو معه مغلق بسبب حفريات واصلاحات رجعوا ( ريوس) وفي روايه للخلف الا حنا محظرين معهم ونصدمهم مره ثانية الا سيارتهم متعلقه في الحفرية وطايح كفرها اللي قدام في الحفريه وانا اموت من الضحك وينزل السواق يوم شافه وهو يموت من الضحك وينزل خويه معصب انت ماتشوف وانت وانت وانزل قلت يالربع انتم تجملتوا في رفيقكم وقال الحين وقت غداء ولحقكم بيعزمكم على الغداء قال عساه للغده ان كانه مسلط علينا قبل شوي صادمنا ومتنازلين والحين لاحقنا وصادمنا مره ثانيه قال ياولد شقتك وين ويقوم يوصف خوينا من عند الاشاره الفلانيه رح يمين يجي المكان الفلاني يحسب انه بيلحقه يتغدى قال لاتوصف تعالوا نبي نطلع السياره ثم امش قدامي لا تمشي ورانا ياخي عاقبتنا المهم طلعنا السياره وانا والسواق المصدوم ميتين ضحك ونركب السيارة ونمشي كانت اطرف قصة وفيها ايضاح لعقد بعض الخلايق ..

هههههههههههههههههههههههههههههههه

هذا و الله المعوقب...


صراحه؟؟؟


قصه غييييييييييييييير من جد ضحكت من السالفه


الله يسعد ايامك يا ابو جميل...


و الله العالم ان نكبته من خويّه اللي ركب معه << ما يقصد راكان

لكن تكفى يا بنيــّاخي لا عاد تركب معي في موتري....
جاه الله علاك من مخاواي في اي درب ٍ يكون...