وجدي على الراحه وجود أم الضنى

السلام عليكم ورحمة الله وبركاته



كل عام وأنتم بخير


قصيده جديده





وآآ نفسي اللي ما تطعـّم زادها
............ كثر الصبر في ضيقها ما فادها
ليا أذن المذن تصدد عايفه
............ تارد على عد الشقى ورّادها
يطري عليها من الهواجس ماطرى
............ ولا عاد تدري وش بغـَى نشادها
تبغى ولا شي ٍ حصل مما بغت
............. إلآ الحصيل من الطعون جدادها
في ساحة الأوجاع تشهر سيفها
............ .ولا مرة ٍ جاء سيفها بـغمادها
لو هي كريمه من طلب ماردته
............ محد ٍ سعى لو مرة ٍ لـ إسعادها
أضحَت فريسه للهموم وللتعب
........... ومصادم ضروف ٍ تحب عنادها
شالت عواقيب الزمان المهلكه
.......... وصار البلا في طوعها وجهادها
عزي لها وعزي لعين ِ مـ أمرحت
............ تسهر وخلق الله في عز ارقادها
وجدي على الراحه وجود أم الضنى
............ عقب أضنته سن القدر بـحدادها
جات المنيّه في وجه رجـّالها
............ والبارحه يبغى يشوف ولادها
تبكي وتضم وليدها في حضنها
............ في وليدها شافت ابوه وزادها
حزن ٍ على حزن ٍ سكن فـ ضلوعها
........... وعلى مواعيد المفاجع قادها
وإلا وجود ٍ بـ القصايد مـ إنذكر
........... ولا فيه نفس ٍ يطرقه وجـّادها
وجد الذي وسط الخلا ذاق الضمى
............ في صحصح ٍ ما ينخبر روّآدها
من ظهر راحلته تساوى بالحزم
............ وأقفت ذلوله ماعليها شدادها
تذيـّرت من طيحته وإستوحشت
........... نادى عليها وخوفها ما هادها
أمسى كسير ٍ بـاليدين وبـ الظهر
........... قسمه وربك للمعنا رادها
جات الذياب اللي تعاوى من عصر
............ وقامت على راسه تقيم أعيادها
هذاه حال إللي حياته مافرح
............ ونفسه تصدد ماتطعـّم زادها


.



.

.
يآسلآم عليك يآشيخ
.
صح لسآنك يالذيب
.

قسم بالله سجلت دخول لعيون القصيده

الله الله

تبغى ولا شي ٍ حصل مما بغت
............. إلآ الحصيل من الطعون جدادها

بيت اعجبني في تركيبته وتصويره ..

التوجد كذالك ..

وجدي على الراحه وجود أم الضنى
............ عقب أضنته سن القدر بـحدادها
جات المنيّه في وجه رجـّالها
............ والبارحه يبغى يشوف ولادها
تبكي وتضم وليدها في حضنها
............ في وليدها شافت ابوه وزادها
حزن ٍ على حزن ٍ سكن فـ ضلوعها
........... وعلى مواعيد المفاجع قادها


آآآآآآآح يافح الضلوع وياشقاها

بالمختصر ابدعت ابدعت ابدعت

صح لساااااانكـ ..