العلّه الباطنيّه !

السلام عليكم ،

تعبير متواضع عن ما يدور في غزّه هذه الايام ..


[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=1 line=1 align=center use=ex num="0,black"]
واقلبي اللي غدا للهمّ لعبوبه=في غبّته .. كلّ ما يرميه يرميني

يلعب ّ به ولعبته ماهيب محسوبه=هم ٍ يصبّحني .. وهم ٍ يمسيني

والصبر لو يزهمه ما يلتفت صوبه=الله يجيره من الهمّ ويعافيني

أستغفر الله .. بين الذنب والتوبه=وأعوذ بالله .. من شرّ الشياطيني

وهّاب خلقه .. ومنه الخلق موهوبه=وأنا لو أجحد نعيمه .. تبّت يديني

لو يرتفع ضغط دمّي فوق منسوبه=قامت تزيد الحراره في شراييني

غنيّت والشّعر ما ضيّعت ماجوبه=وجريّت صوتي مع أصوات المغنيني

شلته في عيني وراسي جاب مطلوبه=ولا هان من راسي .. ولا طاح من عيني !

مير أفسحوا لي مجال .. أفرّ دالوبه=عن آخر أخبار وأحداث المياديني

إلى متى وأمة محمد بغيبوبه=وإنعاشها ميّت .. ولا له براهيني

تجرّد الذلّ معها .. وألبست ثوبه=وجاتك بعد ثوبها الأوّل بثوبيني !

راحت فلسطين مأكوله ومشروبه=عذاب الأقصى .. من القوم المواليني

يا غزّه العزّه اللي منك منهوبه=أخذي عوضها من الزيتون والتّيني

وينك و وين الفرج .. والنار مشبوبه=بين الفلسطيني .. وبين الفلسطيني !!

( حماس ) يزمر عليك وينفخ ذروبه=ويرزّ ( فتح ) البيارق والنياشيني

شلّة زلمات ود وهات والكوبه=بالدين تلعب .. وترفع راية الديني

تسلطّوا لين كل ٍ قام مندوبه=يصرّح ولعنبوهم من سلاطيني

الخاين اللي يغش الناس بأسلوبه=سياسته واضحه شكل ومضاميني

الدار مستعمره والأرض مسلوبه=والشعب مغبون والقاده مجانيني

وأنتي من اللي تضحّوا له وضحوّ به=تنثر على دمك زهور البساتيني

وحسني مبارك نفض من حالك جيوبه=ومعبر رفح قفلّه بين الفريقيني

وأطلق شنب في العرب يمناه معطوبه=لو يحتزم بالسيوف وبالسكاكيني

حتى غديتي على صهيون مجلوبه=( ومن دون ملعون بذّتك الملاعيني ! )

وقامت عليك اليهود تفكّ الأنبوبه=بالقصف والعصف بين العسر والليني

العلّه الباطنيّه فيك مصبوبه=مير أنزعي شرّها حتى تشافيني

نستنكر الداب وإلا نشجب جنوبه=نبقى على حالنا من حرب تشريني

عز الله أنك على ما قيل منكوبه=وعزّ الله أنّا على قولك مساكيني !

الطاوله من قديم الوقت مقلوبه=خل الكراسي تدور وفالها شيني [/poem]


وسلمتوا ،،