منتديات المرقاب الأدبية - عرض مشاركة واحدة

14-08-2013, 03:42 PM

على ساس

[poem=font=",5,darkblue,bold,normal" bkcolor="transparent" bkimage="" border="none,4," type=0 line=0 align=center use=ex num="0,black""]

لاتبدي الشكوى على ساير الناس = حتى ولو طوّل بقلبك جزعها

أبدابها لله .. ولا يدخلك ياس = ماخاب من يمّه كفوفه رفعها

ونفسك ولو حاشت من الدرّ والماس = حذراك لا يطغى عليها جشعها

لا بد ماياقف على باب الإفلاس = اللي يشح بها .. ليامن جمعها

ولا تأمن الحيّه ولا تطبخ الفاس = ولا ترغب الدنيا وتكسب ولعها

والوقت ماياوي ولا عنده احساس = ناسٍ يسليها وناسٍ فجعها

وقيس الكلام اليا سمعته بمقياس = والكلمه اللي مالها وجه دعها

والذل رمحه يشبه لرمح جسّاس = لن صاب هيبتك القويّه نزعها

والمجد من دونه سهر ليل وعماس = ومسافةٍ ماكل واحد قطعها

والعرف ماتلقاه في كل مجلاس = ناسٍ عطاها الله وناسٍ منعها

والخوّه اللي ماتوثّق على ساس = لا تنخدع فيها ولا تتبعها

لا صار ماتثبت ليا هب نسناس = بكره ليا هب الشمالي قلعها

تعلّق برفقة بعيدين الأرماس = ناسٍ قناعتها ..تغيّب طمعها

في عرفهم تكسب معزّه ونوماس = وفرقاهم ان حلّت تحس بوجعها

وللهرج هرّاجه وللشعر هوجاس = والحمدلله ماجهلت بسنعها

أمّا هرجت بهرجةٍ ترفع الراس = ولا بيوتٍ ما ندم من سمعها[/poem]