مدخالي .. ومطلاعـــي

السلام عليكم ورحمة الله وبركاته
في البدايه كل عام وأنتم بخير قبل الزحمه وآسف على الإنقطاع
ولو سمحتوا شوفوا لها صرفه بغيت أوديها الشعبي وعيّت الخيره

[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
ياكدرة الخاطر وياحزة الضيقه = عليك حزات والله مالها داعي
تجين والقلب يابسة ٍ معاليقه = وأروح لا مغيّب ٍ عنّي ولا واعي
مابين تغريبه ومابين تشريقه = ما ثابت الاّ انعواجة حدب الأضلاعي
لولا إن صدري متيّتة ٍ صناديقه = تفرّق الشمل من عقب التجماعي
ماني حريص ٍ على لمّه وتفريقه = وافقت له يوم وافق درب الأسناعي
ما والله أبرك لحمل ٍ جور ما طيقه = ماعادني للهوى يانفس تبّاعي
الشر مانيب مندوب ٍ لتسويقه = والخير من فوق راسه طايل ٍ باعي
يمكنّي أخطيت في ضحكه وتعليقه = ويمكنّي أبطيت وأوجاعي هي أوجاعي
سكتّ وامجادلي لو ما نشف ريقه ؟ = بلاني الله بمدخالي ومطلاعي
بنادق امزهبّه وارماه تفّيقه = وأهداف متحركه مع كل ذعذاعي
يرفّ لي شارب ٍ ضاري بتحليقه = ويصفّ قدامي المبسوط والناعي
صديق ماهمّه الاّ بس تصديقه = إي والله إن صحبته ( صحبة تمتّاعي )
لا عاده الله ولا عادت طواريقه = يروح عنّي ويلقى غيري ( نفاعي )
أكرهت نفسي على رجال ما اطيقه = وبانت غصب في تمركاي وتربّاعي
والمجلس اللي يكبونه مطاليقه = مانيب في ربعته مربوط بكراعي
ساقي سليمة عظم والله وتوفيقه = ما ضاقت الأرض وفجوج الله وساعي
أشوار ٍ امقدّيه وأقدار ٍ امعيقه = وناس ٍ على فالها وأمر الله امطاعي
في نجد ماعاد أعرْف الاّ شواهيقه = ولا كن مقلع طميّه غير مقلاعي
اجنون متكاثره واذياب ٍ امويقه = وانجوم متفرقه .. جمله وقطّاعي
واللي من العام ما شيفت غداريقه = ماهو طبيعي وكل انتاجه اصناعي
يقطعك حب ٍ غرق في حبر و( وريقه ) = كسرّت مجدافي بسبّتك واشراعي
جالي معك وقت تخديده .. وتطريقه = واليوم ما حي والله يقدر اقناعي
هذا زمن كل خلق الله عشـّيقه = بنتين مرعيّه .. وبنت ٍ بلا راعي !!
يا نجل يا خدر يا نعّاس يا مفيقه = لمّاع سودك علامه زاد لمّاعي ؟
أكفي دلال الهوى من فوق أباريقه = بدون توديع وأوضاعك من أوضاعي
لا احدك ولا تحديني على الضيقه = ينجدك منديلك .. وينجدني اذراعي
[/poem]



..