لفـــّه وتدويــره!

[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
هجس القصايد خذا لفّه وتدويره = وقّف قوي العزايم واعلن رجوعه
رجعة محنّك معه عذره وتبريره = دروب يمشي بها ودروب ممنوعه
درب السعه زين لو طالت مشاويره = مهما بلغ طولها سهله ومقطوعه
واللي تعسّر على الرحمن تيسيره = سبحان من له سجود العبد وركوعه
الله وأكبر ثمانين الف تكبيره = على هواجيسي اللي جات مجموعه
تقلط وارحّب ولا يطرد مساييره = الاّ قليل الشيَم من بدّة ربوعه
تقبل وتقفي وتوريده وتصديره = سيّه وحسْنَه ومكتوبه ومدفوعه
فما كل سلعه بتحكمها بتسعيره = هذيك مسيومه وهذيك مبيوعه
وماكل متحاكيٍ تفهم تعابيره = والكلمة الطيّبه تقبل ومسموعه
اللغز من مدخله ينفك تشفيره = والساق لو ينقطع ماعاشت فروعه
لو كل ماينكسر بيفيد تجبيره = تلقى ثياب القزاز ألوان مصنوعه
متناقضات الدهر جابت لي الحيره = لحظات فيها فرح وأيام في لوعه
أصبحت في ديرةٍ وأمسيت في ديره = هذي صحاري وذي ساحات مزروعه
حتى استوى عندي الخبت ونواويره = مع الحضاره وذاك القصر وشموعه
والذود ساوت مجاهيمه مغاتيره = من كل شي الثقه ذا اليوم منزوعه
الوقت مايندهن خشمه ولا سيره = لا بان ضحكه ولا بانت لي دموعه
فان عوّدت عند تقديمه وتاخيره = على النقا رايتي بيضا ومرفوعه
والحمد لله على حكمه وتقديره = افعال ماجازها وافعال مشروعه [/poem]