قصايدنا في مهب الريح

هذي قصيدة تطابقت في كم شطر مع قصيدة لي ... ولا أعتقد انها عفوية ... يعني فيه واحد لاطش من واحد ...<<<<< شك في نفسه

القصيدة في موقع ( مجالس بني هاجر ) بإسم الشاعر ( راشد بن جفن الهاجري ) .. ويقول راشد :

ياهاجسي هيا على منبـع الطيـب
لاجيت عند اهل المكـارم عربهـا
ساس الكرم من غير شك(ن)ولاريب
طيب ومن ناس(ن)عريب(ن)نسبها
ماضي بن محمد وراعي المواجيب
الطيبه من طيـب راسـه كسبهـا
تنشر له البيضاء بعالى المراقيـب
شرواه من شـرواه فكـك نشبهـا
عريب ومعرب عريـب المجاذيـب
ماهي خرافه مـن جـدوده جذبهـا
ماحشو الطاله بشـذب العراقيـب
عاشت اساميهم وصافـي ذهبهـا
لهم على العليـا دروب ومطاليـب
ماهمهم سهـل لامـور وصعبهـا
أليا فزع مارسـل لعلمـه مناديـب
الكايـده يقـدم ويحكـم سببـهـا
يفوح ذكره مع شذا فايـح الطيـب
يـوم الـزوم الواجبـه ماعقبهـا
ماضي بن محمد بعيـد العذاريـب
فـي وقتهـا والتاليـه ماحسبهـا

وأنا في قصدتي أقول:

للطيب ناسٍ ما تجنّب عن الطيـب
لو تسعة اعشار البريّـه جحـوده
ماحدهـا قـلّ الوفييـن للعـيـب
مـا كنّهـا الا للكمـال محـدوده
ما يحسبون الزود في بقشة الجيب
كلٍ يحسّب بالوفـاء ويـش زوده
إلهم على العليا دروب ومطاليـب
ويجدد النامـوس معهـم عهـوده
ماحاشوا الطولة بشذب العراقيـب
ولا حاولوها بالنفـوس الحسـوده
الطيب .. عدٍ .. دربه مكل وصعيب
مااسهل مصاديره وماأصعب وروده
وابو سعود*النادر الفاهـم الذيـب
كل العـدود الطيّبـه مـا تكـوده
الله فطر قلبه ولا احتـاج تدريـب
ورثه من اقصى واحدٍ في جـدوده
إليا فزع .. ما ارسل لعلمك مناديب
وإليا اعتزا .. قامت تقادح زنـوده
كلامه اثقل من حيـود الغرابيـب
لا يابعـد مـن لا يوّفـي وعـوده
اقـدّره تقديـر الاجـواد للشيـب
وافخر بمعرفتـه واثمّـن جهـوده
يفوح مع ذكره شذا فايـح الطيـب
ويجيك به مـزنٍ تـرازم رعـوده

الله يهديه .. ويسامحة ...

بصراحة شي يخوّف ..
يعني ما يدري الواحد بكره يلقى قصيدة له مشلّحة .. كل بيتين مدخله بهالطريقة الخفية في قصيدة .

الانترنت مشكلته مشكله

قبل لا أظلم الرجال ... تتوقعون انها عفوية؟